كوللاجدى جاساعان – امانگەلدى قياس, «EQ»
ماسەلەن, وليمپيادانىڭ 23 دۇركىن چەمپيونى مايكل فەلپس بىرنەشە رەت پسيحيكالىق داعدارىسقا تۇسكەن. ءتىپتى كۇيزەلىستەن قۇتىلۋ ءۇشىن كۇماندى كۇشەيتكىشتەردى دە پايدالانعان. بۇل تۋرالى امەريكالىق سپورتشى باق وكىلدەرىنە جاقىندا عانا مالىمدەدى. توماعا-تۇيىق مايكل ومىرلىك قيىندىقتارى تۋرالى ايتۋدى مۇلدە ۇناتپاعان. سول سەبەپتى 19 جاسىنان باستاپ دەپرەسسياعا جىل سايىن ءتۇسىپ وتىرعان. دەرتى ەرەكشە مەڭدەپ كەتەتىن مەزگىل – قازان مەن قاراشا ايلارى, ياعني ءجۇزۋ ماۋسىمى اياقتالعان كەز ەكەن. وسى ايلاردا فەلپستى 2004 جىلى كولىكتى ماس كۇيىندە باسقارعانى ءۇشىن ۇستاپ السا, 2008 جىلى ماريحۋانا شەككەنى ءۇشىن جازاعا تارتقان.
«التىن دوپتى» العاننان كەيىن رونالدينونىڭ دا جاساماعان جۇمىسى جوق: رەپ وقىدى, كليپكە ءتۇستى, «RS Coin» اتتى جەكە كريپتوۆاليۋتاسىن ىسكە قوستى, تۋعان قالاسى برازيليادا ساياساتپەن اينالىستى, سوڭىندا بالىق شارۋاشىلىعىن قولعا الدى. اقىرى ونى ۇكىمەت زاڭسىز دەپ تاۋىپ, 178 ەۋروعا ايىپپۇل سالدى. سونىڭ كەسىرىنەن فۋتبولشى ماسكۇنەمدىك پەن ناشاقورلىققا بوي ۇرعان.
سپورتشىلاردىڭ ءوزىن جوعالتىپ الۋىنىڭ تاعى ءبىر سەبەبى – وقىستا العان جاراقاتى. الداعى بۇكىل مانسابىنا نۇكتە قويىلعاننان كەيىن ومىردەن تۇك ماعىنا كورمەي كەتەدى.
ەسىمە مىنا ءبىر اڭگىمەنىڭ ءتۇسىپ وتىرعانى. بالىق اۋلاپ وتىرعان شالعا بىرەۋ كەلىپ «التىن بالىق ۇستاساڭ, نە سۇرايسىڭ؟» دەپ قويىپ قالىپتى.
– اقشا سۇرايمىن.
– ونى قايتەسىڭ؟
– تويىپ تاماق ىشەمىن.
– ودان كەيىن شە؟
– جاقسىلاپ كيىم كيەمىن.
– ودان كەيىن شە؟
– ءزاۋلىم ساراي تۇرعىزامىن.
– ودان كەيىن شە؟
– ءۇيدىڭ جانىنداعى وزەننەن بالىق اۋلاپ جاتامىن.
كەي كەزدە التىنعا ۇمتىلعان سپورتشىلاردىڭ, تەك قانا ولاردىڭ ەمەس, بيلىككە, بايلىققا تالاسقان بارلىق ادامنىڭ ومىرلىك ۇستانىمى جوعارىداعى بالىقشىنىڭ اڭگىمەسىنە قاتتى ۇقساپ كەتەدى.
ودان كەيىن نە ىستەيسىڭ؟ ونى ەشكىم بىلمەيدى. بالكىم, جاۋابى وكىندىرەتىن سۇراقتى قويماي-اق قويۋدى دۇرىس سانايتىن شىعار. كىم ءبىلسىن؟
بىراق مىنانى تۇسىنەتىن ۋاقىت جەتتى. ومىردە ەشكىم ءابسوليۋتتى جەڭىمپاز بولمايدى. باقىت قۇسى بايانسىز اعاشقا ۇيا سالمايدى. ءدال قازىرگى ءساتتى سەزىنىڭىز. ءسىزدىڭ ەنشىڭىزدە سول عانا بار.
