ءسىرا, ءار ۇلتقا ءبىرتۋار دانانى جاراتقاننىڭ ءوزى بۇيىرتادى. مەملەكەت باسشىسى ق.توقاەۆ: «اباي مۇراسى – ءبىزدىڭ ۇلت بولىپ بىرلەسۋىمىزگە, ەل بولىپ دامۋىمىزعا جول اشاتىن قاستەرلى قۇندىلىق» دەپ اتاپ كورسەتكەنى ءمالىم. اقىن بولمىسىنداعى ەرەك تۋمىس – ونىڭ كەنەن وتانشىلدىعى, حالقىن تەرەڭ ءسۇيۋى. الەمدە ۇلى اقىندار كوپ دەسەك تە, ۇلت اقىندارى از. ۇلتتى ءسۇيۋ ارقىلى عانا ادامزاتتىق ولشەمنىڭ باسپالداعىنا قادام باسۋعا بولادى. ال ەلشىلدىك قاسيەت – انا سۇتىمەن كەلەتىن ادامشىلىق ارناسى. «قالىڭ ەلىم, قازاعىم, قايران جۇرتىم, ۇستاراسىز اۋزىڭا ءتۇستى-اۋ مۇرتىڭ» دەپ قام جەگەن وتانشىل اقىن حالقىمەن ءبىر تۇتاسىپ كەتكەن.
بۇگىن ۇلت رۋحانياتىنىڭ قالىپتاسۋ جولىنا ۇڭىلسەك, اباي جولى, اباي ءىزى سايراپ جاتىر. اباي مۇراسىندا, سول مۇرادان باستاۋ العان الاش يدەياسىندا, ازاتتىق ارمانىنان جارالعان 50–60-جىلدارداعى «جىلىمىق» ساۋلەسىندە, سول ساۋلەدەن قۋاتتانعان جەلتوقسان رۋحىندا كەز كەلگەن سىن-قاتەرگە توتەپ بەرەتىن مىڭجىلدىق ەرىك-جىگەرىمىز بەن جاسامپاز سەنىم مەن ءۇمىتىمىز تۇر.
اباي – دانالىق بيىگى. اباي – ەلدىكتىڭ تەمىرقازىعى. پرەزيدەنتىمىز ايتقانداي, اباي – رۋحاني رەفورماتور.
