«Tech Orda» تەگىن ۇيرەتەدى
مەملەكەت باسشىسى قازاقستان حالقىنا جولداۋىندا كەمىندە 100 مىڭ IT-مامان دايارلاۋدى تاپسىرا وتىرىپ, جاس, ءبىلىمدى ءارى ىنتالى كادرلاردى قالىپتاستىرۋ كەرەكتىگىن اتاپ وتكەن ەدى. تاپسىرماعا سايكەس تسيفرلىق دامۋ جانە اەروعارىش ونەركاسىبى مينيسترلىگى «Astana Hub» حالىقارالىق تەحنوپاركىمەن بىرلەسىپ, 2021 جىلى 20 مىڭ IT-كادر دايارلاۋدى كوزدەيتىن «Tech Orda» باعدارلاماسىن ىسكە قوستى.
وسىلايشا, مەملەكەت قولداۋىمەن ءار ستۋدەنتكە 600 مىڭ تەڭگە ءبولىنىپ, جىل سايىن 3 مىڭنان استام IT-مامان وقىتۋ جوسپارلاندى. بيىل دا جالعاسىن تاپقان بۇل جوبا شىلدە ايىنىڭ سوڭىنا دەيىن وتىنىمدەردى قابىلدايدى.
بۇل باعدارلامانىڭ ەرەكشەلىگى – ەلىمىزدىڭ 18 بەن 45 جاس ارالىعىنداعى بارلىق ازاماتىنا ءىت-ماماندىقتاردى تەگىن يگەرۋ مۇمكىندىگىن ۇسىنادى. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى اتالعان باعدارلامانىڭ جاڭا لەگىنە قاتىسۋ ءۇشىن جەكە تۇلعالاردان ءوتىنىم قابىلداۋدى باستادى.
«Tech Orda»-نىڭ 2022 جانە 2023 جىلدارداعى ناتيجەلەرىنە قاراپ, ونىڭ بىلىكتى كادرلاردى دايارلاۋداعى جانە ەلىمىزدە IT-سالاسىن دامىتۋعا قوسىپ جاتقان سۇبەلى ۇلەسىن انىق اڭعارۋعا بولادى. بۇعان دەيىن 91 مەكتەپ 6 251 ستۋدەنتتى وقىتتى. باعدارلاماعا تەك ۇلكەن شاھار تۇرعىندارى عانا ەمەس, وڭىرلەردە تۇراتىن ادامدار دا بەلسەندى قاتىسىپ جاتىر. وعان دالەل – IT-مەكتەپتەردىڭ شامامەن 40%-ى جانە ستۋدەنتتەردىڭ 46%-ى ءارتۇرلى ايماقتان جينالعاندىعى. باعدارلاما جەتىستىگىن جۇمىسقا ورنالاسۋدىڭ جوعارى كورسەتكىشتەرى دە راستاپ وتىر. ماسەلەن, تۇلەكتەردىڭ 88%-ى IT-سالاسىندا ءوز ورنىن تاۋىپ, ولاردىڭ ورتاشا جالاقىسى شامامەن 600 مىڭ تەڭگەنى قۇرادى», دەدى تسيفرلىق دامۋ جانە اەروعارىش ونەركاسىبى ءمينيسترى جاسلان ماديەۆ.
ستاتيستيكا بويىنشا «Tech Orda» تۇلەكتەرى «Kaspi.kz», «Halyk Bank», «KPMG», «Ernst&Young», «تەڭىزشەۆرويل», «قازمۇنايگاز», «Freedom Finance», «Kcell», «Air Astana», «Kolesa Group» سياقتى ءىرى كومپانيالاردى قوسا العاندا, 1 079 ۇيىمنان جۇمىس تاپقان. «Astana Hub» بازاسىندا ىسكە اسىرىلىپ جاتقان «Tech Orda» باعدارلاماسى اقپاراتتىق تەحنولوگيالار سالاسىنداعى ادامي كاپيتالدىڭ دامۋىنا باعىتتالعان. ول ۆەب-باعدارلاما ازىرلەۋ, 3D-ديزاين مەن 3D AR/VR قوسىمشالار, باعدارلامالىق قامتاماسىز ەتۋ, كيبەرقاۋىپسىزدىك پەن IoT, جاساندى ينتەللەكت پەن الگوريتمدەرى, ءموبيلدى قوسىمشالار جاساۋدى قوسا العاندا, «Big Data» جانە «GameDev» سەكىلدى نەگىزگى سالالاردىڭ ءبارىن قامتيدى.
