ەربول شايمەردەنوۆتىڭ 70 جىلدىعىن جەرلەستەرى س.مۇقانوۆ اتىنداعى وبلىستىق عىلىمي-امبەباپ كىتاپحاناسىندا مامىر ايىندا اتاپ وتكەن. ءدال سول ۋاقىتتا اقىننىڭ مەرەيتويى استانا قالاسىندا ۇلكەن مەملەكەتتىك شارا رەتىندە اتالىپ, تۋعان جەرىنە قالامداس دوستارى مەن زيالى قاۋىم وكىلدەرى كەلە الماعان ەدى. وسى ولقىلىقتىڭ ورنىن تولتىرۋ ماقساتىندا وتكەن اپتادا سەناتور نۇرتورە ءجۇسىپ باستاعان ءبىر توپ قوعام قايراتكەرى, اقىن-جازۋشىلار قىزىلجار وڭىرىنە, اقىننىڭ تۋعان جەرىنە كەلدى. دەلەگاتسيا قۇرامىندا كورنەكتى جازۋشى قۋانىش جيەنباي, فيلولوگيا عىلىمدارىنىڭ دوكتورى, اقىننىڭ دوسى, فيلولوگيا عىلىمدارىنىڭ دوكتورى, پروفەسسور قۇدايبەرگەن تۇرسىن, قالامگەردىڭ جارى كۇلاش شايمەردەنوۆا, اۋەسقوي كومپوزيتور قۇدياربەك اعىباەۆ, ايتىسكەر اقىن راۋان قايدار جانە ەرەكەڭنىڭ ءبىر توپ تۋىسى بولدى.
وسى توپتىڭ قاتىسۋىمەن س.مۇقانوۆ اتىنداعى وبلىستىق عىلىمي-امبەباپ كىتاپحاناسىنىڭ ۇلكەن زالىندا زيالى قاۋىم وكىلدەرىنىڭ كەزدەسۋى ۇيىمداستىرىلدى. ونى وبلىستىق مادەنيەت باسقارماسىنىڭ باسشىسى سانات اۋباكىروۆ اشىپ, قوناقتاردى وبلىس اكىمى عاۋەز نۇرمۇحامبەتوۆ اتىنان قۇتتىقتاپ, ءسات-ساپار تىلەدى. قوناقتار اراسىنان سويلەگەن جازۋشى قۋانىش جيەنباي ەرەكەڭنىڭ ادامگەرشىلىك قىرلارىنا توقتالدى. قازمۋ-دا بىرگە وقىعانىن, ەرجۇمان سمايىل, سۇلەيمەن مامەت سىندى تۇلعالارمەن دوستىق قارىم-قاتىناستارىن ەسكە الدى. «ەربول بىزدەن جاس بولسا دا, سالماقتى ويىمەن, پاراساتتى مىنەزىمەن ناعىز سىرباز ەدى. ول جاستايىنان كوزگە ءتۇسىپ, ادەبيەتتە دە ءا.نۇرپەيىسوۆ سياقتى تىم تالعامپاز كوريفەيلەردىڭ ءوزىن ەرتە مويىنداتتى», دەدى. سەناتور نۇرتورە ءجۇسىپ بۇگىنگىدەي الماعايىپ زاماندا ەربول اعاداي كەمەڭگەر ادامدار بولسا, ەلىمىزدىڭ ەرتەڭىنە جاۋاپ ىزدەپ, ستراتەگيالىق ماقساتتارىمىزدى ايقىنداۋعا بەلسەنە قاتىسار ەدى دەپ ونىڭ ومىردەن بەيمەزگىل وتكەنىن وكىنىشپەن اۋىزعا الدى. اقىننىڭ ادامگەرشىلىك قىرلارىنا توقتالىپ, قامقورلىعىن كورگەنىن جەتكىزدى. جاساندى ينتەللەكت قارىشتاپ دامىپ كەلە جاتقان بۇگىندە ەربول شايمەردەنوۆتىڭ جيناعان دانالىقتارى, اسىرەسە قازاق افوريزمدەرى كومپيۋتەر باعدارلامالارىنا تۇگەل ەنگەنىن قالايتىنىن ايتتى. سونىمەن بىرگە ەربول شايمەردەنوۆ تاۋەلسىزدىكتىڭ ەلەڭ-الاڭىندا الماتىدا جازىلعان «بەز پراۆىح ي لەۆىح» دەگەن كىتاپتىڭ تۇساۋكەسەرىن ماسكەۋدە ۇيىمداستىرعانىن ەسكە الدى. «سونداي تاماشا ۇيىمداستىرىلعان تۇساۋكەسەردى ءوز باسىم سودان بەرى كورگەنىم جوق», دەپ اقتارىلدى ن.ءجۇسىپ.
