داۋلەتتى قالاعا ساۋلەتى ءار بەرمەيتىن ءارى تۇرۋعا دا جارامسىز بۇل ۇيلەر الداعى ەكى-ءۇش جىلدا تولىقتاي سىرىلاتىن بولدى. ويتكەنى وبلىس ورتالىعىندا رەنوۆاتسيا جوباسى باستالدى.
– نەگىزى قالادا تۇرۋعا جارامسىز ۇيلەردىڭ تۇرعىندارىن باسقا جايلارعا كوشىرۋ 2021 جىلى باستالعان ەدى. سول جىلى 267 پاتەرگە باعالاۋ جۇرگىزىلىپ, تۇرعىندارعا وتەماقى تولەۋ كوزدەلدى. بۇل ماقساتقا بيۋدجەتتەن 1,5 ملرد تەڭگە قاراستىرىلدى. ناتيجەسىندە, 144 ءۇيدىڭ تۇرعىندارى جالپى سوماسى 970 ملن تەڭگەنى قۇرايتىن ءتيىستى وتەماقىلارىن الدى. ال قالعان 116 ۇيگە وتەماقى بەرىلمەدى. نەگە؟ ويتكەنى كەيبىر پاتەرلەردىڭ مۇراگەرلىك ماسەلەسى دۇرىس شەشىلمەگەن بولىپ شىقتى. كەيبىر پاتەرلەردىڭ ناقتى يەسىن انىقتاۋ مۇمكىن بولمادى. وتەماقى مولشەرىن ازسىنعان ادامدار دا بولدى. بىلتىردان بەرى قالاداعى اپاتتى ۇيلەردى بۇزىپ, ولاردىڭ تۇرعىندارىن باسقا جايلارعا كوشىرىپ جاتىرمىز. قالادا ءۇي قۇرىلىسىن جۇرگىزۋ اۋاداي قاجەت. ويتكەنى سۇرانىس جوعارى, – دەيدى جەزقازعان قالاسىنىڭ اكىمى قايرات شايجانوۆ.
ول قالادا باستاۋ العان رەنوۆاتسيا جوباسىنا بيۋدجەتتەن ەشقانداي قاراجات جۇمسالمايتىنىن ايتقاندا سەنەر-سەنبەسىمىزدى بىلمەي قالدىق. سوندا قالاي؟ سويتسەك, ماسەلە بىلاي ەكەن.
قالاداعى رەنوۆاتسيا جوباسىنا قاتىستى قۇرىلىس جۇمىستارىن جۇرگىزۋدى ا.بايدىلداەۆ باسقاراتىن «سامعا» فيرماسى ءوز موينىنا الدى. فيرما بۇرىنعى اعاش ۇيلەردىڭ تۇرعىندارىنا قازىر قانشا كولەمدەگى پاتەردە تۇرىپ جاتىر, ءوزى سالاتىن ۇيدەن ناق سونداي كولەمدى تەگىن بەرەدى. ال ەگەر جاڭا پاتەردەگى كولەم بۇرىنعىدان اسىپ كەتەتىن بولسا, سول ارتىق كولەمنىڭ عانا اقىسىن تولەيدى. تۇرعىندار مۇنداي ۇسىنىسقا تولىق قولداۋ تانىتىپ وتىر.
قازىر «سامعا» قالانىڭ اباي كوشەسىنىڭ بويىنداعى بىرنەشە شاعىن ساۋدا نۇكتەلەرىن ساتىپ الىپ, سول دۇڭگىرشەكتەردى سىرىپ تاستاپ, 48 پاتەرلىك ءۇيدىڭ قۇرىلىسىنا كىرىسىپ تە كەتتى. بۇل ءۇي 2025 جىلى ناۋرىزدا پايدالانۋعا بەرىلەدى. سول كەزدە وسى ءۇيدىڭ ماڭايىنداعى «اعاش ۇيلەردىڭ» تۇرعىندارىنا جاڭادان سالىنعان ۇيدەن پاتەرلەر بەرىلەدى. ولار بۇرىنعى پاتەرلەرىن «سامعاعا» وتكىزەدى. ال فيرما سول ۇيلەردى سىرىپ تاستايدى دا, ورنىنا تاعى دا جاڭا ۇيلەر سالادى.
– قۇرىلىس جۇرگىزۋ ءۇشىن ەڭ كەرەگى – جەر. بۇل ماسەلەنى ءبىز قالانىڭ ورتالىعىنداعى ەسكى ۇيلەردى سىرۋ, بۇزۋ ارقىلى شەشۋدى ۇيعاردىق. قابىلدانعان شەشىم قالاعا دا, تۇرعىندارعا دا, فيرماعا دا پايدالى بولدى دەگەن ويدامىز. بۇل جوبا الداعى ءۇش جىلدى قامتيدى, – دەيدى قايرات ابدوللا ۇلى.
سونىمەن, جەزقازعان جاڭارعالى جاتىر. جوبا بويىنشا بارلىعى 23 ءۇي بۇزىلادى. بۇلاردا 184 پاتەر بار. ولاردىڭ بارلىعىنا سول سىرىلعان ورىندارعا سالىناتىن 48 نەمەسە 60 پاتەرلىك 6 ۇيدەن جاڭا پاتەرلەر بەرىلەدى. ال قالعانىن فيرما نارىق باعاسىمەن ساتادى.
ىزدەنە بىلسە, كەز كەلگەن تىعىرىقتان شىعۋعا بولاتىنى جونىندە كوپ ايتىلادى. جەزقازعانداعى رەنوۆاتسيا جوباسى – وسىنىڭ ناقتى كورىنىسى ىسپەتتى. ايتپەسە كوپتەگەن جىل بويى ايتىلىپ, بىراق ناقتى شەشىمى تابىلماي كەلە جاتقان وتكىر ماسەلەنىڭ ءتۇيىنىن بيۋدجەتكە ەشقانداي سالماق تۇسىرمەي-اق تارقاتۋدىڭ جولىن تاۋىپ, سول جوبانى ىسكە اسىرۋعا كىرىسۋدى باسقاشا قالاي باعالاۋعا بولادى؟
جەزقازعان قالاسى
