گۇلشارا ابدىقالىقوۆا كونفەرەنتسياعا قاتىسۋشىلار الدىندا سويلەگەن سوزىندە نۇرسۇلتان نازارباەۆتىڭ «قازاق حاندىعى – ورتالىق ازياداعى تۇڭعىش ۇلتتىق مەملەكەت» دەگەن تۇجىرىمىنا توقتالىپ ءوتتى. مەملەكەتتىك حاتشى قازاق حاندىعىنىڭ تاريحىن زەردەلەۋ ءىسى «ماڭگىلىك ەل» جالپىۇلتتىق يدەياسىن, ۇلت جوسپارى – 100 ناقتى قادامدى جۇزەگە اسىرۋ اياسىندا ايرىقشا مانگە يە بولىپ وتىرعانىن, ويتكەنى بولاشاعى ءبىرتۇتاس ۇلتتى قالىپتاستىرۋعا نەگىز بولار جايتتىڭ ءبىرى وتاندىق تاريحتى ءبىلۋ ەكەنىن ايتتى.
سونىمەن قاتار, گۇلشارا ابدىقالىقوۆا قازاق ارۋلارى ەجەلدەن ءوزىنىڭ ىزەت-ىلتيپاتىمەن, جاراتىلىسىنان العىر اقىل-پاراساتىمەن, بارشامەن ءتىل تابىسا بىلەتىن ديپلوماتتىق قاسيەتىمەن ەرەكشەلەنگەنىنە توقتالدى. بۇل رەتتە قازاق حاندىعىنىڭ قالىپتاسۋى مەن دامۋىنا قوسقان ولاردىڭ ۇلەسىن زەرتتەۋ ءىسى ءتول تاريحىمىزدى تەرەڭ زەردەلەپ, ونداعى اقتاڭداق تۇستاردى تولىقتىرۋعا مۇمكىندىك بەرەدى. ءىس-شارانى قازاقستان رەسپۋبليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا, لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتى جانە قازاقستانداعى بۇۇ دامۋ باعدارلاماسى بىرلەسىپ ۇيىمداستىردى.
كونفەرەنتسياعا سونداي-اق پارلامەنت دەپۋتاتتارى, مەملەكەتتىك ورگانداردىڭ, بۇۇ دامۋ باعدارلاماسىنىڭ وكىلدەرى, جوعارى وقۋ ورىندارىنىڭ وقىتۋشىلارى, ماگيسترانتتارى مەن ستۋدەنتتەرى قاتىستى. ءىس-شارا بارىسىندا لەۆ گۋميلەۆ اتىنداعى ەۇۋ قازاق ادەبيەتى كافەدراسىنىڭ مەڭگەرۋشىسى, قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى س.قاسقاباسوۆ, ءال-فارابي اتىنداعى قازۇۋ تاريح فاكۋلتەتىنىڭ پروفەسسورى, تاريح عىلىمدارىنىڭ دوكتورى ب.كارىباەۆ, شوقان ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, تاريح عىلىمدارىنىڭ دوكتورى ح.ءابجانوۆ جانە تاعى باسقا عالىمدار بايانداما جاسادى. ولار حالقىمىزدىڭ ماقتانىشى بولىپ سانالاتىن, وتانعا قالتقىسىز قىزمەت ەتۋدىڭ ۇلگىسىنە اينالعان, الايدا ۇمىت قالعان نەمەسە ادەيى ۇمىتتىرىلعان كوپتەگەن ەسىمدەردى قايتا جاڭعىرتۋ باعىتىنداعى عىلىمي زەرتتەۋلەردىڭ ماڭىزدىلىعىنا توقتالىپ ءوتتى.
وسى ورايدا, قاراشاش پەن ايعانىم حانشالاردىڭ, بوپاي حانىم مەن باي انانىڭ, تويقارا حانىمنىڭ, قازاق ايەلدەرى اراسىنان شىققان وزگە دە كورنەكتى تۇلعالاردىڭ ەسىمدەرى اتالدى. كونفەرەنتسيا قورىتىندىسى بويىنشا قارار قابىلداندى.
ەلامان قوڭىر.
دەرەك: akorda.kz. سۋرەت: abai.kz.