اقىننىڭ كۋرستاس دوستارىنىڭ ءبىرى قۇدايبەرگەن تۇرسىن ەربول شايمەردەنوۆتىڭ ستۋدەنتتىك جىلداردا بىردەن كوزگە ءتۇسىپ, ەرجۇمان سمايىلمەن قاتار بەلگىلى تۇلعاعا اينالعانىن ايتتى. «ەكەۋى دە ءبىزدىڭ كۋرسىمىزدىڭ اقىلى مەن سابىرى, بارلىق جاقسى ءىستىڭ ۇيىتقىسى بولعان ەدى», دەدى ول. قۇدياربەك اعىباەۆ ءوزى كاسىپقوي كومپوزيتور بولماسا دا, ە.شايمەردەنوۆتىڭ بىرنەشە ولەڭىنە ءان شىعارعانىن قوستى. «ونىڭ بايىپتى جىرلارى انگە سۇرانىپ تۇراتىن. تۋعان قالاسى تۋرالى «گورود موي رودنوي» دەگەن ولەڭىنە ورىسشا دا ءان شىعاردىم. ارتىنان قازاقشا «قىزىلجارىم» دەگەن ءان دە ومىرگە كەلدى», دەدى ول.
بەلگىلى ايتىسكەر اقىن راۋان قايدار وسى كەشكە ارناعان تولعاۋىن ورىنداپ بەردى. ال جەرگىلىكتى زيالى قاۋىم وكىلدەرى اراسىنان جۋرناليست جاراسباي سۇلەيمەنوۆ پەن عالىم زارقىن تايشىباي وزدەرىنىڭ ەربول شايمەردەنوۆ تۋرالى ويلارىن ورتاعا سالدى. اقىننىڭ جارى كۇلاش جەڭگەمىز جىر كەشىنە قاتىسقان جاندارعا العىس ايتتى.
كەلەسى كۇنى استانالىق قوناقتار اقىننىڭ تۋعان اۋىلى جاڭاجولداعى سابەڭ كىتاپحاناسىندا تاعى ءبىر تاماشا جىر كەشىنە قاتىستى. ول ارتىنا بىرنەشە جىر جيناعىن قالدىرعان, ساتتار سەيىتقازين, ساعات اشىمباەۆ, تۇمانباي مولداعاليەۆ سىندى اقىن-جازۋشىلارمەن جاقىن ارالاسقان جۋرناليست توقتار زىكىريننىڭ 75 جىلدىق مەرەيتويى ەدى. وسىدان ەكى جىل بۇرىن قاتەرلى ىندەت ءومىرىن ءۇزىپ كەتكەن توقاڭ سەزىمدى جىرلارىمەن رەسپۋبليكاعا ءبىرشاما تانىمال بولدى. ء«دام-تۇزىم تاۋسىلعانشا تاتىپ جەگەن, ادام بوپ قالۋدى مەن ماقۇل كورەم. وتكىزەمىن ءار ءسوزدى وي-ەلەكتەن, جازىلىپ جاتقاندايىن اقىرعى ولەڭ», دەپ جىرلاعان الەۋمەتتىك ليريكانىڭ شەبەرى توقتار زىكىريننىڭ ولەڭدەرىنەن سەزىمدى سەلت ەتكىزەتىن ورنەكتى جىرلاردى كوپ تابۋعا بولادى.
اكەسىز وسكەن توقاڭ قاراعاندىنىڭ كووپەراتيۆ ينستيتۋتىن ءبىتىرىپ, ۇزاق جىل ءوز ماماندىعى بويىنشا قىزمەت اتقارعان. بىراق اقىن جۇرەك ادەمى جىرعا ەلەگىزىپ, اقىرى ونى قالامگەرلىككە اكەلەدى. الدىمەن وبلىستىق «سولتۇستىك قازاقستان» گازەتىنىڭ شال اقىن, تيميريازەۆ اۋداندارىنداعى ارناۋلى ءتىلشىسى رەتىندە ەڭبەك ەتىپ, وتكەن عاسىردىڭ 90-جىلدارىنان پەتروپاۆل قالاسىنا ورنىعىپ, زەينەتكە شىققانشا وبلىستىق گازەتتىڭ بەدەلدى جۋرناليستەرىنىڭ ءبىرى بولدى. بالا مىنەزدى توقتار زىكىرين جاس-كارىگە بىردەي جاعىپ, سالماقتى, سابىرلى, بايسالدى مىنەزىنەن اينىماعان. بۇل تۋرالى جىر كەشىندە سويلەگەن جانداردىڭ ءبارى دە جۇرەكتەرىنەن اقتارىلدى. سونىڭ ىشىندە قۇرداسى, بالا كەزدەن بىرگە وسكەن دوسى جاراسباي سۇلەيمەنوۆ, ارىپتەستەرى نۇرسايىن ءشارىپ, ءنازيرا قۇرمانكينا, قوشان قالي, اقىندار داستەن بايمۇقانوۆ, مارال وسپانوۆا, تاعى باسقالار ايتتى.
