سۋرەتتى تۇسىرگەن – ەرلان ومار, «EQ»
ماسەلەن, «اۋىلدىق مەديتسينانى جاڭعىرتۋ» ۇلتتىق جوباسىمەن 15 اۋىلدىق ەلدى مەكەندە مەديتسينالىق مەكەمەلەردىڭ جاڭا عيماراتى پايدالانۋعا بەرىلەدى. ونىڭ ىشىندە 9 مەديتسينالىق, 5 فەلدشەرلىك-اكۋشەرلىك پۋنكت, 1 دارىگەرلىك امبۋلاتوريا بار. مۇنداي نىساندار قۇرمانعازى, قىزىلقوعا, يندەر جانە يساتاي اۋداندارىندا سالىنىپ جاتىر. 2027 جىلعا دەيىن 24 مەديتسينالىق نىسان سالۋ كوزدەلىپ وتىر.
«قازىر اتىراۋ وبلىسىندا 11 نىساننىڭ قۇرىلىسى ءجۇرىپ جاتىر. بۇل قازىرگى تالاپقا سايكەس كەلەدى. ماسەلەن, اتىراۋ قالاسىندا ءۇش قوسالقى ستانساسىمەن قوسا جەدەل جاردەم ستانساسى, ونكولوگيالىق ديسپانسەرى ءۇشىن جاڭا عيماراتپەن راديولوگيالىق كورپۋس, جۇلدىز شاعىن اۋدانى مەن امانگەلدى اۋىلىندا دارىگەرلىك امبۋلاتوريا, نۇرسايا جانە وركەن شاعىن اۋدانىندا ەمحانا سالىنىپ جاتىر. مۇنايلى شاھار ماڭىنداعى قايىرشاقتى اۋىلدىق وكرۋگىنە قارايتىن تالقايراڭ ەلدى مەكەنىندە دە ەمحانا عيماراتىن سالۋ كوزدەلدى. بۇعان تۇرعىندار سانىنىڭ ءوسۋى سەبەپ بولىپ وتىر. ال جىلىوي اۋدانىنىڭ قاراعاي, ماحامبەت اۋدانىنداعى اققايىڭ اۋىلىندا مەديتسينالىق پۋنكت, يساتاي اۋدانىندا فەلدشەرلىك-اكۋشەرلىك پۋنكت, قۇرمانعازى اۋدانىنىڭ سۇيىندىك, بالقۇدىق اۋىلدارىنان دارىگەرلىك امبۋلاتوريا قۇرىلىسى قولعا الىندى», دەيدى وبلىستىق دەنساۋلىق ساقتاۋ باسقارماسىنىڭ باسشىسى قايسار ابداليەۆ.
جاڭادان سالىنعان دارىگەرلىك امبۋلاتوريانىڭ ءبىرى مۇنايلى شاھارداعى جۇلدىز شاعىن اۋدانىندا اشىلدى. امبۋلاتوريانىڭ اقجەلەڭدىلەرى 13 مىڭنان اسا تۇرعىنعا مەديتسينالىق كومەك كورسەتەدى.
«بۇل دارىگەرلىك امبۋلاتوريادا زەرتحانا مەن كۇندىزگى ستاتسيونار بار. وسى كەزگە دەيىن مۇنداعى تۇرعىندار گەولوگ شاعىن اۋدانىنداعى ەمحاناعا قارالاتىن ەدى. ەندى ولار مەديتسينالىق كومەكتى جاڭا امبۋلاتوريادان الادى. بۇدان بىلاي گەولوگتەگى ەمحانانىڭ جۇمىسى جەڭىلدەپ, ناۋقاستاردى قابىلداۋ كەزەگى قىسقارادى. وسىلايشا, تۇرعىنداردىڭ ساپالى مەديتسينالىق كومەك الۋىنا جاعداي جاسالدى», دەيدى باسقارما باسشىسى.
دارىگەرلىك امبۋلاتوريادا 18 كابينەت بار. ونىڭ ىشىندە كۇندىزگى ەمحانا, ستوماتولوگيا, فيزيوتەراپيالىق ەمدەۋ بولمەلەرى زەرتحانالىق قۇرالدار مەن ءتىس ەمدەۋگە, وزگە دە مەديتسينالىق قىزمەتتى كورسەتۋگە ارنالعان اپپاراتتارمەن قامتىلعان. مۇندا 8 دارىگەر مەن ۋچاسكەلىك مەيىربيكەلەر, اكۋشەر-گينەكولوگ پەن ءتىس دارىگەرى جۇمىس ىستەيدى. امبۋلاتوريانىڭ اقجەلەڭدىلەرى 3 «Haval M6» ماركالى قىزمەتتىك كولىگىمەن ناۋقاستاردىڭ شاقىرتۋىنا جەدەل جەتەدى.
