تۇركىستاندىق ارحەولوگتار تاريحي نىساندى تاپتى. بۇل تاس عيباداتحانا بىرنەشە بولمە مەن دالىزدەن تۇرادى. كونە جادىگەر كانگيۋي داۋىرىنە جاتادى دەيدى ماماندار. سول كەزەڭدەگى ادامدار مۇندا قۇرباندىق شالعان كورىنەدى. عيباداتحانادان كەراميكالىق توستاعاندار, تەمەكى تارتقىشتار, ديىرمەن تاستارى مەن استىق ۇككىشتەر تابىلعان. شوشاقتوبە عيباداتحاناسى-عالىمدار ءۇشىن ۇلكەن قازىنا بولىپ وتىر.
پروفەسسور الەكساندر پودۋشكيننىڭ ايتۋىنشا, عيباداتحانا كانگيۋي مەملەكەتىنىڭ سەنىمدەرى مەن راسىمدەرى تۋرالى تۇسىنىك بەرەدى. مۇنداعى كەيبىر جادىگەرلەردە كەسىرتكەلەردىڭ, قوشقارلاردىڭ, ءتىپتى ازيالىق مۇيىزتۇمسىققا ۇقساس جانۋارلاردىڭ كەسكىنى بەينەلەنگەن. سونداي اق, عيباداتحانا ماڭايىنان مىڭداعان قىش ىدىس تابىلعان.
ء«بىز مۇندا ەجەلگى جادىگەرلەردى زەرتتەپ جاتىرمىز. ازىرگە مۇندا قانداي راسىمدەر ورىندالعانى تۇسىنىكسىز, دەگەنمەن ەگىنشىلىك اتريبۋتتارى جويىلعان كەزدە ءبارىن انىقتايمىز. مۇندا كوپتەگەن قۇندى زاتتار بار. مەنىڭ ويىمشا مۇنىڭ بارلىعى ەجەلگى داستۇرمەن بايلانىستى», دەدى و.جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنىڭ پروفەسسورى الەكساندر پودۋشكين.
عيباداتحانانىڭ جانىنان بىرنەشە قورىم دا تابىلعان. مۇندا وتباسى مۇشەلەرى مەن ولارعا تيەسىلى بولعان اشەكەيلەر, جانە اس ءۇي ىدىستارى جەرلەنگەن. بۇل — ادامدار عاسىرلار بويى ءومىر ءسۇرىپ, قۇدايلارىنا دۇعا ەتكەن ءبىرتۇتاس كەشەن بولعان دەيدى ارحەولوگتار.
«بۇل جەرلەۋ ورىندارى سول زاماننىڭ وزىندە كوپ تونالعان. ءبىر ەمەس بىرنەشە رەت تونالعان. تونالعان كەزدە سۇيەكتەردى جان-جاقا شاشىلادى. دەگەنمەن كەي بۇيىمدار قالىپ قويادى. كورىپ تۇرعاندارىڭىزداي بۇل — اليباستر. سول كەزدەگى ادامداردا قولدانعان زاتتاردى و دۇنيەگە بارعاندا قولدانادى دەگەن سەنىم بولعان. جانە بىرگە قويىپ جەرلەيتىن بولعان», - دەيدى ارحەولوگ گۇلميرا ستامقۇلوۆا.
ارحەولوگتاردىڭ ايتۋىنشا, بۇل اۋماقتاعى زەرتتەۋ جۇمىستارى بىرنەشە جىلعا سوزىلادى. ال كانگيۋي مەملەكەتى كەزەڭىنىڭ ارتەفاكتىلەرى, اسىرەسە عيباداتحانا كەشەنى مەن جەرلەۋ ورىندارى سياقتى نىساندار – قازاقستاندىق عىلىم ءۇشىن ۇلكەن جەتىستىك. تابىلعان بارلىق جادىگەر رەسپۋبليكالىق ورتالىق مەملەكەتتىك مۇراجايىنا بەرىلەدى.
