سۋرەتتى تۇسىرگەن – ەرلان التىباەۆ
وبلىستىق دەنە شىنىقتىرۋ, سپورت جانە تۋريزم باسقارماسى ءتۋريزمدى دامىتۋ ءبولىمى باسشىسىنىڭ مىندەتىن اتقارۋشى جاننات سابىرعاليەۆانىڭ ايتۋىنشا, تۋريستىك قىزمەت سالاسىندا 48 كومپانيا تىركەلىپ وتىر. ونىڭ 11-ءى – تۋروپەراتور, 37-ءسى – فيرما, 2 ەتنواۋىل جانە 1 ۆيزيت ورتالىعى بار. ونىڭ ىشىندە 127 ورىن تۋريستەردىڭ ورنالاسۋىنا جاعداي جاسالعان. جول بويىنداعى 41 نىساندا سەرۆيستىك قىزمەت كورسەتىلەدى.
«بيىلعى قاڭتار-ناۋرىز ايلارىندا اتىراۋ وبلىسىنا 32 مىڭنان اسا تۋريست كەلدى. تۋريستەردىڭ 27 مىڭى – قازاقستاندىق, ال 5 مىڭنان استامى – شەتەلدىكتەر. ءوڭىر تۇرعىندارى مەن قوناقتارىن قىزىقتىراتىن بىرنەشە تۋريستىك باعىت انىقتالىپ وتىر. تۋريستەر يندەر اۋدانىنداعى تۇزدىكولگە, قۇرمانعازى اۋدانىنىڭ اۋماعىمەن وتەتىن قيعاش وزەنىندەگى «لوتوس» القابىنا, جىلىوي اۋدانىندا ورنالاسقان اقكەگەرشىن بورلى تاۋىنا, يساتاي اۋدانىنداعى نارىن قۇمىنا, ماحامبەت اۋدانىنداعى ورتاعاسىرلىق سارايشىق كەشەنىنە, اتىراۋ قالاسىنىڭ ماڭىنداعى «اقجايىق» مەملەكەتتىك تابيعي رەزەرۆاتىنا ءجيى بارادى. ويتكەنى اتالعان ورىنداردان اتىراۋدىڭ بىرەگەي تابيعاتى مەن مادەني مۇراسىن تاماشالاۋعا بولادى», دەيدى ج.سابىرعاليەۆا.
ونىڭ ايتۋىنشا, تابيعي سيپاتتاعى توتەنشە جاعداي كەزىندە تۋريستىك ماۋسىم كەيىنگە شەگەرىلگەن. ويتكەنى اتىراۋ وبلىسىنىڭ اكىمى سەرىك شاپكەنوۆتىڭ شەشىمىمەن جاريالانعان توتەنشە جاعداي رەجىمى ءالى دە ساقتالىپ وتىر.
«قازىر جاعداي تۇراقتالا باستاعاننان ەكسكۋرسيالىق تۋرلاردى جانداندىرۋدى جوسپارلاپ وتىرمىز. ونى تۋريستىك فيرمالار ارقىلى ۇيىمداستىرامىز. الدىمەن تۋريستىك ورىنداردى بىرگە ارالاپ, جاي-كۇيىن تەكسەرۋدى ويلاستىردىق», دەيدى ج.سابىرعاليەۆا.
ال «Easy Travel» تۋريستىك فيرماسىنىڭ باسشىسى نۇرالحان بيسەنوۆتىڭ ايتۋىنشا, شەتەلگە ساياحاتتايتىن اتىراۋلىقتار از ەمەس. اسىرەسە جاز مەزگىلىندە دەمالىسىن شەتەلدە وتكىزەتىن اتىراۋلىقتار وتە كوپ.
