ءدارى-دارمەكتى تسيفرلىق تاڭبالاۋدىڭ نەگىزگى سەبەبى – كونترافاكتىنىڭ ەتەك الۋى, دارىلىك زاتتاردىڭ ەلگە زاڭسىز تاسىمالدانۋى. مۇنداي جاعدايدىڭ كوپ بولۋى حالىقتىڭ دەنساۋلىعىنا تىكەلەي قاۋىپ توندىرەدى. سونداي-اق دارىلىك زاتتاردى تسيفرلىق تاڭبالاۋ ءاربىر ءدارىنىڭ قوزعالىسىن ونلاين باقىلاۋعا, سۇرانىستى باعالاۋعا جانە قاجەتتى رەزەرۆتەردى قالىپتاستىرۋعا مۇمكىندىك بەرەدى.
دارىلىك زاتتاردى تسيفرلىق تاڭبالاۋ جۇيەسى ءاربىر ءدارىنىڭ زاتتىڭ قاپتاماسىندا ءونىم تۇپنۇسقالىعىن تەكسەرۋگە بولاتىن بىرەگەي «data matrix» تسيفرلىق كودتارىن پايدالانۋدى كوزدەيدى. ونى سكانەرلەر, دەرەكتەردى جيناۋ تەرمينالدارى, POS-تەرمينالدار جانە تەلەفون كامەرالارى ارقىلى سكانەرلەۋگە بولادى.
– كاسىپورىنداردا تسيفرلىق تاڭبالاۋ كەزىندە ماسەلە تۋىنداسا, ءبىز تەحنيكالىق جاعىنان كومەك كورسەتۋگە دايىنبىز. بىردەن ايىپپۇل سالىپ, كاسىپكەرلەرگە قىسىم كورسەتپەيمىز. باسىندا ءتۇسىندىرۋ جۇمىستارى جۇرگىزىلەدى. ماسەلەن, ازاماتتار قولداناتىن ءدارى-دارمەكتىڭ 85 پايىزى ەلىمىزدە وندىرىلەدى. ياعني ءوندىرىس ورنىندا, تاۋاردى بىردەن تسيفرلىق تاڭبالاۋ قاجەت بولادى. جاڭا زاڭدى ەسكەرمەگەندەر جاۋاپكەرشىلىككە تارتىلادى, – دەيدى فارماتسەۆتيكالىق قىزمەتتى باقىلاۋ باسقارماسىنىڭ باسشىسى ەرىك قۇلشانوۆ.
دارىلىك زاتتاردى تاڭبالاۋ جانە قاداعالاۋ جۇيەسىندە جۇمىس ىستەۋ ءۇشىن ءدارىحانالار اقپاراتتىق جۇيەدە دارىلىك زاتتاردى قابىلداۋى قاجەت. ول ءۇشىن جەكە كومپيۋتەر, دەرەكتەردى جيناۋ تەرمينالى نەمەسە ۇيالى تەلەفون («iOS» نەمەسە «Android» نەگىزىندەگى سمارتفون) بولسا جەتكىلىكتى. كوپتەگەن قاداعالاۋ فۋنتسياسى دا بار. ودان باسقا تەگىن «Naqty Onim» قوسىمشاسى تۇتىنۋشىلارعا ءونىمنىڭ ءدارىحانا سورەلەرىنە دەيىن تولىق جولىن, ساتىپ الىنعان ءدارىنىڭ دەنساۋلىق ساقتاۋ مينيسترلىگى بەلگىلەگەن شەكتى رۇقسات ەتىلگەن باعاعا سايكەس كەلەتىنىن ايتىپ بەرەدى. ەگەر تاڭبالاۋ كودىن سكانەرلەگەننەن كەيىن ساتىپ الۋشى ءدارىنىڭ جارامدىلىق مەرزىمى ءوتىپ كەتكەنىن نەمەسە ءدارى-دارمەكتىڭ قۇنى رۇقسات ەتىلگەن باعاسىنان جوعارى ەكەنىن انىقتاسا, وندا ول شاعىمدى قوسىمشادا قالدىرا الادى.
