ن.بوگدانوۆا مەن باپكەرى داستان قابدەنوۆ
الدىمەن بوكسشى ناتاليا بوگدانوۆا اتويلاپ شىقتى. ۇلىبريتانيانىڭ ليۆەرپۋل قالاسىندا 2025 جىلى وتكەن الەم چەمپيوناتىندا ناتاليا قارسىلاستارىن ايقىن باسىمدىقپەن جەڭىپ, ەڭ بەدەلدى سانالاتىن 70 كگ سالماق دارەجەسىندە چەمپيون اتاندى. ەلىمىز العان 7 التىننىڭ ارقاسىندا كوماندالىق ەسەپتە قارا ءۇزىپ, باستى قارسىلاسىمىز – وزبەكستان قۇراماسىن ءبىر ساتى ارتتا قالدىردى.
1999 جىلى پەتروپاۆلدا تۋعان ناتاليا جاستاي اناسىنان ايرىلىپ, اجەسىنىڭ تاربيەسىن كورگەن. «وتباسىم ەرەكشە ىستىق, جارىسقا شىققان سايىن ساعىنىپ ورالامىن», دەيدى ول. تاباندى قىز بوكسپەن قوسا كيكبوكسينگپەن اينالىسىپ, 2019 جىلى وسى سپورت تۇرىنەن شەبەر ءنورماتيۆىن ورىنداعان. 2022 جىلى ازيا ويىندارىنىڭ قولا جۇلدەگەرى اتاندى. وسى جارىستا ءوزىن قايراپ, الەم چەمپيونى اتانۋدى ماقسات ەتكەن. تالماي توككەن تەردىڭ ارقاسىندا سول بيىككە قول جەتكىزدى. ەلگە جەڭىسپەن ورالعاندا: «قۋانىشىم قوينىما سىيماي تۇر. جاتتىقتىرۋشىم ەكەۋىمىز ەشتەڭەگە الاڭداماي تەر توگىپ, تابىسقا جەتتىك», دەپ اعىنان جارىلدى.
ناتاليانىڭ جەكە جاتتىقتىرۋشىسى – داستان قابدەنوۆ. ءوز ءىسىنىڭ شەبەرى ءارى شاكىرتتەرىن قاتاڭ تارتىپتە ۇستايتىن باپكەردىڭ تابىسى جىل سايىن ارتىپ كەلەدى. ول – كاميل سافين, جانات جاقيانوۆ, داريعا شاكىموۆا سىندى چەمپيونداردى باپتاپ شىعارعان قىزىلجار بوكس مەكتەبىنىڭ تاجىريبەلى مامانى.
پرەزيدەنت قاسىم-جومارت توقاەۆ ناتاليا بوگدانوۆانى مەملەكەتتىك ناگرادامەن ماراپاتتادى. قازىر قىزىمىز ۇلتتىق قۇراما ساپىندا كەزەكتى جارىسقا دايىندالىپ ءجۇر.
قىزىلجار داڭقىن اسىرعان ەرلەردىڭ ءبىرى – بيىل يتاليانىڭ ميلان-كورتينا-د’امپەتستسو قالالارىندا وتكەن XIV قىسقى پاراليمپيادانىڭ چەمپيونى ەربول حاميتوۆ. ويىنداردىڭ ءۇش تۇرىنە قاتىسقان ەربول الدىمەن شاڭعى جارىسىندا قولا جۇلدەمەن قۋانتتى. ال 13 ناۋرىزدا پاراشاڭعىدا وتىرىپ جارىسۋدان پاراليمپيادا چەمپيونى اتانىپ, ەل قورجىنىنا بيىل قىسقى وليمپيادا ويىندارىنىڭ چەمپيونى اتانعان ميحايل شايدوروۆتان كەيىن ەكىنشى التىندى اپەرىپ, بارشا وتانداسىمىزدى شاتتىققا بولەدى.
ول 1997 جىلى قىزىلجاردا ومىرگە كەلگەن. جامبىل اۋدانىنان كوشىپ كەلگەن اكەسى عالىمكەرەي مەن اناسى عاليا قازىر پەتروپاۆل قالاسىنداعى «بەرەكە» شاعىن اۋدانىندا تۇرادى. ەربولدان وزگە ءبىر ۇل, ءبىر قىز تاربيەلەپ وتىر. قاراپايىم وتباسىنان شىققان جالىندى ازاماتتىڭ جەتىستىگى تالاي جاننىڭ جۇرەگىنە ومىرگە قۇشتارلىق, بيىك تابىسقا ۇمتىلىس شوعىن ۇرلەدى.