«وقىتۋ قازاق, ورىس جانە اعىلشىن تىلدەرىندە جۇرگىزىلسە, ۇزاقتىعى تاڭدالعان كۋرسقا بايلانىستى 6 ايدان باستالادى. فورماتى – يكەمدى, ياعني ونلاين, وففلاين جانە ارالاس. بۇل – ستۋدەنتتەرگە ماماندىقتى يگەرۋدىڭ نەعۇرلىم ىڭعايلى ءتاسىلىن تاڭداۋعا مۇمكىندىك بەرەدى», دەدى «Astana Hub» باسقارۋشى ديرەكتورى ءازيز تىلەۋمۇراتوۆ.
جاساندى زەردەنى مۇعالىمدەر دە مەڭگەرەدى
مەملەكەت باسشىسىنىڭ تاپسىرماسى اياسىندا «Astana Hub» حالىقارالىق تەحنوپاركى بازاسىندا ەلىمىزدىڭ تۇكپىر-تۇكپىرىندەگى وقۋشىلاردى وقىتۋعا ارنالعان ونلاين ءبىلىم بەرۋ پلاتفورماسى ىسكە قوسىلدى. سونداي-اق 300 پەداگوگتى جاساندى ينتەللەكت (AI) پەن ويىندار ازىرلەۋ (Game Development) بويىنشا وقىتۋدى كوزدەيتىن قاناتقاقتى جوبا باستالدى.
«Digital Bridge 2023 حالىقارالىق تەحنولوگيالىق فورۋمىندا مەملەكەت باسشىسى ءبىلىم بەرۋ جۇيەسىن ەڭبەك نارىعىنىڭ كەلەشەكتەگى سۇرانىسىنا بەيىمدەۋ ماڭىزىن اتاپ ءوتىپ, «Astana Hub» بازاسىندا وقۋشىلار ءۇشىن ءبىلىم بەرۋ پلاتفورماسىن ىسكە قوسۋدى تاپسىردى. وسى ماقساتتا ءبىز «edu.astanahub.com» ونلاين ءبىلىم بەرۋ پلاتفورماسىن ىسكە قوستىق. بۇگىندە 19 889 ءبىلىم الۋشىعا باعدارلامالاۋ نەگىزدەرى بويىنشا كۋرستار قولجەتىمدى. بۇدان بولەك, قولدانىستاعى «Tech Orda» باعدارلاماسى شەڭبەرىندە پەداگوگتەردى وقىتۋ شەشىمى قابىلداندى. مۇنداعى ماقسات – مەكتەپ وقۋشىلارىن ودان ءارى شىڭداي تۇسۋگە جاعداي جاساۋ. قازىرگى ۋاقىتتا ەلىمىزدىڭ تۇكپىر-تۇكپىرىندەگى 180 مۇعالىم جانە «ورلەۋ» ورتالىعىنىڭ 120 جاتتىقتىرۋشىسى جاساندى ينتەللەكت جانە «GameDev» باعىتتارى بويىنشا التى ايلىق وقۋدى باستادى», دەدى «Astana Hub» باسقارۋشى ديرەكتورى دانيا احمەتوۆا.
ايتا كەتەيىك, مەكتەپتەگى ينفورماتيكا ءپانىنىڭ مۇعالىمدەرىن جاساندى ينتەللەكت (AI) پەن ويىندار ازىرلەۋگە (Game Development) وقىتۋ بويىنشا قاناتقاقتى جوبانى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, «Astana Hub» حالىقارالىق تەحنوپاركى, وقۋ-اعارتۋ مينيسترلىگى, «ورلەۋ» بىلىكتىلىكتى ارتتىرۋ ۇلتتىق ورتالىعى جانە ى.التىنسارين اتىنداعى ۇلتتىق ءبىلىم اكادەمياسى بىرلەسىپ جۇزەگە اسىرىپ جاتىر.
كۋرس مازمۇنى التى ايعا جوسپارلانعان, ياعني 31 جەلتوقسانعا دەيىن سوزىلادى. وقىتۋ «nFactorial» جانە «Omnium» اتتى جەتەكشى IT-مەكتەپتەردىڭ نۇسقاۋلىعىمەن وتەدى. ونىڭ قورىتىندىسى بويىنشا ءار قاتىسۋشىعا وقۋشىلار مەن پەداگوگتەردى باعدارلامالاۋ نەگىزدەرىنە وقىتۋعا مۇمكىندىك بەرەتىن سەرتيفيكات تابىستالادى.
