قالا اكىمى مۇرات بورىباەۆپەن بىرگە مەموراندۋمعا «Stecol سorporation» جەتەكشىسى يانگ حونۆەي جانە «Siena» كومپانياسىنىڭ ديرەكتورى رۋسلان شاريپوۆ قول قويدى. اكىم قىزمەتىنە شىلدە ايىنىڭ باس كەزىندە تاعايىندالعان مۇرات بورىباەۆ قالا بيۋدجەتى نەبارى 11 ملرد تەڭگە ەكەنىن ايتىپ, قازىنانى تولتىرۋ باستى مىندەت دەگەن ەدى. جاڭا باسشىلىق ءىس ورايىن تاپقان سەكىلدى. تالاي جىل جىرعا اينالعان «جەزقازعان – قىزىلوردا» كولىك جولىنىڭ كۇردەلى جوندەۋى اقىرى باستالاتىن بولدى. 8 لوتقا بولىنگەن جۇمىستى قىتايلىق 4 كومپانيا جەڭىپ الدى. «Stecol سorporation» – سول 4 كومپانيانىڭ ءبىرى. ال «Siena» – قىتايدىڭ وسى كومپانياسىمەن بىرنەشە جىلدان بەرى سەرىكتەس بولىپ كەلە جاتقان وتاندىق كومپانيا.
جول سالۋعا قۇم دا, قيىرشىق تاس تا كەرەك. ءساتىن سالعاندا, ساتباەۆ قالاسىنىڭ اۋماعىندا وسىنىڭ ءبارى دە تابىلادى. قالا اكىمى دەرەۋ «Stecol سorporation» كومپانياسىنىڭ باسشىلىعىنا حابارلاسادى. «جول قۇرىلىسىنا قاجەتتى ماتەريالداردى بىزدەن الادى ەكەنسىزدەر, ەندەشە نەگە ەكىجاقتى ءتيىمدى جۇمىس ىستەمەسكە؟ سىزدەر ءبىزدىڭ قالاعا تىركەلىڭىزدەر, سالاتىن زاۋىتتارىڭىزعا ءتيىستى جەر ءبولىپ بەرۋگە ءازىرمىز» دەگەن اكىمنىڭ ۇسىنىسى كومپانيانىڭ دا كوڭىلىنەن شىعا كەلدى. ءسويتىپ, «Stecol سorporation» ءوزىنىڭ سەنىمدى سەرىكتەسى «Siena» كومپانياسىمەن بىرگە ساتباەۆ قالاسىنا كەلدى.
ء«بىزدىڭ تاراپىمىزدان قىتايلىق «Stecol سorporation» كومپانياسىنا قىزىعۋشىلىق تانىتۋىمىز بەكەر ەمەس. ويتكەنى بۇل كومپانيا – قىتاي ەلىندەگى اتاقتى «China Power» مەملەكەتتىك كورپوراتسياسىنىڭ ەنشىلەس قۇرىلىمى. كومپانيا ەلىمىزدە جۇمىس ىستەگەن ءۇش جىل ىشىندە ءوزىن سەنىمدى جانە جاۋاپتى سەرىكتەس رەتىندە كورسەتە ءبىلدى. ال «Siena» – وتاندىق قۇرىلىس نارىعىندا ورنى بار, الدىڭعى ساناتتى كومپانيا. ولار جول قۇرىلىسىنا قاجەتتى ماتەريالداردى جەتكىزۋمەن اينالىسادى. قوسالقى مەردىگەر رەتىندە جوندەۋ جۇمىستارىنا دا تىكەلەي ارالاسادى. سوندىقتان بىرىمەن-ءبىرى بايلانىستى قوس كومپانيانى بىرگە جۇمىس ىستەۋگە شاقىردىق. ۇسىنىسىمىزدى قابىل العانى ءۇشىن اتالعان كومپانيا باسشىلارىنا قالا حالقىنىڭ ريزاشىلىعىن جەتكىزگىم كەلەدى», دەيدى مۇرات بورىباەۆ.
كومپانيالاردىڭ قالاعا كەلىپ تىركەلۋى سالىق ءتۇسىمىن مولايتىپ قانا قويماي, جاڭا جۇمىس ورىندارىنىڭ اشىلۋىنا تۇرتكى بولادى. قانىش قالاسىنا كەلگەن قوس ينۆەستور قالادا اسفالت-بيتۋم زاۋىتىن تۇرعىزادى. مۇندا كەم دەگەندە جاڭا 30 جۇمىس ورنى اشىلادى. سونىمەن بىرگە سىيىمدىلىعى 0-15 مىڭ توننا بولاتىن بيتۋم قويماسىن سالادى.
«جول قۇرىلىسىنا جاقىن جەردەن زاۋىت پەن قويما سالۋ وتە پايدالى. بۇل ءوز كەزەگىندە تاسىمال شىعىندارىن ازايتادى. سونىمەن قاتار قۇرىلىستىڭ نەعۇرلىم جەدەل جۇرگىزىلۋىنە دە ىقپالىن تيگىزەدى. زاۋىتقا قاجەتتى شيكىزاتتاردى دا قولسوزىم جەردەن الامىز. ساتباەۆ قالاسى باسشىلىعىنىڭ ۇسىنىسىنا كوپ ويلانباستان كەلىسىم بەرگەنىمىز دە سوندىقتان», دەدى مەموراندۋمعا قول قويۋ سالتاناتى كەزىندە ءسوز العان ينۆەستورلار.
ءبىر سۇيسىنەرلىگى, ينۆەستورلار قالانىڭ الەۋمەتتىك-مادەني ومىرىنە, ينفراقۇرىلىمىنا, كەسكىن-كەلبەتىنە ءوز ۇلەستەرىن قوسۋعا نيەتتى. ايتالىق, كومپانيالار قالا كوشەلەرىنىڭ جولىن جوندەۋدەن وتكىزۋگە, دەمالىس ايماقتارىن جانە بالالار ويىن الاڭدارىن سالۋعا دا قاتىسىپ, قارجى قۇيۋدى كوزدەپ وتىر. ء«بىز وسىلايشا قالادا قولتاڭبامىزدى قالدىرعىمىز كەلەدى» دەيدى.
قوس بىردەي ينۆەستوردىڭ كەلۋى ساتباەۆ قالاسىنىڭ ەكونوميكاسىن دامىتۋعا ويداعىداي وڭ اسەرىن تيگىزەتىنى كۇمانسىز.
ۇلىتاۋ وبلىسى,
ساتباەۆ قالاسى
