ءيا, كينونى كورىپ بولىپ, رەجيسسەرمەن سويلەسكەنشە ءبارى جاقسى بولدى. فيلمنەن كەيىنگى تۋلاعان ويدى ايتۋعا, سانداعان سۇراقتى قويۋعا اسىعىپ, رەجيسسەرمەن سونداي ءبىر شىنايى شىعارماشىل اڭگىمەگە وقتالعانىم سول ەدى... كەنەت... كەنەت ءبىز كۇتكەن شىنايىلىق بىرتىندەپ شىتىناي باستادى.
ەڭ الدىمەن, ورىسشا جاۋاپ بەرسەم دەدى. وسى تۇستا ىشتەگى بۋىرقانعان تولقىن ءسال كىدىردى. بىراق كينووندىرىستەگى مامانداردىڭ, جالپى بۇگىنگى قوعامدا انا ءتىلىن بىلمەيتىن زامانداستارىمىزدىڭ كوپ ەكەنى قالىپتى جاعدايعا اينالعان جوق پا؟ بۇعان نەگە ىركىلەمىن؟ «باستىسى, ۇلت مادەنيەتىنىڭ دامۋىنا ۇلەس قوسىپ جاتىر» دەپ كىدىرگەن ويىمدى جۇباتقانداي بولىپ, كەلەسى سۇراعىمدى قويدىم. نانىمدى جاۋاپ جوق. كينونىڭ كوتەرگەن الەۋمەتتىك تاقىرىبىنان قوعامنىڭ بەينەسىن ىزدەگەن مەن ءسوزدى سولاي قاراي بۇردىم. وسى تۇستا اقتارىلار دەدىم. ءتىپتى ايتار جاۋابىن دا ويشا ەلەستەتىپ, تەبىرەنە تىڭداۋعا دايىن تۇرمىن. تاعى دا سۋدا جۇزگەن بالىقتاي قولىمنان سۋسىپ شىعا بەردى. كينوكارتيناعا سەبەپ بولعان ەشقانداي ءبىر وقيعا, ياكي ءبىر وي, بۋىرقانۋ, تاعدىر جوق ەكەن. بارلىق سيۋجەت ءوز قيالىندا عانا دامىپ, ەشقانداي الەۋمەتتىك ماقساتسىز از عانا ۋاقىتتا دۇنيەگە كەلگەن. از عانا ۋاقىتتا تۇسىرىلگەن. «بۇگىنگى قازاق كينوسىنا قانداي باعا بەرەسىز؟ قاي دەڭگەيدە؟ نە كەرەك؟ نە جەتپەيدى؟» دەدىم ءبىر ساتتە ەندى قايتەر ەكەن دەپ. سىپايى جىميدى. بۇل تۋرالى ەشتەڭە ايتا المايتىنىن ايتتى. ەشتەڭەنى بايقامايدى, ەشكىمدى ماقتامايدى, ەشكىمدى جاماندامايدى, جالپى, جان-جاعىنا, قوعامعا, ءوز سالاسىنا باعامداپ قارامايتىن, ەشتەڭەدە شارۋاسى جوق كىسىنىڭ كەيپى... ءتىپتى جاڭا كينوسىنىڭ پروكاتىنان دا ءۇمىتى جوق. «مۇنداي فيلمدەر كاسسا جينامايدى», دەدى كەسىپ. ءيا, ول ءوزى ايتقانداي, كينونى حالىق ءۇشىن نەمەسە قانداي دا ءبىر ماقساتتا, ءبىر ماسەلەنى كوتەرۋ ءۇشىن, ۇلتتىق ونەردى دامىتايىن دەپ تۇسىرمەيدى ەكەن. تەك ءوزى ءۇشىن, قيالىن تاسپاعا ءتۇسىرۋ ءۇشىن...
قانداي دا ءبىر تراگەديالىق جاۋاپ كۇتكەن مەنىڭ ەڭسەم شىنداپ تۇسەيىن دەدى. العاشقىداي كوزىمدە وت جوق, فيلمنەن كەيىنگى اسەر دە سۋىعان. ونەرگە, ەستەتيكالىق تالعامعا, كلاسسيكاعا دەگەن قۇشتارلىعىم دا سانامنىڭ ءبىر بۇرىشىندا تىعىلىپ قالدى. ەندى ءتاۋىر وي ايتىلماس دەپ اڭگىمەنىڭ سوڭى جاتتاندى سۇراقتارعا اۋدى. ول دا جاتتاندى جاۋاپ بەردى. مەن كۇتكەن شىنايىلىق جوق. سونداي ءاتۇستى, سالعىرت, بۇلعاقتاعان جاۋاپتار. ءوزى ءتىپتى ءارتىس پە دەرسىڭ. بەرگى جاعى سونداي سىپايى. ال ارعى جاعىندا ۇلت مادەنيەتى دەگەن ۇعىم مۇلدە جوق سياقتى...
كوپكە بەلگىلى كەيىنگى ۋاقىتتا مەملەكەتتىڭ قولداۋىمەن كوپتەگەن جاڭا فيلم جارىققا شىعىپ جاتىر. ءبىر فيلمگە بولىنەتىن قارجى از ەمەس. ال ول قارجى, ارينە, ەڭ الدىمەن, ۇلتتىق كينونى دامىتۋ, قازاق مادەنيەتىن ىلگەرىلەتۋ ماقساتىندا بەرىلەدى. جۇرەككە سالماق تۇسىرەر سۇراق: جىلدا شىعىپ جاتقان ونداعان فيلم مەملەكەتتىك بيۋدجەتتەن بولىنگەن قارجىنى اقتاپ جاتىر ما؟ بۇل كينولاردىڭ بەرەرى نە؟ ۇلتتىق ماسەلەنى قاۋزاي ما؟ ۇلتتىق قۇندىلىقتى كوزدەي مە؟ «تەك ءوز قالاۋى مەن قيالى ءۇشىن تۇسىرەتىن» مەنىڭ رەجيسسەرىمنىڭ تۋىندىلارى قازاققا قانشالىقتى جاقىن؟
ارينە, ءوز قارجىسىنا قالاعانىن ءتۇسىرىپ, حالىققا ۇسىنۋ بۇل ءبىر بولەك. ال مەملەكەتتىڭ قازىناسىنان بولىنگەن قاراجاتقا تەك ۇلتتىق ماقساتتى كوزدەيتىن كوركەم دۇنيەلەر جاسالسا كەرەك-ءتى. القيسسا.
بۇل مەنىڭ ازدى-كوپتى جۋرناليستىك جولىمداعى ەڭ ءساتسىز سۇحبات بولدى. دەسە دە وسى ءساتسىز سۇحباتىمداعى ءساتتى سۇراعىم «گازەت وقىمايتىن شىعارسىز؟» دەگەنىم ەكەن. ول دا ەش ابىرجىماي, ءاۋ باستان بەرگى مەن كۇتكەن ءسوزدى ايتتى. ءوزى قازاقشا سويلەمەيتىن ادام, ارينە, گازەت وقىمايدى. مەن دە قىزىقپىن...