سونىمەن قاتار «Astana Hub» پرەزيدەنتتىڭ جوعارى وقۋ ورىندارىندا جاساندى ينتەللەكت سالاسىنداعى پاندەردى وقىتۋدىڭ مازمۇنى مەن ادىستەرىن جاڭارتۋ جونىندەگى تاپسىرماسىن ورىنداۋعا كىرىستى. وسى ماقساتتا «Astana Hub» عىلىم جانە جوعارى ءبىلىم مينيسترلىگىمەن بىرلەسىپ, جاساندى ينتەللەكت جانە «GameDev» باعىتى بويىنشا ءبىلىم بەرۋ باعدارلامالارىن ەنگىزۋ جونىندەگى جوبانى قولعا الدى. بۇل باستاما دا مۇعالىمدەردى وقىتۋ ارقىلى جۇزەگە اسىرىلادى.
«OrleTECH» ورگە شىعارادى
استانادا «OrleTECH 3.0» قايىرىمدىلىق جوباسى اياسىندا مۇگەدەكتىگى بار جاستارعا ارنالعان وقۋ لاگەرى باستالدى. لاگەردىڭ اشىلۋىنا «سامۇرىق-قازىنا» اق باسقارما توراعاسى نۇرلان جاقىپوۆ, ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا, «شەلل قازاقستان» كومپانياسىنىڭ كوممەرتسيالىق ماسەلەلەر جونىندەگى باس ديرەكتورى
كۋ ۆالاري قاتىستى.
جوباعا قاتىسۋشىلار ءۇش باعىت بويىنشا تسيفرلىق ماماندىقتى مەڭگەرەدى. اتاپ ايتساق, No code ازىرلەۋ, UX/UI ديزاينى جانە AI مامانى. ەڭ باستىسى, جوبا اياقتالعان سوڭ قاتىسۋشىلارعا جۇمىس تابۋعا كومەك كورسەتىلەدى. وقىتۋ قازاق, ورىس جانە ىمداۋ تىلدەرىندە جۇرگىزىلەدى. جوباعا قاتىسۋعا ەلىمىزدەن 1 500-دەن استام ءوتىنىم كەلىپ تۇسكەن. كەيىن اڭگىمەلەسۋ ناتيجەسىندە مىڭ جارىم ۇمىتكەردەن 18 بەن 35 جاس ارالىعىنداعى 180 ادام ىرىكتەلدى. كوپشىلىگى ءارتۇرلى مۇگەدەكتىگى بار ستۋدەنتتەر.
«ەرەكشە قاجەتتىلىكتەرى بار جاستاردى ديدجيتال ماماندىقتارىنا ساي وقىتىپ, الەۋمەتكە بەيىمدەپ, جۇمىسقا ورنالاسۋعا كومەكتەسۋ وتە ماڭىزدى. جىل باسىنان بەرى 100-دەن استام ادام قور توبىنداعى كومپانيالارعا قىزمەتكە ورنالاستى. ءدال وسى جۇيەنى ءبىز ودان ءارى بەلسەندى تۇردە جالعاستىرامىز», دەدى «سامۇرىق-قازىنا» قورىنىڭ باسشىسى نۇرلان جاقىپوۆ.
بۇل لاگەر تەك استانا قالاسىندا وتپەيدى. ەلىمىزدىڭ وزگە دە وڭىرلەرىندە قاتىسۋشىلار باس قوسادى. ءارى قاراي ولار وسى جىلدىڭ قاراشا ايىنا دەيىن جالعاساتىن ونلاين وقىتۋعا كىرىسەدى. ايتا كەتەيىك, «OrleTECH 3.0» جوباسىن «سامۇرىق-قازىنا» اق بىرىڭعاي قايىرىمدىلىق وپەراتورى – «Samruk-Kazyna Trust» قورى «شەلل قازاقستان» كومپانياسىمەن بىرلەسىپ جۇزەگە اسىرىپ جاتىر.
