قازىر الەمدە حالىقارالىق دەڭگەيدەگى بەدەلدى جەتى وليمپيادا بار. ولار ماتەماتيكا, فيزيكا, حيميا, ينفورماتيكا, گەوگرافيا, لينگۆيستيكا, بيولوگيا پاندەرىنەن ءداستۇرلى تۇردە وتەدى. سونىڭ ءبىرى – حالىقارالىق گەوگرافيا وليمپياداسى جىل سايىن جوعارى سىنىپ وقۋشىلارى اراسىندا ۇيىمداستىرىلادى.
«IGeO العاش رەت 1996 جىلى حالىقارالىق گەوگرافيالىق وداقتىڭ (IGU) قولداۋىمەن نيدەرلاند مەملەكەتىنىڭ گااگا قالاسىندا وتكەن ەدى. ال قازاقستان قۇراما كومانداسى اتالعان سايىسقا 2012 جىلدان بەرى قاتىسىپ كەلەدى. بيىل ءتورت وقۋشىمىز تامىز ايىندا رەسەيدىڭ تۆەر وبلىسىنداعى وقۋ-جاتتىعۋ جيىندارىنان ءوتتى. ناتيجەسىندە, تورتەۋى دە ەلگە ولجالى ورالدى. جارىس ءۇش كەزەڭنەن تۇردى. جازباشا كەزەڭدە التى تاپسىرما بەرىلەدى, ال ونىڭ ناتيجەسى جالپى سايىستىڭ قىرىق پايىزىن قۇرايدى. ال ەكىنشى, دالالىق كەزەڭدە وقۋشىلار اقپاراتتى وڭدەپ, تالداپ, جوسپار قۇرادى. سوڭعى كەزەڭ مۋلتيمەديا دەپ اتالادى. مۇندا قاتىسۋشىلار 40 سۇراققا 60 مينۋت كولەمىندە جاۋاپ بەرۋلەرى ءتيىس», دەيدى «دارىن» رەسپۋبليكالىق عىلىمي-پراكتيكالىق ورتالىعى ديرەكتورىنىڭ ورىنباسارى نۇرلان جۇماگەلدى.
بيىل ۇزدىك ناتيجە كورسەتكەن قازاقستان كومانداسىنىڭ قۇرامىندا تالدىقورعان قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى اقجول بولات, جامبىل وبلىسىنداعى دارىندى بالالارعا ارنالعان مامانداندىرىلعان «دارىن» ليتسەي-ينتەرناتىنىڭ 11-سىنىپ وقۋشىسى جومارت سابىر, شىمكەنت قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى ارسەن سىدىقوۆ, شىمكەنت قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى قانات سەرىكباي بار.
«بيىلعى ءبىلىم باسەكەسىنە 50 مەملەكەتتىڭ 200-گە جۋىق وقۋشىسى قاتىستى. سولاردىڭ اراسىنان توپ جارۋ, ارينە وڭاي ەمەس. دايىندىعىڭا ساي ناتيجە كورسەتەسىڭ. ءوز باسىم بەس جىل تىنباي تەر توكتىم. مىنە, بۇگىن سول ەڭبەكتىڭ جەمىسىن كورىپ وتىرمىز. البەتتە بۇل – عىلىمداعى جولىمنىڭ باستاۋى عانا. وسى جىلى كۇمىستى قاناعات تۇتتىق, بۇيىرسا كەلەر جىلى التىننان القا تاقسام دەگەن ماقساتىم بار. وسى ورايدا گەوگرافياعا قىزىعۋشىلىعىمدى ارتتىرىپ, دۇرىس باعىت-باعدار بەرگەن جەتەكشىم ناعيما بەكەتقىزىنا العىس ايتقىم كەلەدى», دەيدى نازارباەۆ زياتكەرلىك مەكتەبىنىڭ 11-سىنىپ وقۋشىسى اقجول بولات.