ەربولدىڭ ءومىر جولى وڭاي بولعان جوق. اۋىلشارۋاشىلىق تەحنيكۋمىندا وقىپ, دجيۋ-دجيتسۋمەن اينالىسىپ جۇرگەن جاس 2017 جىلى بۇزاقىلارمەن قاقتىعىستا اياعىنان وق جاراقاتىن الدى. سالدارىنان سول اياعىن تىزەدەن تومەن كەستىرۋگە ءماجبۇر بولعان. ونى جارالاعان بەس قىلمىسكەر دە ۇستالىپ, ءتيىستى جازاسىن الدى.
بيىك بەلەسكە شىققالى تۇرعان جاس جىگىتتىڭ ءۇمىتى ۇزىلگەندەي كۇي كەشتى. سۇيگەن قىزى اينىپ كەتتى, جولداستارى الىستادى, باپكەرى دە كوزدەن عايىپ بولدى. اجەسى ينفاركت الىپ, اتاسى دا اۋىر قايعىدان ومىردەن ءوتتى. تەك اتا-اناسى مەن جاقىن تۋىستارى جانىنان تابىلعان ازامات ومىردەن كۇدەر ۇزبەي, جاتتىعۋىن جالعاستىرا بەردى. ىشكى قۋاتى مەن قايسارلىعىنا سەنگەن رۋحتى جىگىت الدىمەن بالداقپەن, كەيىن پروتەزبەن جاتتىعا باستادى. وعان مما ارالاس جەكپە-جەك فەدەراتسياسىنىڭ استاناداعى جاتتىقتىرۋشىسى سەرگەي ۆەسەلوۆ پەن فەدەراتسيا پرەزيدەنتى اناتولي كيم سەنىم ارتىپ, قۇراما جاتتىعۋىنان قالدىرمادى. باحرەيندە وتكەن الەم چەمپيوناتىنا گرەپپلينگتەن قاتىسىپ, جۇلدەگەر اتاندى. 2019 جىلى وسى سپورتتان ازيا بىرىنشىلىگىندە ەكىنشى ورىن يەلەنىپ, UWW نۇسقاسىندا التىن مەدالعا قول جەتكىزدى.
الايدا جەكپە-جەكتىڭ بۇل ءتۇرى پاراليمپيادا باعدارلاماسىنا ەنبەگەن ەدى. سوندىقتان ەربول قىسقى سپورتقا بەت بۇردى. 2022 جىلى بەيجىڭدەگى دوداعا ۇلتتىق قۇراما ساپىندا شىققانىمەن, جۇلدەگە ىلىگە المادى.
بيىلعى پاراليمپيادادا تاماشا ونەر كورسەتىپ, الدىمەن قولا, كەيىن التىن مەدال تاقتى. ەل مەرەيىن وسىرگەن ەردى اقوردادا مەملەكەت باسشىسى قۇتتىقتاپ, «بارىس» وردەنىن توسىنە قادادى. قاسىم-جومارت توقاەۆ جاھاندىق باسەكەدە ەربولدىڭ التىن مەن قولا مەدال جەڭىپ الۋى زور ابىروي بولعانىن اتاپ ءوتتى.
«ناعىز چەمپيون اتانىپ, مەرەيىمىزدى ۇستەم ەتتىڭ, كوك تۋىمىزدى بيىكتە جەلبىرەتتىڭ. بۇل – قازاق پاراسپورتى تاريحىنداعى ۇلكەن جەتىستىك. ەربول حالقىمىزدىڭ قايسار, ءور رۋحتى, نامىستى ۇلت ەكەنىن كۇللى الەمگە پاش ەتتى», دەدى پرەزيدەنت.
سونىمەن قاتار پرەزيدەنت حIV قىسقى پاراليمپياداداعى جوعارى سپورتتىق جەتىستىكتەرىنە وراي تۋريزم مەن سپورت مينيسترلىگىنە قاراستى دەنە مۇمكىندىكتەرى شەكتەۋلى تۇلعالاردى سپورتقا دايارلاۋ ورتالىعىنىڭ باپكەرلەرى ۆاسيلي كولوميەتس پەن انتون جدانوۆيچكە «پاراسات» وردەنىن, تەرىستىكتەگى ء«ۇمىت» سپورت كلۋبىنىڭ جاتتىقتىرۋشىسى اسلان توقباەۆقا «قۇرمەت» وردەنىن تاپسىردى.
