...قىس ايى. ورامال تارتقان ايەل تۇندەلەتىپ دۇكەنگە شىعادى. ۇيىنە قايتار جولدا «تەمىر باعانعا ءتىلىم جابىسىپ قالدى» دەپ كۇيەۋىنە بەينەقوڭىراۋ سوعادى. ال شىن مانىندە باعانعا ادامنىڭ شىن تىلىنەن اينىمايتىن ويىنشىق ءتىلدى الدىن الا جابىستىرىپ قويادى. جانۇشىرا جۇگىرىپ كەلگەن بايعۇس كۇيەۋى نە ىستەرىن بىلمەي ساسقالاقتايدى. بىرەسە جەدەل جاردەمگە قوڭىراۋ شالادى, بىرەسە دۇكەننەن جىلى سۋ ساتىپ الىپ, «جابىسقان تىلگە» قۇيادى, ەندى بىردە YouTube-تەن «تەمىرگە جابىسىپ قالعان ءتىلدى قالاي اجىراتۋعا بولادى؟» دەگەن سۇراققا جاۋاپ ىزدەي باستايدى. كوشەدە كەتىپ بارا جاتقان كەزدەيسوق ادامدار دا كومەككە ۇمتىلادى. ەڭ سوراقىسى, ەلدىڭ ءبارىن شىنداپ ابىگەرگە سالعان ايەل ءبىر كەزدە ارتقا شەگىنىپ قالىپ, «جابىسقان ءتىلى» سول باعاندا قالىپ قويادى. مۇنى كورگەن كۇيەۋى جىلارمان بولىپ, باسىن ۇستاعان كۇيى سىلەيىپ تۇرىپ قالادى. قارق-قارق كۇلگەن ايەلى: «بۇل پرانك قوي! ءوتتى مە؟» دەپ, الدىن الا جوسپارلاعان ازىلسىماعىنىڭ ء«ساتتى» بولعانىنا ريزا...
كەلىنشەگىن وتىرىك ۇرىپ جىبەرىپ, شەشەسىنىڭ رەاكتسياسىن ءتۇسىرىپ الۋ, كۇيەۋىن الداپ, اتا-ەنەسىنە ەرسى قالجىڭ كورسەتۋ, ءتىپتى جاسى جەتپىسكە تاياپ قالعان اكەسىن ۇدايى مازاق ەتىپ, لايك جيناپ, حايپ قۋىپ جۇرگەن مۇنداي ەسەرسوقتار الەۋمەتتىك جەلىدە جەتىپ ارتىلادى. ءمانى بار ءازىل, جاراسىمدى قالجىڭ بولسا, ءبىر ءسارى. كۇندە جاڭارىپ وتىراتىن مۇنداي ءپاتۋاسىز پرانكتەردىڭ سيۋجەتى دە سان الۋان, ستسەناريى دە ءتۇرلى-ءتۇرلى. جەلىككەن جاستاردىڭ اۋمەسەرلىگى عوي دەيىن دەسەڭ, وسىنداي ەسسىز ءازىل مەن قيسىنسىز قالجىڭ ءتۇسىرۋدى ەرمەككە اينالدىرىپ العان ۇل-قىز ءوسىرىپ, ءبىر ءۇيدىڭ وتىن جاعىپ وتىرعان ەرەسەكتەر دە, جۇرتقا تانىمال «جۇلدىزدار» دا بار.
وكىنىشتىسى, الەۋمەتتىك جەلىنى جاۋلاپ العان ورىنسىز وسپاق, ءمان-ماعىناسىز پرانك پەن داراقى كۇلكى وتباسى قۇندىلىعىن دارىپتەپ, جاستارعا جاڭاشىلدىقتى, جاقسىلىقتى ۇيرەتىپ جاتقان جوق. كەرىسىنشە كەلىننىڭ كەلەڭسىز قىلىعى مەن ۇل-قىزدىڭ داراقىلىعىن, ۇلكەندەرگە مۇلدە جاراسپايتىن جاساندى اكتەرلىكتى كورسەتىپ ءجۇر. الدانعان مەن اقىماق بولىپ كورىنگەن ادامنىڭ شىنايى ەموتسياسىن, بەت-ءجۇزىن كورۋ بازبىرەۋلەرگە راسىمەن دە كۇلكىلى بولار. بىراق تىم تۇرپايى قالجىڭ مەن وسپادار وسپاقتىڭ ءبارى ەزۋگە كۇلكى ۇيىرمەيدى, كەرىسىنشە جيىركەنىش تۋدىرادى.
