فوتو: مادەنيەت جانە اقپارات مينيسترلىگى
كاسىبي مەرەكەمەن قۇتتىقتاعان ايدا بالاەۆا مەملەكەت باسشىسىنىڭ اتىنان مادەنيەت جانە ونەر سالاسىنىڭ وكىلدەرىنە بەرىلگەن ناگرادالار ولاردىڭ قاجىرلى ەڭبەگىنە, كاسىبي ادالدىعىنا جانە ۇلتتىق مادەنيەتتى دامىتۋعا قوسقان ۇلەسىنە كورسەتىلگەن جوعارى قۇرمەت ەكەنىن اتاپ ءوتتى.
«مەملەكەت باسشىسىنىڭ قولداۋى تەك ماراپاتپەن عانا شەكتەلمەيدى. سالا قىزمەتكەرلەرىنىڭ الەۋمەتتىك جاعدايىن جاقسارتۋ, ونىڭ ىشىندە تۇرعىن ءۇي ماسەلەسىن شەشۋ باعىتىندا دا ناقتى جۇمىستار جۇرگىزىلىپ جاتىر. وزدەرىڭىز بىلەسىزدەر, وتكەن جىلى پرەزيدەنت اتىنان استانا قالاسىندا مادەنيەت جانە ونەر قىزمەتكەرلەرىنە پاتەر سەرتيفيكاتتارى تابىستالدى. بيىل بۇل يگى باستاما جالعاسىپ, الماتى قالاسىندا دا سالا وكىلدەرىنە پاتەر كىلتى تابىستالماق. مۇنداي قولداۋ شىعارماشىلىق ادامدارىنىڭ ەڭبەگىن ناقتى ىسپەن باعالاۋدىڭ ايقىن كورىنىسى. سىزدەرگە تابىستالعالى وتىرعان جاڭا پاتەرلەر – ەل يگىلىگى جولىنداعى ادال قىزمەتتەرىڭىزگە كورسەتىلگەن قۇرمەت پەن ريزاشىلىقتىڭ بەلگىسى. بۇل شاڭىراقتار سىزدەرگە قۇت-بەرەكە, شىعارماشىلىق شابىت, وتباسىلارىڭىزعا شاتتىق اكەلسىن! وسى ورايدا بارلىق مادەنيەت جانە ونەر قىزمەتكەرلەرىنىڭ اتىنان مەملەكەت باسشىسىنا سالاعا تۇراقتى كوڭىل ءبولىپ, شىعارماشىلىق قاۋىمعا جان-جاقتى قولداۋ كورسەتىپ كەلە جاتقانى ءۇشىن شىنايى العىس بىلدىرەمىن», دەدى ايدا بالاەۆا.
وسىلايشا, مەملەكەت باسشىسىنىڭ اتىنان مادەنيەت جانە ونەر سالاسىنىڭ وكىلدەرىنە 60 پاتەردىڭ كىلتى تابىستالدى. تۇرعىن ءۇي قولداۋىنا يە بولعانداردىڭ قاتارىندا جەتەكشى تەاترلار مەن مۋزىكالىق ۇجىمداردىڭ, ءبىلىم بەرۋ ۇيىمدارىنىڭ, كىتاپحانالار, ارحيۆتەر, مۋزەيلەر, باسپا جانە ادەبيەت سالاسىنىڭ وكىلدەرى, سونداي-اق مادەنيەت مەكەمەلەرىنىڭ تۇراقتى جۇمىسىن قامتاماسىز ەتىپ جۇرگەن ماماندار بار.
بەس ادام تۇرعىن ءۇي سەرتيفيكاتتارىن كەشە مەملەكەت باسشىسىنىڭ ءوز قولىنان العان بولاتىن. اتاپ ايتقاندا, اباي اتىنداعى قازاق ۇلتتىق وپەرا جانە بالەت تەاترىنىڭ ءارتىسى نۇربولات نۇراليەۆ ءۇش بولمەلى پاتەرگە يە بولدى. ونىڭ مادەنيەت سالاسىنداعى ەڭبەك ءوتىلى 19 جىلدان اسادى.
پرەزيدەنت ءانشى ماقپال ءجۇنىسوۆا مەن تاتيانا بۋرميستروۆانى ماراپاتتادى
احمەت جۇبانوۆ اتىنداعى دارىندى بالالارعا ارنالعان مامانداندىرىلعان قازاق مۋزىكا مەكتەپ-ينتەرناتىنىڭ وقىتۋشىسى سانيا وسپانقۇلوۆاعا دا ءۇش بولمەلى پاتەر بەرىلدى. ول اتالعان سالادا 24 جىلدان استام ۋاقىت ەڭبەك ەتىپ كەلەدى.
رەسپۋبليكالىق اكادەميالىق نەمىس دراما تەاترىنىڭ ءارتىسى يگور پوپوۆ ەكى بولمەلى پاتەرگە يە بولدى.
عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ءارتىسى انار ادىلوۆاعا ءۇش بولمەلى پاتەر تابىستالدى. اكتريسا مادەنيەت جانە ونەر سالاسىندا 15 جىلدان استام ۋاقىت ەڭبەك ەتىپ كەلەدى.
قۇرمانعازى اتىنداعى قازاق ۇلتتىق كونسەرۆاتورياسىنىڭ وقىتۋشىسى اراي اسقار دا ءۇش بولمەلى پاتەر يەسى اتاندى. ونىڭ سالاداعى ەڭبەك ءوتىلى – 14 جىل. ال بۇگىن الماتىدا ايدا بالاەۆا پرەزيدەنت اتىنان تاعى 55 مادەنيەت قايراتكەرىنە پاتەر كىلتىن تابىستادى. ولاردىڭ قاتارىندا جامبىل اتىنداعى قازاق ۇلتتىق فيلارمونياسىنىڭ باس ديريجەرى قانات وماروۆ بار. مادەنيەت سالاسىندا 16 جىلدان استام ۋاقىت ەڭبەك ەتىپ كەلە جاتقان ونەر يەسى ەكى بولمەلى پاتەرگە يە بولدى.
ءدىلشات امانباەۆ – رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترىنىڭ دراما ءارتىسى. سالاداعى ەڭبەك ءوتىلى 22 جىلدان اسادى. وعان ەكى بولمەلى پاتەر بەرىلدى.