ەربول – وتباسىلى ازامات. جارى مەن ەكى قىزى ونىڭ جەتىستىگىنە قاتتى قۋانىپ وتىر. ءوزى قازىر م.قوزىباەۆ اتىنداعى ۋنيۆەرسيتەتتىڭ ستۋدەنتى, كەلىنشەگى – دارىگەر. چەمپيونعا وبلىس اكىمى ءۇش بولمەلى ءۇيدىڭ كىلتىن تابىستاسا, ەلوردالىق كاسىپكەر نۇرلان سماعۇلوۆ تەمىر تۇلپار مىنگىزدى, ال GBG قۇرىلىس كومپانياسى ەكى بولمەلى پاتەر سىيلادى.
GBG كومپانياسىنىڭ باسقارۋشى ديرەكتورى
مەرۋەرت ادىلباەۆا مەن ەربول حاميتوۆ
شال اقىن اۋدانىنان شىعىپ, قازىر قىزىلجارداعى ارناۋلى سپورت مەكتەپ-ينتەرناتىندا وقيتىن اپالى-ءسىڭلىلى كريستينا, ينەسسا, الينا شۋمەكوۆالار بولاشاعىنان ۇلكەن ءۇمىت كۇتتىرەدى. ۇشەۋى دە كونكيمەن جۇگىرۋمەن اينالىسادى. كريستينا بيىل جاسوسپىرىمدەر اراسىنداعى الەم چەمپيوناتىندا 500, 1000, سونداي-اق 1 500 مەترگە جۇگىرۋدەن چەمپيون اتاندى. الەم كۋبوگى جولىنداعى جارىستا 2 التىن مەن كوماندالىق سپرينتتە كۇمىس مەدال ولجالادى. ونىمەن بىرگە باق سىنايتىن ۆارۆارا گلۋحوۆا دا كوماندالىق سپرينتتە چەمپيون اتاندى.
قىزداردىڭ ۇلكەنى ينەسسا الەم كۋبوگىنىڭ فينالىندا 1000 مەتر قاشىقتىقتا توپ جاردى. كريستينانىڭ ەگىزى الينا دا تالاي حالىقارالىق ارەنادا تۇراقتى تۇردە جۇلدە الىپ ءجۇر. بۇل دارىنداردى ولگا يحتەندريس پەن الەكساندرا سۋروۆياتكينا جاتتىقتىرىپ, جەڭىستى جولعا باستاپ كەلەدى.
ناۋرىز مەرەكەسىندە وبلىس اكىمى ع.نۇرمۇحامبەتوۆ بارلىق جەڭىمپاز, جۇلدەگەر سپورتشىلارعا 1 ملن تەڭگەدەن, كريستينا شۋمەكوۆاعا 3 ملن تەڭگە سىياقى تابىستادى.
اپالى-ءسىڭلىلى شۋمەكوۆالار
تابىستىڭ قاينار كوزى – سپورتشىلاردى قولداۋ مەن جاتتىعۋ ورىندارىن اشىپ, قامقورلىق جاساۋ ەكەنى ءسوزسىز. پەتروپاۆلدا 2015 جىلى اشىلعان ا.ۆينوكۋروۆ اتىنداعى ءزاۋلىم سپورت سارايى بار. دوڭگەلەنگەن عيماراتتى ءوڭىردىڭ باس سپورت ورتالىعى دەۋگە بولادى. مۇندا حوككەيدەن, مانەرلەپ سىرعاناۋدان, وزگە دە سپورت تۇرلەرىنەن رەسپۋبليكالىق جارىستار ءجيى وتەدى. 2348 شارشى مەتر الاڭى مۇزدا جاتتىعۋشىلارعا قىسى-جازى اشىق. جوعارىدا اتالعان قىزداردىڭ ءبارى وسى مۇز ارەناسىندا شىڭدالادى.
بىلتىرعى جەلتوقساندا قالادا ۇزاق ۋاقىت جوندەۋدە تۇرعان تەننيس ورتالىعى 400 ملن تەڭگەگە جاڭارتىلىپ, ەسىگىن ايقارا اشتى. «تەننيس كورتى حالىقارالىق ستاندارتقا ساي كەلەدى. وندا وبلىستىق, رەسپۋبليكالىق قانا ەمەس, حالىقارالىق جارىستار دا وتكىزۋگە بولادى. قازىر وڭىردە 2 مىڭنان استام سپورتتىق نىسان بار, سونىڭ 43-ءى بىلتىر مەن بيىل اشىلدى», دەدى وبلىس اكىمى. بيىل جاڭا فۋتبول ستاديونىنىڭ قۇرىلىسى دا باستالادى. قولداۋ بولسا, ءوڭىر سپورتى وسىلايشا قارقىندى دامي بەرەدى.
سولتۇستىك قازاقستان وبلىسى
