فوتو: bluescreen.kz
مۇندا ادەپتىلىك, ادالدىق, جاۋاپكەرشىلىك, سەنىم, تولەرانتتىلىق, پاراساتتى باسەكەلەستىك, ستارتاپتار قىزمەتىنە ينۆەستورلاردىڭ ارالاسپاۋى, ستارتاپ مۇددەلەرىن قورعاۋ, زاڭدىلىق, سىبايلاس جەمقورلىققا توزبەۋشىلىك جانە قوعامدىق تاراپ باسىمدىعى سياقتى قاعيداتتار باياندالعان.
– ۆەنچۋرلىق كودەكستى قۇرۋ يدەياسى ويىمىزدا اۋەلدەن بولدى. امەريكا نارىعىندا ستارتاپتاردىڭ ينۆەستورلار مەن جۇرتشىلىقتى اداستىرعان جاعدايلار ورىن العان ەدى. وسىلايشا, بۇكىل ۆەنچۋرلىق نارىقتىڭ بەدەلىنە نۇقسان كەلدى. ەلىمىزدە مۇنداي جاعدايدىڭ الدىن الۋ ماقساتىندا وسى كودەكستى قۇرۋدى ۇيعاردىق. ول – ەرىكتى, ءتارتىپ سانكتسيالارى جانە زاڭدى كۇشى جوق. بىراق مۇنداعى ادالدىق, ادەپتىلىك, اشىقتىق جانە تولەرانتتىلىق نورمالارىن ساقتاۋعا قول قويىپ, جاريا مىندەتتەمە الۋ ايتارلىقتاي سەرپىن بەرەدى, – دەدى Activat VC باس ديرەكتورى مارات تولىباەۆ.
اتالعان ادەپ كودەكسىنە يندۋستريا وكىلدەرى سالتاناتتى تۇردە قول قويدى. ولاردىڭ قاتارىندا: «Astana Hub», «BGlobal VC», «MOST Ventures», «MyVentures», «Tumar Venture Fund», «Activat VC», «BigSky Capital», «BYB Capital», «InDrive NewVentures», سونداي-اق «EasyTap», «ApartX», «Garderob», «Porte», «Smartestprep», «GoDays», «Billz» ستارتاپتارى جانە باسقالارى بار.
– كودەكس ەلىمىزدە ەتيكالىق جانە اشىق ۆەنچۋر نارىعىن قۇرۋ جولىنداعى ماڭىزدى قادام بولماق. وسى نورمالاردى ساقتاپ, IT-كاسىپكەرلىكتى دامىتۋ جانە جاڭا ينۆەستيتسيالار تارتۋ ءۇشىن قولايلى جاعدايلار جاساي الامىز. نارىقتىڭ بارلىق قاتىسۋشىسى كودەكسكە قول قويىپ, ونىڭ قاعيداتتارىن ۇستانادى دەپ ۇمىتتەنەمىز, – دەدى «Astana Hub» باسقارۋشى ديرەكتورى تاڭات وسكەمباەۆ.
قول قويۋشىلار پىكىرىنشە, ادەپ كودەكسىنىڭ نورمالارىن ۇستانۋ قازاقستان ۆەنچۋرلىق نارىعىندا ءوزارا سەنىم, ىزگى نيەت پەن ىنتىماقتاستىقتى قالىپتاستىرۋعا ىقپال ەتەدى. وسىلايشا, يندۋسترياعا دا, ونىڭ جەكەلەگەن قاتىسۋشىلارىنا دا تەرىس اسەر ەتۋى مۇمكىن جاعدايلاردىڭ الدىن الۋعا سۇبەلى ۇلەس قوسادى.
