24 شىلدەدە سانجار تايجاننىڭ بريتاندىق كومپانياسى ينۆەستيتسيالاردىڭ «pre-seed-راۋندىن» ءساتتى وتكىزگەن. «Taisan» جەتەكشى ينۆەستورلارى – «EIT InnoEnergy» جانە «TSP Ventures» بولدى. مامىلەگە «Heartfelt VC» پەن «Exergon» دا قاتىستى. نەگىزىنەن «Eit InnoEnergy» قورىن ەۋروپالىق وداق 2010 جىلى قۇرعان ەدى. بۇل شەشىم جاسىل ەنەرگەتيكا سالاسىنداعى ەسكى يننوۆاتسيالاردى دامىتۋ ءۇشىن كورپوراتيۆتىك سەكتوردىڭ قاتىسۋىمەن جاسالدى. ۇيىمنىڭ قۇرامىنا 36 اكتسيونەر كىرەدى. ونىڭ ىشىندە «Volkswagen», «Renault», «Siemens», «Schneider Electric», «Total Energies», «Santander Bank» بار. قور قازىردىڭ وزىندە 25 ميلليارد ەۋروعا 200-گە جۋىق ءتۇرلى جوبانى قارجىلاندىرىپ وتىر. ال «TSP Ventures» – عالامنىڭ وتكىر كليماتتىق ماسەلەلەرىن شەشەتىن جوبالاردى قارجىلاندىراتىن بريتاندىق قور. سكانديناۆيا ايماعىنداعى «at InnoEnergy» كومپانياسىنىڭ باس ديرەكتورى لاۆينا لۋندسترەم مەن ونىڭ ۇيىمى بىرنەشە جىلدان بەرى وسى سالاداعى ەڭ جوعارى الەۋەتكە يە ناتري-يوندى اككۋمۋلياتورلاردىڭ دامۋىن باقىلاپ كەلە جاتىر. سول سەبەپتى دە وتانداسىمىزدىڭ جەتىستىگى ولاردى قاتتى قىزىقتىرعان.
– بۇعان دەيىن ءبىز بۇل تەحنولوگيانى تىركەلگەن ساقتاۋ جۇيەلەرىنە وپتسيا رەتىندە پايدالانعانىن كوردىك. دەگەنمەن «TaiSan»-دى تاپقان كەزدە ءبىز ناتري-يوندىق اككۋمۋلياتورلاردى تارتقىش باتارەيالار نەمەسە ەلەكتر كولىكتەرىنە ارنالعان جوعارى قۋاتتى باتارەيالار سياقتى جاڭا, كۇردەلىرەك قولدانبالاردى پايدالانۋ مۇمكىندىگىن بىردەن بايقادىق. ءبىز «TaiSan» كومانداسىمەن ىنتىماقتاستىقتى باستاعانىمىزعا وتە قۋانىشتىمىز, – دەدى لۋندسرەم كومپانيانىڭ رەسمي ءباسپاسوز حابارلاماسىندا.
سانجار تايجاننىڭ ءوزى «Forbes.kz» سايتىنا بەرگەن تۇسىندىرمەسىندە الەۋەتتى ينۆەستورلارمەن راۋند وتكىزۋ بويىنشا الدىن الا كەلىسسوزدەر سەگىز ايعا سوزىلعانىن ايتتى.
– ترانزاكتسيانىڭ ءوزى ەكى اپتانىڭ ىشىندە جۇزەگە استى. بۇل – بىزدەگىدەي ينجەنەرلىك-تەحنولوگيالىق ستارتاپ ءۇشىن وتە قىسقا مەرزىم. ءبىزدىڭ ستارتاپتىڭ ەرەكشەلىگى ينۆەستيتسيا كولەمىنەن دە كورىنەدى. بۇل سالا ءۇشىن 1,7 ميلليون ەۋرو – الدىن الا راۋند ءۇشىن وتە جاقسى كەلىسىم. ينۆەستورلار ءداستۇرلى تۇردە باعدارلامالىق قامتاماسىز ەتۋدى ازىرلەۋ سالاسىنداعى ستارتاپتاردى قارجىلاندىرۋعا كوبىرەك ىنتالى, – دەدى وتانداسىمىز.
سونىمەن قاتار ول ءوزىنىڭ دە, ينۆەستورلاردىڭ دا باتارەيا جاساۋدا قولدانىلاتىن تەحنولوگيانىڭ ۇرلانباۋىنا مۇقيات قارايتىنىن اتاپ ءوتتى.
– ءبىزدىڭ سەرىكتەستەر بۇل ماسەلەگە بايىپپەن قارايدى ءارى ولار وسى ماسەلەلەردى شەشۋگە كومەكتەسەدى. باقىتىمىزعا وراي, ءبىز اككۋمۋلياتورلاردى ءارتۇرلى زاۋىتقا سىناقتان وتكىزۋگە جىبەرگەن كەزدە, كونتراگەنتتەرىمىز وتە ساپالى ارەكەت ەتەتىنىن, ءبىزدىڭ قۇقىعىمىزدى بۇزۋعا تىرىسپايتىنىن كوردىك. دەگەنمەن باتارەيالاردى قايتارعان كەزدە, بىرەۋ ولاردى بولشەكتەۋگە نەمەسە «ميكروباعدارلامانى» زەرتتەۋگە تىرىساتىنىن بايقاۋعا بولادى. بىراق مۇنداي وقيعا ءالى بولعان جوق, – دەدى ول.
بۇعان دەيىن سانجار تايجان ءوزىنىڭ ستارتاپىن ۇلىبريتانيادا تىركەگەن ەدى. ونىڭ كومپانياسىندا سەگىز ادام, ونىڭ ىشىندە MIT جانە Imperial College عالىمدارى بار. ولار فۋنكتسيونالدى ناتري-يوندى اككۋمۋلياتورلاردىڭ جاڭا تەحنولوگياسىن ازىرلەپ جاتىر. ازىرلەۋشىنىڭ ايتۋىنشا, ونىڭ باتارەيالارى تەزىرەك زاريادتالادى ءارى ەنەرگيانى كوپ قاجەت ەتپەيدى. ياعني ۇزاق ساپارعا ءبىر زارياد جەتكىلىكتى. سونداي-اق باتارەيالاردىڭ قىزمەت ەتۋ مەرزىمى ۇزاعىراق جانە ءداستۇرلى ليتي-يوندى اككۋمۋلياتورلارعا قاراعاندا قورشاعان ورتاعا زيانى از.
كەيىنگى ەكى جىلدا سانجار تايجان ۇلىبريتانيانىڭ بىرنەشە ۇكىمەتتىك جانە عىلىمي ۇيىمدارىنان, سونىڭ ىشىندە كولىك دەپارتامەنتىنەن, فارادەي ينستيتۋتىنان, innovate UK, وزىق قوزعالتقىشتار ورتالىعىنان, كورولدىك ينجەنەرلىك اكادەميادان شامامەن 500 مىڭ فۋنت ستەرلينگ الدى. ول الەمنىڭ ءارتۇرلى ەلىندەگى اۆياكومپانيالارمەن ىنتىماقتاستىق تۋرالى 10-نان استام مەموراندۋمعا قول قويدى.
