كولىك يەسى – اسلان جازىقوۆتىڭ ماماندىعى سۋرەتشى ەمەس. بىراق بالا كەزىنەن سۋرەت سالۋدى ۇناتادى. قولى بوساعان ساتتە ويىندا جۇرگەن بەينەلەردى, تابيعات كورىنىسىن اق قاعازعا تۇسىرەدى.
«جاھان جۇرتى سەكىلدى قازاقتىڭ دا نازارى پاريجدەگى وليمپيا ويىندارىنا اۋىپ وتىر. ويتكەنى توكيوداعى باسەكەدە ەلىمىزدىڭ سپورتشىلارى التىن جۇلدە الماعاننان كەيىن وسى وليمپيادادان ءۇمىت كۇتتىك. تورتجىلدىق دودانىڭ العاشقى كۇنى سول ءۇمىتىمىزدى ساڭلاق دزيۋدوشى ەلدوس سمەتوۆ اقتادى. قارسىلاسىنىڭ ءبارىن جەڭىپ, قازاق دزيۋدوشىلارىنىڭ اراسىنان تۇڭعىش وليمپيادا چەمپيونى اتاندى. تاتامي تارلانبوزىنىڭ بۇل جەڭىسى قازاق حالقىنىڭ مەرەيىن ءوسىردى. كوك بايراعىمىزدى جەلبىرەتىپ, ءانۇرانىمىزدى شىرقاتتى. وسى ءساتتى تەلەديداردان كورىپ, قۋانىشتان قاتتى تولقىدىم», دەيدى ا.جازىقوۆ.
سول كەزدە ول وليمپيادا چەمپيونىنىڭ سۋرەتىن بەينەلەۋ تۋرالى ويعا بەكىنىپتى. ال كولىگىنىڭ اينەگىنە سالۋ ءۇشىن سىرىڭكەنىڭ تالى مەن ماقتا تاياقشاسىن قولدانعان.
«كولىگىمنىڭ اينەگى شاڭ ەدى. سونى ۇتىمدى پايدالانعىم كەلدى. ءسويتىپ, ەلدوستىڭ پورترەتىن سالا باستادىم. چەمپيوننىڭ سۋرەتى ءساتتى شىقتى. مۇنى كورگەن جۇرگىزۋشىلەر دە, جاياۋ جۇرگىنشىلەر دە كولىگىمدى فوتوعا ءتۇسىرىپ الىپ ءجۇر», دەيدى اۋەسقوي سۋرەتشى.
ەلدوستىڭ پورترەتى – العاشقى تۋىندىسى ەمەس. باعدارلاماشى ماماندىعىن مەڭگەرگەن اسلان جازىقوۆ بۇعان دەيىن دە بىرنەشە سپورتشىنىڭ پورترەتىن سالىپتى.
«بۇرىن گەننادي گولوۆكين مەن سەرىك بيبوسىنوۆتىڭ, شافحات راحمونوۆتىڭ پورترەتىن سالعان ەدىم. ال العاش رەت «ۆاز-2109» كولىگىنىڭ ارتقى اينەگىنە 2016 جىلى انگليا چەمپيونى اتانعان «لەستەر سيتي» فۋتبول كومانداسىنىڭ ەمبلەماسىن بەينەلەدىم. بۇل سۋرەتىمدى BBC سايتى «قازاقستاندىق جانكۇيەردىڭ تۋىندىسى, بىراق اۆتورى بەلگىسىز» دەپ جاريالادى», دەيدى ا.جازىقوۆ.
قازىر اۋەسقوي سۋرەتشىنىڭ ءۇش بالاسى بار. ونىڭ 9 جاستاعى قىزى داريا دزيۋدو سەكتسياسىنا قاتىسىپ ءجۇر.
اتىراۋ وبلىسى
