«WhoockAI» – IT-كومپانيالارعا جاس IT-ازىرلەۋشىلەردى جاساندى ينتەللەكتىگە الماستىرۋدى ۇسىنادى. ءيا, قازىرگى سەرۆيستەر سايت جاساۋدى نەعۇرلىم جەڭىلدەتكەن. دەگەنمەن «frontend», «backend», دەرەكتەر قورى دەگەندى بىلمەيتىندەر ءوز بەتىمەن بۇل ءىستى الىپ كەتە المايدى. ال Whoock-تىڭ ماقساتى – كەز كەلگەن ادام سايت جاساي الاتىنداي «no-code» شەشىم قۇراۋ بولدى. ChatGPT نارىققا ەنىپ, كوبى جاساندى ينتەللەكت نەگىزىندە كەيبىر نارسەلەردى جاقسى ءارى جىلدام جاساي الاتىنىن تۇسىنە باستادى. ارسەن دە ستارتاپقا AI ءتاسىلدى ەنگىزەمىز دەپ شەشكەن. باسىندا ۆەب-سايت جاساپ جۇرگەن جىگىتتەر, كەيىننەن ستارتاپتى دامىتىپ, جاساندى ينتەللەكت جۇمىسشىلارىن دايارلاي باستاعان.
ء«بىز AI-مەن جۇمىس ىستەۋدەن مىقتى ەكەنىمىزدى تۇسىندىك. بۇل داعدىنى باسقا كومپانيالارعا ساتامىز دەپ شەشتىك. اتاپ ايتقاندا, ازىرلەۋشىلەرگە جۇمسالاتىن اقشانى ازايتۋ ءۇشىن IT-بيزنەسكە جاساندى ينتەللەكت ەنگىزۋگە كومەكتەسە باستادىق. سوندىقتان «Whoock»-ءتىڭ قازىرگى نەگىزگى يدەياسى – كومپانيالاردىڭ تەحنيكالىق كوماندالارىنداعى «بىلىكتىلىگى باستاپقى دەڭگەيدەگى باعدارلاماشىنى» الماستىرۋ. ياعني ولار ءبىزدىڭ جاساندى ينتەللەكتىمىزدى بوت رەتىندە قوسادى, وعان تاپسىرما بەرەدى, ال جاساندى ينتەللەكت ادام سياقتى كود جازادى. بولاشاقتا بۇل ۆيرتۋالدى جۇمىسشى پوشتاداعى حابارلامالارعا جاۋاپ بەرىپ, توپتىق جينالىسقا قاتىساتىنداي دارەجەگە جەتۋدى جوسپارلاپ وتىرمىز», دەدى ارسەن.
بۇل ەلەكتروندى ماماندى بارلىق سالا قولدانادى. اسىرەسە تەز شەشىم قابىلداپ, گيپوتەزالاردى سالىستىرا الاتىن جۇمىسشى قاجەت بولسا, ەلەكتروندى مامان دايار. IT-كومپانيالاردا بوس جۇمىس ورنىن وسى بوت-ازىرلەۋشى الماستىرادى. ءتىپتى ءىرى كومپانيالار ۆەب-ازىرلەۋشىلەردى جاساندى ينتەللەكتىمەن الماستىرۋ ارقىلى كوپ اقشا ۇنەمدەمەك. نەگىزى ەلىمىزدە ەندى باستاعان باعدارلاماشىلاردىڭ جالاقىسى ايتارلىقتاي تومەن. ال اقش-تا ءتىپتى جاڭا باستاعان IT-مامانىنا مول اقشا تولەۋ قاجەت. كومپانيانىڭ جاس ماماندارعا ايلىق تولەپ قانا قويماي, وقىتۋ كەرەگىن ەسكەرسەك, بۇل ستارتاپ IT سالاعا تاماشا جاڭالىق اكەلەدى.
ء«بىزدىڭ بوتقا اي سايىنعى جازىلۋ ءۇشىن كومپانيا 149 دوللار تولەيدى. قازاقستانداعى باستاپقى دەڭگەيدەگى باعدارلاماشىلاردىڭ ورتاشا جالاقىسى 400–500 دوللار بولسا, اقش-تا مىڭداعان دوللارمەن ولشەنەدى. سويتە تۇرا, ءبىزدىڭ AI ازىرلەۋشى كولەمدى جۇمىستى اتقارادى. بولاشاقتا ديناميكالىق باعا قويعىمىز كەلەدى. ياعني كليەنت بەلگىلەنگەن سومانى ەمەس, ءبىزدىڭ ءونىمدى ناقتى پايدالانعان سوماسىن عانا تولەيدى», دەپ ءتۇسىندىردى جوبا اۆتورى.
بارىمىزگە بۇل بوتتاردىڭ كومپانياعا قالاي «جۇمىسقا ورنالاساتىنى» قىزىق سەكىلدى. سونى ءتۇسىندىرىپ وتەيىن. ستارتاپ ەكى ازىرلەۋ پلاتفورماسىمەن جۇمىس ىستەيدى: «GitHub» جانە «Jira». جوبا ازىرلەۋشىلەرى كومپانيا مەن بوتتى سول جەرگە قوسادى, سودان كەيىن «Jira»-داعى مەنەدجەر بوتتىڭ اتىن بەلگىلەپ, وعان ادامعا نۇسقاعان سەكىلدى تاپسىرما بەرەدى. ال «GitHub»-تاعى بوت الىنعان نۇسقاۋلارعا سايكەس كود جازادى.
«كومپانيانىڭ كودى «GitHub»-تا ساقتالعان ۆەب-سايتى بار دەلىك. «Jira»-دا مەنەدجەر «فون ءتۇسىن اقتان اشىق سۇرعا وزگەرتىڭىز» دەپ جازا الادى. قاي كودتى جانە قاي فايلدى وزگەرتۋ كەرەك ەكەنىن كورسەتپەي-اق جازادى. بوت بۇل سۇراۋدى وڭدەيدى جانە «GitHub»-تا بولەك بولىمشەگە قاجەتتى كودتى جازادى. سودان كەيىن تيمليد ونى قارايدى, ەگەر ءبارى دۇرىس بولسا, جوباعا قولدانادى», دەدى ءا.قىلىشبەك. وكسفورد ۋنيۆەرسيتەتىنىڭ زەرتتەۋىنە سەنسەك, الداعى بەس جىلدىقتا ەۋروپاداعى جۇمىس ورىندارىنىڭ 40 پايىزىن, اقش-تاعى جۇمىس ورىندارىنىڭ جارتىسىنان كوبىن, دامۋشى مەملەكەتتەردەگى جۇمىس ورىندارىنىڭ ءبىرازىن اۆتوماتتى جۇيە الماستىراتىن بولادى. ارسەن تانىستىرعان جوباعا قاراساق, بۇل زەرتتەۋدىڭ تۇبەگەيلى راس ەكەنىنە ءشۇباسىز سەنەسىز.
