اگرووندىرىس ينۆەستورىن مەملەكەت قولدايدى
حالىقارالىق ءىس-شارانىڭ باستى ماقساتى – اۋىل شارۋاشىلىعى عىلىمىنىڭ جەتىستىكتەرىن پايدالانىپ, اگروونەركاسىپ كەشەنىنە زاماناۋي تەحنولوگيالاردى ەنگىزۋدى جەدەلدەتۋ, وعان قوسا سالانى تسيفرلاندىرا وتىرىپ, دامۋدىڭ جاڭا بيىگىنە كوتەرىلۋ.
«مەملەكەت باسشىسى اۋىل شارۋاشىلىعى ءونىمى كولەمىن 5 جىلدا 2 ەسە ارتتىرۋ جونىندە ۇكىمەتكە تاپسىرما بەردى. بۇل اگروونەركاسىپتىك كەشەنگە زاماناۋي اگروتەحنولوگيالاردى جەدەل ەنگىزۋدى, اگرارلىق عىلىم جەتىستىكتەرىن پايدالانۋدى, جوعارى ءونىمدى تەحنيكا مەن تسيفرلىق تەحنولوگيانى قولدانۋدى تالاپ ەتەدى. كورمە ءوندىرىس تيىمدىلىگىن ارتتىرۋعا ارنالعان قاجەتتى قۇرالدار مەن شەشىمدەردى ءبىر جەردە كورۋگە مۇمكىندىك بەرەتىن ۇلكەن دەمونستراتسيالىق الاڭ», دەدى مينيستر.
كورمەدە ءوزىنىڭ سەرۆيسى مەن تاۋارىن ۇسىنىپ جانە تاجىريبە الماسىپ, شۇيىركەلەسكەن مىڭداعان شارۋا ادامىن كوردىك. ءىس-شارانىڭ ىسكەرلىك باعدارلاماسىنىڭ اۋقىمدى بولۋى سالانىڭ جەتىلگەنىن, شارۋالاردىڭ جاڭا تەحنولوگيالار مەن زاماناۋي شەشىمدەرگە دەگەن قىزىعۋشىلىعىن اڭعارتادى. اۋىل شارۋاشىلىعى سالاسىنىڭ جۇمىسىنا بەلسەنە ارالاسىپ, سوڭعى ۇلگىدەگى تەحنولوگيا مەن تەحنيكاسىن, سونى ازىرلەمەلەرىن ۇسىنعان فرانتسيا, اقش جانە گەرمانيا ەلشىلىكتەرى شارانىڭ سالماعى مەن مازمۇنىن ارتتىرا ءتۇستى.
«ەلىمىزدى ەكسپورتقا ارنالعان تاۋارلار مەن قىزمەتتەردى ءوندىرۋ الاڭى رەتىندە قاراستىرۋعا دايىن ءاربىر ينۆەستورعا ەسىگىمىز اشىق, قۇرمەتىمىز زور. ويتكەنى سالاداعى ءوندىرىستى ۇلعايتىپ, پايدالى ەكسپورت جاساۋعا ەلىمىزدە تولىق مۇمكىندىك بار. ەۋرازيا كىندىگىندە ورنالاسقان ەلدىڭ اۋىل شارۋاشىلىعى جەرىنىڭ اۋدانى 200 ملن گەكتاردان اسادى. ونىڭ 25 ميلليونى – ەگىستىك, قالعان 180 ميلليونى – مال جايىلىمى. بۇل اۋىل شارۋاشىلىعى ءوندىرىسىن كەڭەيتۋگە وراسان زور مۇمكىندىك بەرەدى», دەدى ا.ساپاروۆ.
ونىڭ سوزىنشە, وسىمدىك پەن مال شارۋاشىلىعىنداعى بارلىق تەحنولوگيالىق ۇدەرىس ىسكە اسىرىلاتىن ينۆەستيتسيالىق جوبانىڭ 25%-دان 50%-عا دەيىنگى تولەمى مەملەكەت تاراپىنان وتەلەدى. جەڭىلدەتىلگەن نەسيە مەن ليزينگ ۇزاق جانە ورتا مەرزىمگە بەرىلەدى. اۋىل شارۋاشىلىعى سالاسى ءۇشىن ارنايى سالىق رەجىمى بار. وتاندىق جانە شەتەلدىك ينۆەستورلارعا جان-جاقتى قولداۋ كورسەتىلەدى.
كوپ فەرمەردىڭ جولىن اشقان شارا
«قازاگروقارجى» اق كورمە پاۆيلونىندا اۋىل شارۋاشىلىعىنىڭ تاۋار وندىرۋشىلەرى ءۇشىن «اشىق ەسىك كۇنىن» وتكىزدى. وندا بارلىق وڭىردەن كەلگەن فەرمەرلەر مەن سالا ماماندارى اكتسيونەرلىك قوعام باسشىلارىنا تولعاقتى سۇراعىن قويىپ, ءتۇيىندى ماسەلەنىڭ شەشىمىن ىزدەدى. «قازاگروقارجى» باسشىلىعى ماۋسىم ايىندا ىسكە قوسىلعان جاڭا جەڭىلدەتىلگەن باعدارلاما تۋرالى اقپارات بەردى.
«بۇگىن ءاربىر تۇتىنۋشىنىڭ قاجەتتىلىگى مەن جاعدايىن جاقسى ءتۇسىنۋ ماقساتىندا «اشىق ەسىك كۇنىن» وتكىزۋدى ءجون كوردىك. بۇل امال كليەنتتەرىمىزدى مازالاپ جۇرگەن ماسەلە مەن سۇرانىسىن جانە كومپانيانىڭ وسال تۇستارىن انىقتاۋعا كومەكتەسەدى. قازىر كەڭەس الۋعا اقمولا, قاراعاندى, سولتۇستىك قازاقستان مەن پاۆلودار وبلىستارىنىڭ فەرمەرلەرى كەلىپ وتىر. جۇمىستىڭ باسىندا جۇرگەن ازاماتتارعا سالانىڭ كەمشىلىگى ايقىن كورىنەدى. الىستان كەلگەن فەرمەردىڭ ارقاسىندا اۋىل شارۋاشىلىعى سالاسىندا نەنى جاقسارتىپ, نەنى قوسۋ كەرەگىن انىق ءبىلىپ الدىق. پىكىرلەر مەن ۇسىنىستاردى تىڭداپ, ونى تەز ارادا شەشۋگە اتسالىستىق», دەدى «قازاگروقارجى» اق باسقارما توراعاسى ايدار پراشەۆ.
تاياۋدا كومپانيا «بايتەرەك» حولدينگىنىڭ قولداۋىمەن اۋىل شارۋاشىلىعى سۋبەكتىلەرىن قولداۋ ماقساتىندا 100 ملرد تەڭگە سوماسىنا جىلدىق 5%-دىق جەڭىلدەتىلگەن ليزينگ باعدارلاماسىن ىسكە قوستى. ليزينگ 7 جىل مەرزىمگە بەرىلەدى جانە 10% اۆانستىق تولەم 1 جەلتوقسانعا دەيىن كەيىنگە شەگەرىلگەن. سونىمەن قاتار ەشقانداي كەپىلدىك تالاپ ەتىلمەيدى. بۇل – فەرمەرلەرگە تەحنيكا پاركىن جاڭارتۋعا جانە ءوندىرىس تيىمدىلىگىن ارتتىرۋعا تاماشا مۇمكىندىك.