IT-مەكتەپتەر كورمەسى
«Astana Hub» الاڭىندا كورمە ۇيىمداستىرىلىپ, مۇندا ەلوردالىق 24 IT-مەكتەپ – «Tech Orda» باعدارلاماسىنىڭ قاتىسۋشىلارىنا ءوز قىزمەتتەرىن تانىستىردى. 100-دەن استام الەۋەتتى ستۋدەنت وسى كورمەگە قاتىسىپ, باعدارلامانىڭ كۋرستارى جانە باعىتتارى جايلى ەگجەي-تەگجەي ماعلۇمات الدى.
بيىل «Tech Orda» باعدارلاماسى اياسىندا IT-مامانداردى دايارلايتىن 77 IT-مەكتەپ اككرەديتتەۋدەن ءوتىپ, 169 ءتۇرلى كۋرس ۇسىنىلدى. باعدارلاما جاساندى ينتەللەكت پەن الگوريتمدەرى, ءموبيلدى قوسىمشالاردى جاساۋ, باعدارلامالىق قامتاماسىز ەتۋ, كيبەرقاۋىپسىزدىك پەن IoT, ۆەب-باعدارلاما ازىرلەۋ, 3D-ديزاين مەن 3D AR/VR, Big Data جانە GameDev سىندى IT-سالاسىنىڭ وزەكتى باعىتتارىن قامتيدى
«Tech Orda-عا بىلتىردان بەرى قىزىقتىم. باعدارلاما جايلى اعامنان ەستىدىم. ول وسى وقىتۋعا قاتىسىپ, «Java» باعىتىن مەڭگەرىپ الدى. بيىل 18 جاسقا تولىپ, مەن دە بىردەن ءوتىنىم بەرۋگە بەل بۋدىم. «Golang» باعدارلامالاۋ تىلىنە ىقىلاسىم جوعارى. كاسىبي شىڭدالۋىم ءۇشىن ناقتى باعدارلامالاۋ ورتاسىنا ماماندانۋدى جوسپارلاپ وتىرمىن», دەدى IT-مەكتەپتەر كورمەسىنە قاتىسۋشى ەراسىل قايىرجان.
ءىس-شارادا اقپاراتتىق تەحنولوگيالار سالاسىنداعى باعىتتى تاڭداۋعا قاتىستى ساراپتامالىق پىكىرلەرگە دەن قويىلدى. جەتەكشى ماماندار تاراپىنان ءتۇرلى ۇسىنىس ايتىلىپ, قاتىسۋشىلار پايدالى كەڭەستەر الدى. وسىلايشا, بۇل كورمە سان ءتۇرلى IT-كۋرس پەن باعدارلامانى تەرەڭ تۇسىنۋگە ىقپال ەتتى.
«Tech Orda» بىرەگەي مۇمكىندىكتەر ۇسىنادى. باعدارلاماعا قاتىسۋشى ىنتالى ءارى جىگەرلى ستۋدەنتتەردىڭ ءوز ومىرلەرىندە اۋقىمدى وزگەرىستەر جاساعانى جايلى كوپتەگەن جارقىن مىسال بار. ولار از ۋاقىتتا IT-سالاسىنداعى ماماندىقتى يگەرىپ, وزدەرىنىڭ مۇلدەم باسقا الەۋەتىن اشتى. باعدارلاماعا قاتىسۋعا نيەتتى ەلىمىزدىڭ 18 بەن 45 جاس ارالىعىنداعى بارلىق ازاماتى ءوتىنىم بەرىپ, ءبىر نەمەسە بىرنەشە مەكتەپتىڭ 5 اككرەديتتەلگەن كۋرسىن تاڭداي الادى. بىرنەشە مەكتەپتەن گرانت العان جاعدايدا ۇمىتكەرگە ءبىر كۋرستى تاڭداۋ قاجەت بولادى», دەدى «Astana Hub» قارجىلاندىرۋ ءوفيسىنىڭ ديرەكتورى اناربەك وتەعۇلوۆ.
اتالعان كورمە الماتى قالاسىندا دا ءوتتى, وندا 26 IT-مەكتەپ ءوز كۋرستارىن ۇسىنىپ, قاتىسۋشىلاردىڭ سۇراقتارىنا جاۋاپ بەردى. ءىس-شارا اياسىندا دوڭگەلەك ۇستەل ۇيىمداستىرىلدى. مۇندا IT-مەكتەپ وكىلدەرى IT-ءبىلىم بەرۋ سالاسىنداعى زاماناۋي ۇردىستەر مەن سىن-قاتەرلەردى تالقىلاپ, ءوزارا تاجىريبە الماستى.
