فوتو: قر ۇلتتىق سپورت قاۋىمداستىعىنىڭ ءباسپاسوز قىزمەتى
«ىرىكتەۋ سايىستارىنىڭ ناتيجەسىندە 3 ستيل بويىنشا 3 ۇزدىك سپورتشىنى انىقتادىق. V دۇنيەجۇزىلىك كوشپەلىلەر ويىندارىندا سايىستىڭ بارلىق تۇرىنەن التىن يەلەنەمىز دەگەن سەنىم بار. ول ءۇشىن بار مۇمكىندىگىمىزدى پايدالانامىز», - دەدى قر ۇلتتىق جانە ات سپورتى تۇرلەرىنەن مەملەكەتتىك جاتتىقتىرۋشى نۇركەن بايبوريەۆ.
ەلىمىزدىڭ ەڭ ۇزدىك 6 تەڭگە ءىلۋشىسى كوشپەلىلەر ويىندارىنا تىكەلەي جولداما بەرەتىن 3 ورىندى ساراپقا سالىپ, ىرىكتەۋ ويىندارىنا قاتىسقان.
سپورتشىلارىمىز «قوس قۇلاش», «بەس بەلەس», «جەتى قۇت» ستيلدەرى بويىنشا باق سىنادى. قورىتىندىلاي كەلە, 5-ءشى دۇنيەجۇزىلىك كوشپەلىلەر ويىندارىندا ەل نامىسىن كەلەسى سپورتشىلار قورعايدى:
- «بەس بەلەس» ستيلىنەن بەكنۇر سەرىكوۆ;
- «جەتى قۇت» ءستيلى بويىنشا باقىت ءتولتاي;
- «قوس قۇلاش» ستيلىنەن راحات قامباروۆ.
«مەن بالا كەزىمنەن اتقا جاقىن ءوستىم. تەڭگە ءىلۋ سپورتىنا كەلۋىمە دە سەبەپ بولعان جىلقىعا دەگەن ماحابباتىم. بۇگىندە V دۇنيەجۇزىلىك كوشپەلىلەر ويىندارىنا دايىندىق جوعارعى دەڭگەيدە ءوتىپ جاتىر. ەل نامىسىن ابىرويمەن قورعاۋ ءۇشىن بارىمىزدى سالامىز», دەدى تەڭگە ىلۋدەن ۇلتتىق قۇراما مۇشەسى باقىت ءتولتاي.
ايتا كەتەيىك, تەڭگە ىلۋدەن V دۇنيەجۇزىلىك كوشپەلىلەر ويىندارى الدىنداعى قورىتىندى وقۋ-جاتتىعۋ جيىنى 27 تامىز بەن 7 قىركۇيەك ارالىعىندا استانادا وتەدى. وقۋ-جاتتىعۋ جيىندارىن قر تۋريزم جانە سپورت مينيسترلىگىنىڭ ۇلتتىق جانە ات سپورتى تۇرلەرى ورتالىعى ۇيىمداستىردى. ال كوشپەلىلەر ويىندارىندا تەڭگە ءىلۋ بويىنشا جارىستار 11-13 قىركۇيەك ارالىعىندا ەتنواۋىل اۋماعىندا وتەدى.
ەسكە سالا كەتەيىك, 8-13 قىركۇيەكتە استانا قالاسىندا V دۇنيەجۇزىلىك كوشپەلىلەر ويىندارى وتەدى. ءىس-شاراعا 89 ەلدەن 2000-نان استام سپورتشى قاتىسادى دەپ جوسپارلانعان.
