فوتو: zh-shugylasy.kz
اكىمدىك مالىمەتىنشە, بيىل 6 ايدا اتىراۋ وبلىسى مەن قىرعىزستاننىڭ سىرتقى ساۋدا اينالىمى 3,2 ملن دوللاردى قۇراعان. بۇعان ەكى ەلدىڭ اراسىنداعى مادەني-گۋمانيتارلىق, تۋريزم جانە سپورت سالالارىنداعى ىنتىماقتاستىق وڭ اسەرىن تيگىزگەن. سول سەبەپتى ىسكەرلىك قارىم-قاتىناستى جەتىلدىرۋگە قاتىستى بارلىق ۇسىنىس قولداۋ تابادى.
«ەجەلدەن كورشىلەس وتىرعان ەكى ەل اراسىندا تاۋەلسىزدىك العان كەزەڭنەن بەرى باۋىرلاستىق قارىم-قاتىناس پەن ساۋدا-ەكونوميكالىق بايلانىس نىعايا ءتۇستى. قازىر اتىراۋ وبلىسىندا قىرعىز كاپيتالى سالىنعان 20 كاسىپورىن بار. بۇل كاسىپورىندار قىزمەت كورسەتۋ, ويىن-ساۋىق, كوتەرمە ساۋدا جانە باسقا سالالاردا قىزمەت كورسەتەدى. ءبىز ءوز تاراپىمىزدان ەكىجاقتى ساۋدا-ەكونوميكالىق ىنتىماقتاستىقتى ودان ءارى كەڭەيتۋگە, قىرعىز ينۆەستيتسياسىن تارتۋعا, بىرلەسكەن كاسىپورىندار قۇرۋعا قىزىعۋشىلىق تانىتىپ وتىرمىز. قىرعىزستان مەن اتىراۋ وبلىسىنىڭ كاسىپكەرلەرى بىرلەسكەن جوبالاردى ىسكە اسىرسا, ەلدەرىمىز اراسىنداعى حالىقارالىق ىنتىماقتاستىق پەن ءوزارا ءتيىمدى ارىپتەستىكتىڭ نىعايۋىنا تىڭ سەرپىن بەرەر ەدى», دەيدى س.شاپكەنوۆ.
قىرعىزستان ەلشىسى داستان ديۋشەكەەۆتىڭ ايتۋىنا قاراعاندا, باۋىرلاس ەلدەردىڭ حالىقارالىق سيپاتتاعى ءتۇيىندى ماسەلەلەرگە قاتىستى ورتاق ۇستانىمى بار. ءار كەز ءبىر-بىرىنە قولداۋ ءبىلدىرىپ, الىس-بەرىس پەن بارىس-كەلىستى جەتىلدىرۋگە ەشقانداي كەدەرگى جاساعان ەمەس.
«ەكى ەلدىڭ ەجەلدەن كورشىلىك حاقى بۇزىلماي, ىنتىماعى جاراسىپ كەلەدى. قازىر سول ىنتىماقتاستىقتى ودان ءارى نىعايتۋدىڭ مۇمكىندىگى زور. ەلارالىق ىنتىماقتاستىقتىڭ ناتيجەسىندە ساۋدا-ساتتىقتى جەتىلدىرە تۇسۋگە بولادى. ەكونوميكاعا ينۆەستيتسيا تارتۋعا قولبايلاۋ بولاتىنداي ماسەلە تۋىنداعان ەمەس. كوپجىلدىق بايلانىس ناتيجە بەردى. ەندى ترانزيت, كولىك جانە تۋريزم سالالارىنداعى قاتىناستاردى دامىتۋدىڭ كەلەشەگى بار», دەيدى د.ديۋشەكەەۆ.
ەلشىنىڭ ايتۋىنشا, قىرعىزستان تاراپىنان اتىراۋ وبلىسىمەن تاۋ-كەن جانە جەڭىل ونەركاسىپ, اۋىل شارۋاشىلىعى, تۋريزم سالالارىنا قىزىعۋشىلىق باسىم بولىپ وتىر. وسىعان وراي ايىر قالپاقتى كاسىپكەرلەر مۇنايلى وڭىردەگى ارىپتەستەرىمەن ىسكەرلىك بايلانىس ورناتقىسى كەلەدى. ىستىقكول جاعالاۋىنداعى توقىما ونەركاسىبىنىڭ وكىلدەرى دە قىزىعۋشىلىق تانىتىپ وتىر.
«قازاقستاننان جىل سايىن قىرعىزستانعا 1 ميلليوننان استام تۋريست ساياحاتتاۋعا, دەمالۋعا بارادى. كەيىنگى كەزدە قازاق ەلىنىڭ وڭتۇستىگىندەگى وبلىستارمەن ىنتىماقتاستىق جولعا قويىلدى. ەندى باتىس وڭىردەگى نارىققا قادام جاساعىمىز كەلەدى. ماسەلەن, ەكىجاقتى رەيستەردى اشۋ جوسپارى بار. جولاۋشىلار سانى 60 پايىزدان اساتىن بولسا, اۋە كومپانيالارى تىكەلەي رەيستەردى اشۋعا دايىن», دەيدى د.ديۋشەكەەۆ.
ونىڭ دەرەگىنشە, قىرعىزستاننان اۋىل شارۋاشىلىعى ونىمدەرىن اتىراۋ وبلىسىنىڭ نارىعىنا اكەلۋگە ىنتا تانىتىپ وتىرعاندار بار. وسىعان بايلانىستى جەرگىلىكتى تۇرعىندار ءجيى تۇتىناتىن ءارى الەۋمەتتىك ماڭىزى بار ازىق-ت ۇلىك جانە وزگە تاۋارلاردىڭ باعاسى زەردەلەنبەك. ارينە, لوگيستيكا سالاسىنداعى ازداعان تۇيتكىل وڭ شەشىمىن تاپسا, ەكى ەل ۇكىمەتىنە ۇسىنىس جاسالۋى مۇمكىن.
اتىراۋ وبلىسى
