ونىڭ ايتۋىنشا, تروپيكالىق ورمانداعى تىرشىلىك يەلەرىنە ەڭ الدىمەن تۇز جەتىسپەيدى. سەبەبى بۇل ايماقتاعى سۋدىڭ بارلىعى وتە تۇششى كەلەدى. جىرتقىشتاردىڭ جاراسى جەڭىل. ولار امينقىشقىلى مەن ءناتريدى ەتتەن الادى. ال شوپقورەكتىلەر مەن جاندىكتەر, ونىڭ ىشىنە كوبەلەكتەر دە كىرەدى, دارۋمەنىن قوسىمشا كوزدەردەن ىزدەيدى. جابايى تابيعاتتا بۇل قۇبىلىس ءجيى كەزدەسەدى. ايتالىق, توتىقۇستار سازدى جالايدى, مايمىلدار توپىراق جەيدى. ءبىر قىزىعى – امازونكا ورماندارىنان باسقا جەردە جانۋاردىڭ كوز جاسى ارقىلى مينەرال جەتىسپەۋشىلىگىن تولتىرۋ جوق. كوز جاسىنا ارالار دا قۇمار. بىراق ولاردىڭ ىزىڭى تاسباقانىڭ مازاسىن قاشىرادى. ال كوبەلەكتەر تاسباقالارعا ەش كەدەرگى كەلتىرمەيدى. ۇيلەسىم دەپ وسىنى ايت!
عارىشتاعى كەرەمەت
چيليدە ورنالاسقان دجەميني وبسەرۆاتورياسى ەكى گالاكتيكانىڭ جاناسۋىنان پايدا بولعان «عارىش كوبەلەگىن» سۋرەتكە ءتۇسىردى.
عارىش دەنەلەرىنىڭ ساقينالارى جاندىكتىڭ ەكى قاناتىن ەسكە سالادى. سول سەبەپتى قۇبىلىس وسىلاي اتالىپ كەتكەن. گالاكتيكالاردىڭ ءوزارا جاقىنداسۋى جاھان گالەرەياسىن ودان سايىن قانىقتىرا تۇسەدى. ماسەلەن, سونىڭ ناتيجەسىندە عارىشتا جاڭا جۇلدىزدار پايدا بولادى. ولار «عارىش كوبەلەگىنىڭ» «قاناتتارىنان» ورىن تابادى. ونىڭ جەردەن قاشىقتىعى 180 ملن جارىق جىلىن قۇرايدى.
رۋحاني كامەلەت
ادامزات كوبەلەككە قادىم زاماننان سۇلۋلىق پەن نازىكتىكتىڭ كوركەم بەينەسى رەتىندە كوز سۋارىپ كەلەدى. ونىڭ دەرناسىل بولىپ دۇنيەگە كەلىپ, جۇلدىزقۇرت بولىپ ەسەيىپ, اقىرىندا ەڭ اسەم گۇلدەردىڭ ەڭ ءتاتتى شىرىنىن تاتىپ, قاناتىمەن اسپاندا قالىقتاپ جۇرگەن قازىرگى قالپىنا جەتۋى – تابيعاتتىڭ تاڭعاجايىپ قۇبىلىسى.
ال عالىمدار مۇنى ادام جانىنىڭ جاڭا ساتىعا كوتەرىلىپ, كەمەلدەنۋىنىڭ رامىزدىك بەينەسى رەتىندە تۇسىندىرەدى. جۇلدىزقۇرت قاۋاشاق جاساپ, ءتانىن جاڭعىرتقانى سەكىلدى ادام جانىنىڭ جاڭعىرۋى دا كەڭىستىكتىڭ جاڭا ديدارىن كورسەتەدى.
ءيا, كوبەلەكتىڭ عۇمىرى قىسقا. بىراق ول وسى قالپىمەن-اق ادام بالاسىنا ءدال قازىرگى ءساتتىڭ وتە قىمبات جانە بار بولۋدىڭ قانداي باقىت ەكەنىن ۇيرەتەدى.
