فوتو: تۋريزم جانە سپورت مينيسترلىگى
بەينەبايان شارىن شاتقالى, كولساي كولدەرى, اقمەشىت ۇڭگىرى, ازىرەت-سۇلتان قورىق-مۋزەيى, سونداي-اق بوزجىرا شاتقالى, تورىش القابى جانە تاعى دا باسقا ەلىمىزدەگى تانىمال تۋريستىك ورىنداردا تۇسىرىلگەن. سونداي-اق تۋريزم جانە سپورت مينيسترلىگى جاڭا تۋىندىدا بۋراباي, قاتونقاراعاي, التىن-ەمەل, جوڭعار-الاتاۋى مەملەكەتتىك ۇلتتىق پاركتەرىنىڭ كەرەمەت كورىنىستەرى كورسەتىلەتىنىن حابارلادى.
«بۇل جوبا قازاقستاننىڭ بىرەگەي سۇلۋلىعىنا نازار اۋدارتىپ قانا قويماي, كورەرمەندەرگە ونەر تۋىندىسى ارقىلى ەلىمىزدى جاڭا قىرىنان كورسەتۋگە جول اشادى. بەينەبايان ارقىلى كورەرمەندەر قازاقستاندى مادەني مۇراسى باي, قايتالانباس تابيعاتى بار ەرەكشە مەكەن رەتىندە تانيدى دەپ ۇمىتتەنەمىز», دەدى تۋريزم جانە سپورت ۆيتسە-ءمينيسترى ەرجان ەركىنباەۆ.
جوبا ديماش قۇدايبەرگەننىڭ جانكۇيەرلەرىن ەلىمىزدىڭ تابيعي جانە مادەني مۇراسىمەن تانىستىرۋعا, سول ارقىلى قازاقستاننىڭ ءتۋريزمىن دامىتۋعا مۇمكىندىك بەرەدى.
«ديماش – قازاقستان ءتۋريزمىنىڭ ەلشىسى اتانۋعا لايىقتى تۇلعا. كوپتەگەن ادام قازاقستاندى ديماش ارقىلى تانيدى», دەپ جازدى ءانشىنىڭ قىتايداعى فانكلۋبى.
ايتا كەتەيىك, جوبا اياسىندا تىڭدارماندارعا قازاقستاننىڭ تابيعي جانە مادەني قازىنالارىنا ارنالعان جاڭا مۋزىكالىق كومپوزيتسيا دا ۇسىنىلادى.