«اتىراۋلىقتاردىڭ باسىم بولىگى تۇركيانىڭ الانيا قالاسىنا, ەگيپەتتىڭ شارم-ەل-شەيح شاھارىنا ءجيى بارادى. كەيىنگى كەزدە ازيا ەلدەرىنە قىزىعۋشىلىق بايقالىپ وتىر. ماسەلەن, ماۋسىم ايىندا تايلاند پەن ۆەتنامداعى كۋرورتتىق ايماققا بارۋ ءۇشىن جولداما الۋعا سۇرانىس كوبەيدى», دەيدى ن.بيسەنوۆ.
بيىل اتىراۋ وبلىسىنىڭ تۋريستىك الەۋەتى زەرتتەلە باستادى. ونى ءال-فارابي اتىنداعى قازۇۋ-دىڭ عالىمدار توبى قولعا الدى. جوعارى وقۋ ورداسىنداعى رەكرەاتسيالىق گەوگرافيا جانە تۋريزم كافەدراسىنىڭ زەرتحانا مەڭگەرۋشىسى الەكساندر ارتەمەۆتىڭ ايتۋىنشا, عالىمدار توبى بىرنەشە ماقساتتى كوزدەپ وتىر.
«بىرىنشىدەن, قازاقستاننىڭ باتىس وڭىرىندەگى تۋريستىك الەۋەتىنە زەردەلەۋ جۇرگىزۋدى كوزدەدىك. ەكىنشىدەن, اتىراۋ وبلىسىنداعى تۋريستىك مارشرۋتتار مەن رەكرەاتسيالىق اۋماقتارىنا تالداۋ جاسايمىز», دەيدى ا.ارتەمەۆ.
الماتىلىق عالىمدار توبى الدىمەن «اقجايىق» مەملەكەتتىك تابيعي رەزەرۆاتىنا باردى. بۇل – يۋنەسكو-نىڭ بيوسفەرالىق رەزەرۆاتتاردىڭ دۇنيەجۇزىلىك جەلىسىنە كىرەتىن تابيعي قورىق. جاقىندا تۋريستەردى قابىلداۋدى باستادى. مۇندا ساياحاتتىڭ ەكى ءتۇرى ۇسىنىلادى. ونىڭ ءبىرى – قايىقپەن سەرۋەندەۋ, ەكىنشى باعىتى – جاياۋ جۇرگىنشى مارشرۋتى. تابيعي قورىق اۋماعى 110 مىڭ 500 گەكتاردى قۇرايدى.
ء«بىزدىڭ ۋنيۆەرسيتەت بىلتىر ەلىمىزدىڭ باتىس وڭىرىندەگى تۋريستىك الەۋەتتى زەرتتەۋگە گرانت ۇتىپ العان ەدى. سوعان سايكەس جۇمىس توبىنىڭ قۇرامىنا عالىمدار, زەرتتەۋشىلەر, گيدروگەولوگتەر, تۋريستەر مەن ەكونوميستەر, باسقا دا ساراپشى ماماندار كىردى. قازىر باتىس وڭىردەگى ءتۋريزمدى تۇراقتى دامىتۋدىڭ مۇمكىندىكتەرىن زەرتتەۋگە كىرىستىك. بۇعان دەيىن اقتوبە, باتىس قازاقستان وبلىستارىنداعى تۋريستىك باعىتتارعا تالداۋ جۇرگىزدىك. ال اتىراۋ وبلىسىنداعى لوتوس القابىن, سارايشىقتىڭ كونە قونىسىن, اقكەگەرشىن ءۇستىرتىن مەن مۇنايلى شاھاردىڭ كورىكتى جەرلەرىنە نازار اۋدارىپ وتىرمىز. ماقساتىمىز – اتىراۋ وبلىسىنىڭ اكىمدىگى جانە تۋريزم سالاسىنىڭ ماماندارىمەن بىرگە ءوڭىردىڭ الەۋەتى جانە تۋريستىك مارشرۋتتارى بويىنشا عىلىمي-زەرتتەۋ بازاسىن قۇرۋعا ۇلەس قوسۋ», دەيدى ا.ارتەمەۆ.
اتىراۋ وبلىسى
