جىل سايىن نازارباەۆ ۋنيۆەرسيتەتى جانىنداعى اقىلدى جۇيەلەر مەن جاساندى ينتەللەكت ينستيتۋتى (ISSAI) ماشينامەن وقىتۋ جانە دەرەكتەر الگوريتمدەرى, جاساندى ينتەللەكت سالاسىندا تاعىلىمداما وتكىزەدى. وندا ءبىلىم مەن پراكتيكالىق داعدىلاردى كەڭىنەن تاراتۋ ماقساتىندا ۋنيۆەرسيتەت ستۋدەنتتەرى مەن جوعارى سىنىپ وقۋشىلارىن قابىلدايدى. ەكى ايلىق تاعىلىمداما بارىسىندا ستۋدەنتتەر زەرتتەۋ ورتالىعى دەرەكتەر تالداۋشىلارىنىڭ مەنتورلىعى, ناقتى كەيستەر, ەرەكشە جوبالارمەن جۇمىس ىستەيدى. بيىل «Summer Research Program» رەكورد ورناتتى. 500-دەن اسا ءوتىنىم ءتۇستى: ونىڭ 186-سى جوعارى وقۋ ورنى ستۋدەنتتەرىنەن بولسا, ال 300-دەن استامى مەكتەپ وقۋشىلارىنان. بۇل الدىڭعى جىلدارمەن سالىستىرعاندا ەكى ەسە كوپ. ستۋدەنتتەردىڭ اراسىنان تەوريالىق جانە پراكتيكالىق داعدىلارى مىقتى 23 ستۋدەنت تاڭدالدى. ولار – وتاندىق جانە شەتەلدىك ستۋدەنتتەر.
«ISSAI» دەرەكتەر تالداۋشىسى اقنۇر قاراباي اتاپ وتكەندەي, ىرىكتەۋ بارىسىندا تابيعي ءتىلدى وڭدەۋ (NLP) جانە كومپيۋتەرلىك كورۋ (CV) جوبالارىندا جۇمىس تاجىريبەسى, اعىلشىن ءتىلىن جەتىك ءبىلۋ جانە جوعارى اكادەميالىق ۇلگەرىم دە ەسكەرىلىپتى. ال قورقىت اتا اتىنداعى قىزىلوردا ۋنيۆەرسيتەتىنىڭ ستۋدەنتى اقجان وسكەلەن جاساندى ينتەللەكت سالاسىنا تەرەڭىرەك ءۇڭىلۋ ءۇشىن ءوتىنىم بەرگەن.
– جاز بويى جاساندى ينتەللەكت جوبالارىمەن جۇمىس ىستەۋ مۇمكىندىگى ماعان وتە ۇلكەن مۇمكىندىك بولىپ كورىندى. باعدارلاما بارىسىندا مەن ۆەب-سكرەپپينگ داعدىلارىمدى ايتارلىقتاي جاقسارتتىم ءارى جاساندى ينتەللەكت تۋرالى تۇسىنىگىمدى تەرەڭدەتتىم. دەرەكتەردى جيناۋ كەزىندە كەيبىر سايتتاردا كۇشتى قورعانىس پەن كۇردەلى قۇرىلىم بولعاندىقتان قيىندىقتار تۋدى, بىراق ءبىزدىڭ مەنتورىمىز باتىر ارىستانبەكوۆ ولاردىڭ شەشىمىن تابۋعا كومەكتەستى, – دەدى اقجان.
«New Uzbekistan» ۋنيۆەرسيتەتىنىڭ ستۋدەنتى كامرونبەك ماماروزيگوۆ ءبىر جىل بويى دەرەكتەر تالداۋشىسى بولىپ جۇمىس ىستەگەننەن كەيىن, جي مەن Big Data بويىنشا ونلاين كۋرستاردى اياقتاعاننان كەيىن وسى ماماندىقتى تاڭداۋعا نىق شەشىم قابىلداعان. باعدارلامادا كامرونبەك BeautifulSoup ارقىلى دەرەكتەر جيناۋ بويىنشا قۇندى تاجىريبە الىپ, مودەلدەردى ءدال باپتاۋدى ۇيرەندى.
– جي بويىنشا ونلاين كۋرستاردان كەيىن مەن العان ءبىلىمىمدى پراكتيكادا قولدانۋ قاجەتتىگىن ءتۇسىندىم. باعدارلاما جازعى دەمالىستى ءتيىمدى وتكىزۋگە, كاسىپقويلارمەن ارالاسۋعا مۇمكىندىك بەردى. ءارتۇرلى ۆەب-سايتتىڭ كوپتىگى قۇندى دەرەكتەردى جيناۋدى قيىنداتتى. بەلگىلى ءبىر سايتتارعا قالاي كىرۋ كەرەگىن ءتۇسىنۋ ءۇشىن بىرنەشە اپتا قاجەت بولدى. الدىن الا دايىندالعان مودەلدى ءدال باپتاۋ قارقىندى جۇمىستى قاجەت ەتەتىن قيىن مىندەت بولدى. دەگەنمەن مەن كەڭىنەن قولجەتىمدى جي تەحنولوگيالارىن جاقسىراق پايدالانۋدى ۇيرەندىم, – دەيدى ول.
«ISSAI» مەكتەپ وقۋشىلارىن دا تاعىلىمدامادان وتكىزدى. بيىل 315 ءوتىنىمنىڭ ىشىنەن 25 ۇمىتكەر تاڭدالدى. ءارتۇرلى وڭىردەن كەلگەن وقۋشىلار روبوت-تەنسەگريتي, ۆيرتۋالدى جانە قوسىمشا شىندىق سالالارىنداعى جوبالارمەن جۇمىس ىستەپ, روبوتتاردى جوبالاۋ, باعدارلامالاۋ, 3D-پرينتەرلەردى قولدانۋ داعدىلارىن ۇيرەندى.
وسىلايشا, «ISSAI» جازعى عىلىمي تاعىلىمداماسى ستۋدەنتتەر مەن مەكتەپ وقۋشىلارىنا جاساندى ينتەللەكت سالاسىندا تابىستى مانساپقا قاجەتتى پراكتيكالىق تاجىريبە مەن ءبىلىم بەرىپ, تسيفرلىق الەمنىڭ ەسىگىن اشتى. مەنتورلار ستۋدەنتتەردىڭ جوعارى دايىندىق دەڭگەيىنىڭ, ۇمىتكەرلەردىڭ بىلىكتىلىگىنىڭ جىلدان-جىلعا ءوسىپ جاتقانىن ايتتى. ءتىپتى «SRP» باعدارلاماسىن ءساتتى اياقتاعان ستۋدەنتتەرگە عىلىمي اسسيستەنت رەتىندە جۇمىس ۇسىنىلماق.
