كورمە ادامنىڭ الەمدى قابىلداۋ شەكارالارىن زەردەلەيدى. ادام مەن تابيعات, ءتىرى مەن ءولى, كورىنەتىن مەن كورىنبەيتىن, دوس پەن قاس سىندى ۇيرەنشىكتى جىكتەۋلەردەن باس تارتۋعا ۇندەيدى.
ءىس-شارانىڭ سالتاناتتى اشىلۋىندا ءسوز سويلەگەن ۇلتتىق مۋزەي ديرەكتورىنىڭ عىلىمي جۇمىستار جونىندەگى ورىنباسارى اقمارال يبراەۆا كورمە كورەرمەنگە ەرەكشە اسەر سىيلاپ, ادام مەن تابيعات اراسىنداعى بايلانىستى تەرەڭىرەك تۇسىنۋگە مۇمكىندىك بەرەتىنىن اتاپ ءوتتى.
«قازىرگى الەم جاھاندىق وزگەرىستەر مەن جاڭا سىن-قاتەرلەر كەزەڭىن باستان وتكەرىپ وتىر. وسىنداي ۋاقىتتا ونەر ادامزاتتىڭ تابيعاتپەن, تەحنولوگيامەن بايلانىسىن تەرەڭىرەك تۇسىنۋگە مۇمكىندىك بەرەتىن بىرەگەي كەڭىستىككە جول اشادى. حۆان سوندجوننىڭ شىعارماشىلىعى دا ءدال وسى ءوزارا بايلانىستى جاڭا قىرىنان پايىمداۋعا شاقىرادى. مۇنداي جوبالار قازاقستان مەن كورەيا اراسىنداعى مادەني ىنتىماقتاستىقتى نىعايتىپ, زاماناۋي ونەر سالاسىنداعى حالىقارالىق ديالوگتىڭ دامۋىنا ىقپال ەتەدى دەپ سەنەمىن», دەدى اقمارال يبراەۆا.
كەيىنگى بەس جىل بويى اۆتور تابيعات ىرعاقتارىنا, ادامنىڭ قورشاعان ورتامەن ءوزارا ارەكەتتەسۋىنە نەگىزدەلگەن شىعارمالار ارقىلى «Tanhamu» اتتى كوركەم تۇجىرىمداماسىن دامىتىپ كەلەدى. ونىڭ جۇمىسىندا ادام مەن وزگە تىرشىلىك يەلەرى دەنە, تابيعات, تەحنولوگيا جانە ەكولوگيا اراسىنداعى ۇزدىكسىز ءوزارا ىقپالداستىقتا الەمدى قالاي بىرگە سەزىنە الاتىنى زەرتتەلەدى. اۆتور شىعارمالارىندا الەمگە ء«بىز بۇل پلانەتادا ءبىر-ءبىرىمىزدى قالاي سەزىنە الامىز؟ ءبىزدى قانداي ىرعاقتار مەن تىنىس بىرىكتىرەدى؟» دەگەن ساۋال قويادى.
كورەيا رەسپۋبليكاسى ەلشىلىگى كورەي مادەني ورتالىعىنىڭ باسشىسى كۋ بون-چول ەكى ەل اراسىنداعى مادەني بايلانىستىڭ ودان ءارى دامي بەرەتىنىنە توقتالدى. ال كورمە اۆتورى حۆان سوندجون ۇلتتىق مۋزەيگە, كورەي مادەني ورتالىعىنا جانە بارلىق قاتىسۋشىلارعا العىس ايتتى.
«مەن ءوز شىعارمالارىمدا ميتسەلي جەلىلەرىن, نەيروندىق جۇيەلەردى, ەكولوگيالىق ۇدەرىستەردى كوبىنە مەتافورا رەتىندە ەمەس, ويلاۋ ءتاسىلى رەتىندە قاراستىرامىن. ولار اقىل, جادى مەن سەزىنۋ ءبىر عانا تىرشىلىك يەسىنە تيەسىلى ەمەس, كەرىسىنشە بايلانىستار ارقىلى تارالاتىنىن كورسەتەدى. كورمەنى تاماشالاعاندا سىزدەر تەك قاراۋمەن شەكتەلمەي, تىڭداپ, سەزىنىپ, بالكىم ءوز قابىلداۋىڭىزداعى نازىك وزگەرىستى بايقايسىزدار دەپ ۇمىتتەنەمىن. سەبەبى ءبىزدى بايلانىستىراتىن نارسە – تولىق تۇسىنىكتى بولماسا دا, بىرگە سەزىنۋگە بولاتىن قۇبىلىس بولۋى مۇمكىن», دەدى سۋرەتشى.
ءسوز سوڭىندا حۆان سوندجون جينالعان كوپشىلىككە ۆيزۋالدى ءارى دىبىستىق كومپوزيتسياسىن ۇسىندى.
جالپى, كورمە ەكسپوزيتسياسىندا وننان اسا بەينە, دىبىس, قوزعالىس جانە ۆيزۋالدى وبرازداردى بىرىكتىرەتىن مۋلتيسەنسورلىق كەڭىستىك رەتىندەگى تۋىندى ۇسىنىلدى. اۆتور ينستاللياتسيالار مەن دىبىستىق كومپوزيتسيالار ارقىلى تابيعات ىرعاقتارىن سەزىنۋگە مۇمكىندىك بەرەتىن ەرەكشە ورتا قالىپتاستىرىپ, كورەرمەندى پلانەتالىق ەكوجۇيەدەگى بارلىق ەلەمەنتتەردىڭ ءوزارا بايلانىسى تۋرالى ويلانۋعا شاقىرادى.
كورمە 24 مامىرعا دەيىن سوزىلادى.
