Powerful nomad. كۇشتىلەردىڭ سايىسى دا دۇنيەجۇزىلىك دودانىڭ باعدارلاماسىنا ەنگەن بۇل سپورت تۇرىنەن ءار ەلدەن ءبىر سپورتشى, ءبىر باپكەر, ءبىر تورەشى جانە ءبىر كوماندا جەتەكشىسى قاتىسادى. تولاعايلاردىڭ تارتىسىنا قاتىساتىن بالۋانداردىڭ جاسى 18-دەن اسۋى مىندەتتى جانە سالماعى 90 كيلودان جوعارى بولۋعا ءتيىس. دۇنيەجۇزىلىك كوشپەلىلەر ويىندارىندا كۇشتىلەردىڭ سايىسىنا قاتىساتىن الىپتار الدىمەن 100 كگ تارتاتىن تاستى 10 مەترگە دەيىن كوتەرىپ ءوتۋى كەرەك. سودان كەيىن 100 كگ قاپتى يىعىنا ارتىپ وتىرىپ تۇرۋعا ءتيىس. 10 كگ سالماعى بار نايزانى ءبىر قولىمەن قاشىقتىققا لاقتىرىپ كۇشىن سىنايدى. ودان كەيىن 130 كگ تارتاتىن جۋان بورەنەنى كوتەرىپ وتىرىپ تۇرادى. 200 كگ جۇك تيەلگەن اربانى قاشىقتىققا سۇيرەپ تە قايراتىن كورسەتەدى.
ەتنوسپورت ويىندارىنىڭ باعدارلاماسىنا العاش رەت ەنگىزىلگەن سايىستىڭ ماقساتى – ەل ىشىندەگى اتان جىلىك, ءاپايتوس ەرلەردىڭ ەرەن كۇشىن ناسيحاتتاۋ, تالانتتاردى حالىققا تانىستىرۋ. «تولاعاي» الىپتار سايىسىنىڭ نەگىزىن قالاۋشى تەمىر سپاتاەۆ ەتنوسپورت الامانىندا وراسان كۇشتىڭ يەلەرى دە ءوز ونەرلەرىن پاش ەتىپ قانا قويماي, بابالارىمىزدىڭ رۋحىن دا ايگىلەيتىنىن ايتادى.
«كەشەگى قاجىمۇقان, 815 كگ تارتاتىن تاستى كوتەرگەن بالۋان شولاقتاي الىپتاردىڭ بۇگىنگى ءىزىن جالعار ءىزباسار ۇرپاعىنىڭ بار ەكەنىن پاش ەتكىمىز كەلەدى. دۇنيەجۇزىلىك كوشپەلىلەر ويىندارىندا تولاعايلار اربانى قۇم ۇستىندە سۇيرەيدى, كىسىنىڭ قۇلاشى ازەر جەتەتىن جۋان بورەنەنى يىعىنا سالىپ, ۋاقىتقا جارىسادى. ەتىگىمەن سۋ كەشىپ, ەر ۇستىندە كىرپىك ىلمەي, ەلىمىزدىڭ تىنىشتىعىن, جەرىمىزدىڭ بۇتىندىگىن كۇزەتكەن باتىر بابالارىمىزدىڭ رۋحىن ايگىلەۋ ماقساتىندا نايزا لاقتىرۋ سىنىن دا سايىس باعدارلاماسىنا قوستىق. سالماعى 10 كيلو تارتاتىن نايزانى قۇلاشتاي الىسقا سەرمەۋ دە وراسان كۇشتى تالاپ ەتەدى. استانا قالاسىندا وتەتىن سايىسقا بىرنەشە ەلدەن سپورتشىلار قاتىسىپ, وزدەرىنىڭ بويىنداعى سامداعايلىعىن كورسەتەدى. ەلىمىزدەن قاتىساتىن بالۋانداردى ىرىكتەۋ بىرنەشە كەزەڭ بويىنشا ءوتىپ, كىل مىقتىنىڭ اراسىنان شىن مىقتىلار سۋىرىلىپ شىقتى. ەندى ولار كوشپەلىلەر ويىندارىندا ەل اتىنان دوداعا تۇسەدى», دەدى ت.سپاتاەۆ.
كۇشتىلەردىڭ الامانى «قازانات» اتشابارىنىڭ ماڭىنان بوي كوتەرەتىن «كوشپەلىلەر عالامى» ەتنواۋلىندا 11 قىركۇيەكتە وتەدى. ءدۇبىرلى دوداعا يسپانيا, قىتاي, ومان, بەلارۋس, ارمەنيا, پاكىستان, ءۇندىستان, تاجىكستان, قىرعىزستان, كۋۆەيت, رەسەي, وزبەكستان ەلدەرىنەن سپورتشىلار قاتىسپاق.
