1995 جىلى سەمەي قالاسىندا دۇنيە ەسىگىن اشقان سابيگە قۇنانباي اۋلەتىنىڭ ۇلكەندەرى قانداي ات قويامىز دەپ باس قاتىرعان جوق. سەبەبى نارەستە ومىرگە كەلەردەن ءبىر اپتا بۇرىن باقيعا كوشكەن ەكىنشى دۇنيەجۇزىلىك سوعىسقا قاتىسقان اتاسى «اباي» دەگەن ات قويىڭدار دەپ وسيەت ەتىپتى. سول جىلى دۇركىرەپ وتكەن حاكىم اباي قۇنانباي ۇلىنىڭ 150 جىلدىق مەرەيتويى دا اسەر ەتكەن بولار دەپ توپشىلايدى جاقىندارى. بۇگىنگى كۇنى اباي وبلىسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ جەدەل ۋاكىلى بولىپ قىزمەت اتقاراتىن اباي شالقار ۇلى اتاسى قويعان وسى ءبىر اياۋلى اتتى ابىرويمەن الىپ ءجۇر.
مەكتەپ جاسىندا جۇرگەندە اباي ەسىمىنىڭ بار اۋىرتپالىعىن سەزىنىپ, قينالعانىن بۇگىندە جىميىپ قانا ەسىنە الاتىن اباي قۇنانباەۆ: «ساباقتى جاقسى وقۋعا تىرىستىم. ۇيدەگى اتا-انام دا, مۇعالىمدەر دە بارىنشا بىلىكتى, ءبىلىمدى بولۋعا باۋلىدى. ساباق وقىماي نە قانداي دا ءبىر تەنتەكتىك ءىس قىلسام, اباي ەسىمىنىڭ ءمانى مەن ماعىناسىن تەرەڭ تۇسىندىرەتىن. سودان كەيىن بە, العىر بولىپ العا ۇمتىلۋعا, زامانداستاردىڭ الدى بولۋعا قۇلشىندىم», دەيدى.
ورتا مەكتەپتى تامامداعان سوڭ الماتىعا اتتاندى. جاس اباي ءىىم الماتى اكادەمياسىنىڭ كۋرسانتى اتاندى. ىشكى ىستەر سالاسىنىڭ بىلگىر ماماندارىن دايارلايتىن وقۋ ورنىن ويداعىداي ءبىتىرىپ, لەيتەنانت شەنىن الىپ شىقتى.
اباي قۇنانباەۆ اقىن اباي شىعارماشىلىعىن بالا كەزدەن بىلگەنىنىڭ ارتىق بولماعانىن ايتادى. ەڭبەك جولىن وسكەمەن قالاسى ىشكى ىستەر باسقارماسىنىڭ كريمينالدىق پوليتسيا ءبولىمىنىڭ جەدەل ۋاكىلى بولىپ باستادى. وسى بولىمدە قىزمەت اتقارا ءجۇرىپ, قالتا جانە پاتەر ۇرلىقتارىن اشۋمەن اينالىساتىن ارنايى توپ وكىلدەرىمەن تىزە قوسىپ قىزمەت اتقاردى. 2020 جىلى شىعىس قازاقستان وبلىسى پوليتسيا دەپارتامەنتى كريمينالدىق پوليتسيا باسقارماسىنىڭ جەكە تۇلعاعا قارسى قىلمىستاردى اشۋ ءبولىمىنىڭ جەدەل ۋاكىلى لاۋازىمىنا اۋىستى. ەكى جىل بويى قىزمەت باسپالداعىن ويداعىداي اتقارىپ, اباي وبلىسى قۇرىلعاننان كەيىن وبلىس ورتالىعىنا كوشىپ كەلدى. 2023 جىلدان بەرى اباي وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ جەدەل ۋاكىلى بولىپ قىزمەت ەتەدى.
ۇلى اقىن ەسىمىن يەلەنىپ ءجۇرۋدىڭ اۋىرتپاشىلىعى مەن جەڭىل تۇستارى تۋرالى سۇراعىمىزعا پوليتسيا كاپيتانى: «دانا بولسىن, دانا بولماسا دا, سول دانالىقتى تۇسىنەر ۇل بولسىن دەپ ات قويعاننان كەيىن اباي ەسىمىن الىپ ءجۇرۋ اۋىر نە قيىن دەپ ايتۋعا بولماس. باستىسى, وسىنداي ەسىمىڭ بولعاننان كەيىن ءارتۇرلى جاعىمسىز قىلىقتان بويىڭدى اۋلاق ۇستايسىڭ. جاۋاپكەرشىلىكتى سەزىنەسىڭ, بۇل الدىمەن اباي اتىن جاماندىقتان اراشالاۋ بولسا, ەكىنشىدەن, اتا-انا ۇمىتىنە سەلكەۋ تۇسىرمەۋ», دەيدى اباي قۇنانباەۆ اعىنان جارىلىپ.
اباي وبلىسى
