قويىلىمنىڭ وقيعا جەلىسى مىناداي. جەر-جەردەن كەلگەن اقسۇيەكتەر فرانتسيانىڭ جاڭا كورولىن ۇلىقتاۋ سالتاناتى بولاتىن رەيمس قالاسىنا بارۋ ءۇشىن اۋەلى «التىن لالاگۇل» قوناقۇيىنە ورنالاسادى. ولاردىڭ ارقايسىسى وزىنە عانا ءتان قىزىقتى بولمىسىمەن ەرەكشەلەنەدى. سول سەبەپتى قوناقۇيدىڭ ىشىندە كۇلكىلى جاعدايلارعا تاپ بولادى. درامالىق شيەلەنىس رەيمسكە ەشقانداي كولىك اپارمايتىنىن تۇسىنگەن ساتتەن باستالادى. سوندا ساياحاتشىلار پاتشانى قوناقۇيدە, ياعني ءوز ىشىندە ۇلىقتاي بەرۋدى ءجون سانايدى. ارالارىندا يتاليا, فرانتسيا, گەرمانيا, رەسەي, پولشا, يسپانيا جانە انگليادان كەلگەن قوناقتار بولعاننان كەيىن, ارقايسىسى ءوز مەملەكەتىنىڭ گيمنىن شىرقاپ, فرانتسيا اعزامى ح كارلعا كۇللى ەۋروپانىڭ اتىنان قۇتتىقتاۋلارىن جەتكىزەدى.
وسىنداي شىتىرمان قويىلىمدا وتانداسىمىز ءاليحان زەينوللا مەليبەي حانىمعا عاشىق ءارى وتە قىزعانشاق ورىس گەنەرالى گراف ليبەنسكوۆتىڭ ءرولىن سومداپ شىقتى. اتالعان ءرولدى قالاي يەلەنگەنى تۋرالى ءانشى بىلاي دەپ وي تارقاتادى:
«2022 جىلى مەن قىرعىزستان استاناسىنا ايتۋلى كونتسەرتكە شاقىرىلعان ەدىم. ول جەردە وركەستردىڭ سۇيەمەلدەۋىمەن دج. ءروسسينيدىڭ «سەۆيل شاشتارازى» وپەراسىنان كاۆاتينانى, ج.بيزەنىڭ ء«ىنجۋ ىزدەۋشىلەر» وپەراسىنان ايگىلى رومانس ورىندادىم. ءسويتىپ, مەنىڭ ورىنداۋىمدى دج.روسسيني فەستيۆالىنىڭ ديرەكتورى ەرنەستو پالاسيو مىرزا تىڭداپ, ءوزىمنىڭ اگەنتىم ۆ.فەدەلي مىرزا ارقىلى پەزارو قالاسىنداعى (يتاليا) دج.روسسيني اكادەمياسىنا شاقىرتۋ الدىم. اكادەمياداعى وقۋ باعدارلاماسىنا شەبەرلىك ساعاتتارىنىڭ توپتاماسى كىرەدى, ولاردىڭ بىرەۋىن مەن الەمگە ايگىلى تەنور حۋان ديەگو فلورەسپەن بىرگە جاسادىم. سونداي-اق دج.ءروسسينيدىڭ «رەيمسكە ساياحات» كولەمدى يتاليالىق وپەراسىنداعى دەبيۋتىم جانە يتالياداعى تاعى بىرنەشە ماڭىزدى كونتسەرت وسى وقۋ بارىسىنداعى جەتىستىگىم بولماق», دەيدى ول.
ايتا كەتۋ كەرەك, اكادەمياداعى وقۋ بارىسىندا الەمنىڭ ءتۇرلى ەلىنەن بارعان ءتورت تەنوردىڭ اراسىندا ە.پالاسيو ءاليحان زەينوللانى ءبىرىنشى قۇرامدا گراف ليبەنسكوۆتىڭ پارتياسىندا دەبيۋت ورىنداۋعا تاڭداپ العان. اكادەميادا ءبىلىم الۋمەن قاتار, قازاقستاندىق تەنور گرادارا, فەرمينيانو, ۋربينو, پەزارو قالالارىندا كونتسەرتتىك باعدارلامالارمەن ونەر كورسەتكەن.
«رەيمسكە ساياحات» وپەراسىنىڭ مۋزىكالىق جانە ساحنالىق دايىندىقتارى كۇن سايىن روسسيني تەاترىندا, ەكسپەريمەنتتىك تەاتردا جانە سكاۆوليني اۋديتوريۋمىندا يتاليان تىلىندە ديريجەر داۆيدە لەۆيمەن جانە حالىقارالىق دەڭگەيدەگى پيانيست-كوۋچتەرمەن بىرگە ءوتتى. تامىز ايىنىڭ سوڭىندا سپەكتاكلدىڭ پرەمەراسى وتە جوعارى دەڭگەيدە قويىلدى», دەپ پىكىر قوستى تەنور ءا.زەينوللا.
ەسكە سالا كەتەيىك, اكادەميادا تاعىلىمدامادان ءوتۋ كەزىندە ءاليحان رۋمىنياعا «سەۆيل شاشتارازى» وپەراسىنىڭ قويىلىمىندا گراف الماۆيۆانىڭ پارتياسىن ورىنداۋعا شاقىرىلعان ەدى. بۇدان بولەك, ول بۋداپەشتتە «Stabat Mater» ۇلكەن مەسساسىندا ونەر كورسەتكەن. سوندىقتان ونىڭ بۇل ونەر كورسەتۋى ەۋروپالىق ءۇشىنشى دەبيۋتى بولدى.