جاڭادان قولدانىسقا بەرىلەتىن وسىنداي نىسانداردا جۇمىس ىستەيتىن كادر ماسەلەسى قالاي شەشىمىن تابادى؟ وبلىستىق دەنساۋلىق ساقتاۋ باسقارماسى كادر جەتىسپەۋشىلىگىن بولدىرماس ءۇشىن بىرنەشە باعدارلاما ازىرلەپتى. ءبىرىنشىسى – بىرجولعى الەۋمەتتىك وتەماقى تولەۋ, ەكىنشىسى – قىزمەتتىك پاتەر بەرۋ. بۇعان قىزىعۋشىلىق تانىتقان 150-گە جۋىق مامان وزگە وڭىرلەردەن كەلۋى مۇمكىن. وسىعان بايلانىستى بيىل 100-دەن اسا مەديتسينا قىزمەتكەرىنە الەۋمەتتىك كومەك كورسەتۋ جوسپارلانىپ وتىر.
«اتىراۋ وبلىسىندا وتكەن جىلدان بەرى وزگە وڭىرلەردەن كەلگەن تاجىريبەلى جانە جاس ماماندارعا بىرجولعى الەۋمەتتىك وتەماقى مەن قىزمەتتىك پاتەر بەرۋ باعدارلاماسى ىسكە اسىرىلىپ جاتىر. بىلتىر وڭىردە 103 مەديتسينا مامانى الەۋمەتتىك كومەك الدى. مامانداردىڭ 40-قا جۋىعى اۋداندىق, اۋىلدىق مەكەمەلەرگە جۇمىسقا ورنالاستى. اۋىلعا جۇمىسقا بارعان ماماندارعا 5 ملن تەڭگە, ال اتىراۋ قالاسىنداعى مەديتسينا مەكەمەلەرىنە قىزمەتكە ورنالاسقاندارعا 3 ملن تەڭگە كومەك بەرىلدى», دەيدى ق.ابداليەۆ.
ونىڭ ايتۋىنا قاراعاندا, بيىل اتالعان جوباعا وزگەرىس ەنگىزىلەدى. ماسەلەن, وتەماقىنىڭ مولشەرى ارتادى. ەندى اتىراۋ قالاسىندا جۇمىس ىستەۋدى قالاعان ماماندار الەۋمەتتىك وتەماقى رەتىندە 5 ملن تەڭگەنى يەلەندى. ال اۋدانداردىڭ ورتالىعىنا جۇمىسقا بارعان مەديتسينا قىزمەتكەرلەرىنە بەرىلەتىن وتەماقى 7 ملن تەڭگەنى قۇرايدى. اۋىلدارداعى تۇرعىنداردىڭ دەنساۋلىعىن جاقسارتۋعا ۇلەس قوسقىسى كەلەتىن دارىگەرلەر ءۇشىن وتەماقى 10 ملن تەڭگەگە جەتەدى.
«بۇل ۇسىنىستى وبلىستىق ءماسليحات قاراۋىنا ۇسىندىق. سالا قىزمەتكەرلەرىنىڭ تۇرعىن ءۇي جاعدايىن جاقسارتۋ ءۇشىن «وتباسى بانكپەن» بىرلەسكەن جوبامىز بار. جوباعا سايكەس مەديتسينا ماماندارى باستاپقى جارناسىن تولەمەي 20 جىلعا باسپانا ساتىپ الۋىنا بولادى. ۇستەمە مولشەرى – 5 پايىز. وسىنداي قولداۋ كورسەتىلەتىن اتىراۋ وبلىسىنداعى كادر ماسەلەسىن وڭ شەشۋ ءۇشىن مەديتسينالىق جوعارى وقۋ ورىندارىمەن تىعىز بايلانىس ورناتىپ, جاس دارىگەرلەردى شاقىرىپ وتىرمىز», دەدى ق.ابداليەۆ.
اتىراۋعا كەلگەن جاس ماماننىڭ ءبىرى – اكۋشەر-گينەكولوگ گۇلفارا كوكتەنوۆا بىلتىر قازاندا وبلىستىق پەريناتالدىق ورتالىققا جۇمىسقا ورنالاسىپتى. جەلتوقسان ايىندا الەۋمەتتىك وتەماقىنى قولىنا العان.
«رەسەيدىڭ استراحان قالاسىنان مەديتسينا ۋنيۆەرسيتەتىندە وقىپ, اكۋشەر-گينەكولوگ ماماندىعىن قازان قالاسىنداعى جوعارى وقۋ ورنىنان الىپ شىقتىم. جەرگىلىكتى اكىمدىك پەن دەنساۋلىق ساقتاۋ باسقارماسى تاراپىنان مەديتسينا ماماندارىنا كوپ قولداۋ كورسەتىلىپ جاتىر. ءوزىم جۇمىسقا ورنالاسقاننان كەيىن كوپ كەشىكپەي 3 ملن تەڭگە وتەماقى الدىم. قازىر ءبىزدىڭ پەريناتالدىق ورتالىقتا بىلىكتى ماماندار كوپ. تاجىريبەلى ارىپتەستەرىممەن بىرلەسە جۇمىس ىستەپ, بىلىكتىلىگىمدى ارتتىرىپ ءجۇرمىن», دەدى گ.كوكتەنوۆا.
اتىراۋ وبلىسى