قازىر ەڭبەكتەگەن بالادان ەڭكەيگەن كارىگە دەيىن الەۋمەتتىك جەلىدە وتىرادى. اسىرەسە جانى جاڭالىققا قۇشتار جاستار جاعىنىڭ كورگەن-باققانى – وسىنداي ءمانسىز-ماعىناسىز دۇنيەلەر. الەم جۇرتى جاپپاي ۇرپاعىنا ءبىلىم مەن عىلىمدى, وي مەن جاساندى ينتەللەكتىنىڭ يگىلىگىن ناسيحاتتاپ جاتسا, ءبىزدىڭ باققانىمىز, وكىنىشكە قاراي, ارزان ويىن-كۇلكى, توي-تومالاق پەن قىزىق-دۋمان بولىپ بارا جاتىر. جان-جاعىن باعامداپ ۇلگەرمەگەن جاس بۋىن قازىر كوبىنە ايتقان اقىل-كەڭەسىڭدى ەمەس, ينتەرنەتتەن كورگەن-بىلگەنىنەن «ۇلگى» الۋعا كوشكەن. ال TikTok تولى تەكسىز بەينە, Instagram الەمى بەيادەپ ۆيدەونىڭ الەم-جالەم الاڭىنا اينالعالى قاشان. جاسى دا, جاسامىسى دا تاڭنان كەشكە دەيىن جابىسىپ وتىرعان الەۋمەتتىك جەلى بۇرىن بوقتىققا تولى بولسا, قازىر ادەپسىز, دورەكى پرانكتەردەن كوز اشا المايسىز. سونداي جاستارعا كورسەتكەن «ۇلگىمىز» جوعارىدا ايتقانداي «الداۋ وپەراتسيالارى» بولسا, الدا ءالى قانشاما كوڭىلسىز كورىنىستىڭ كۋاسى بولۋىمىز مۇمكىن؟
ينتەرنەت الەمى دامىعان سايىن پرانك تا تانىمالدىلىقتى ارتتىرۋدىڭ, اۋديتوريا جيناۋدىڭ ەرەكشە فورماسىنا اينالدى. بىراق ورىنسىز ءازىلدىڭ اقىرى وكىنىشپەن اياقتالىپ, ويىنى وسىلعاندار دا بار. پرانك تۇسىرەمىن دەپ ءىستى بولىپ, باسى داۋعا قالعاندار, ءتىپتى اقش-تا اجال قۇشقان بلوگەرلەردىڭ ءولىمى وسىعان دالەل بولا الادى. وينايمىن دەپ وڭباي تاياق جەگەن وتاندىق بلوگەرلەرىمىز دە از ەمەس.
بەيتانىس ادامداردى بىلاي قويعاندا, ەت جاقىندارىن, وتباسى مۇشەلەرىن وسپادار ويىندارىنىڭ «باستى كەيىپكەرىنە» اينالدىرۋدىڭ سالدارى اۋىر بولارى انىق. ويتكەنى ورىنسىز ازىلگە ەرىكسىز كۇلە سالىپ, سول جەردە ۇمىتىپ كەتۋىمىز دە مۇمكىن. الايدا ەرسى قالجىڭ مەن سولەكەت ءازىل-وسپاق سالىپ كەتكەن سىزات تەز ۇمىتىلىپ, ۇلكەن اقپارات ورىسىندە ءىز-ءتۇزسىز جوق بولىپ كەتەدى دەۋ – اقىماقتىق. بىراق پارىقسىز پرانك ءتۇسىرىپ جۇرگەندەردىڭ دەنى كەيىن نە بولاتىنى تۋرالى ويلانا بەرمەيدى-اۋ وسى. سەبەبى ولارعا ءدال قازىر ميلليونداپ قارالىم جيناۋ عانا ماڭىزدى.
