فوتو: assembly.kz
ەلدەگى بەيبىتشىلىك پەن كەلىسىم تاقىرىبىن, قازاقستاندى مەكەن ەتكەن ەتنوستاردىڭ مادەني بايلانىستارىن نىعايتۋعا باعىتتالعان باستامانى قۇرۋ يدەياسى ۇلتتىق قۇرىلتايدىڭ ءۇشىنشى وتىرىسىندا ايتىلعان وزەكتى ويلاردان تۋىنداعان. جوبا جەتەكشىسى – پارلامەنت سەناتىنىڭ دەپۋتاتى نۇريا نيازوۆا. تۇتاس ەل اۋماعىن قامتيتىن جوبا بىرنەشە باعىتتا جۇمىس ىستەمەك. دالىرەك ايتقاندا, مادەنيەت, ونەر, ءبىلىم سالاسىنا قولداۋ كورسەتىپ, ەتنومادەني ورتالىقتاردىڭ رۋحاني بايلانىسىن نىعايتۋعا باعىتتالعان بايقاۋلار ۇيىمداستىرۋ, ولاردى ءوزارا تۇسىنىستىككە, ورتاق بىرلىككە تاربيەلەيتىن ءىس-شارالارعا باستاماشى بولۋ كوزدەلگەن. جاڭادان قانات قاققان جوبا كەلەر جىلدىڭ ورتاسىنا دەيىن وسى باعىتتا 100-گە تارتا ءىس-شارا ۇيىمداستىرۋدى جوسپارلاپ وتىر.
«الەم كۇن سايىن قۇبىلىپ جاتقان كەزەڭدە بىرلىك پەن ىنتىماق باستى قۇندىلىقتارىمىزدىڭ ءبىرى ەكەنىن تۇسىنۋگە ءتيىسپىز. ۇلتتىق قۇرىلتايدا پرەزيدەنت قاسىم-جومارت توقاەۆ: ء«بىز «بىرلىگىمىز – ارالۋاندىقتا» دەگەن قاعيدانى بەرىك ۇستانىپ, ەلىمىزدەگى بەيبىتشىلىك پەن كەلىسىمدى ساقتايتىن بولامىز», دەگەن ەدى. جوبا وسى قاعيدانى جۇزەگە اسىرۋ ماقساتىندا قازاقستان حالقى اسسامبلەياسى حاتشىلىعىنىڭ قولداۋىمەن قۇرىلىپ وتىر. جوبا نەگىزىنەن قازاقستانداعى مادەنيەتتەردىڭ ارتۇرلىلىگىن جانە مادەنيەتارالىق سيمبيوزدى كورسەتۋگە باعىتتالعان. ەتنومادەني بىرلەستىكتەر, شىعارماشىلىق زيالى قاۋىم, قوعام بىرلىگىنىڭ فاكتورى رەتىندە قازاقستان حالقىنىڭ مادەني ارالۋاندىعىن ناسيحاتتاپ, حالقىمىزدىڭ مادەنيەتىن, ادەت-عۇرپىن, سالت-ءداستۇرىن قۇرمەتتەپ, مەملەكەتتىك ءتىلدى جەتىك ءبىلىپ, وتانعا دەگەن سۇيىسپەنشىلىك مۇراتتارىن ناسيحاتتاۋعا ۇلەس قوسسا يگى. قحا-نىڭ رەسپۋبليكالىق جانە وڭىرلىك وكىلدىكتەرى, ازاماتتىق اليانس, جۋرناليستەر, بلوگەرلەر, مادەنيەت جانە اقپارات, ءبىلىم, عىلىم جانە جوعارى ءبىلىم مينيسترلىكتەرى, استانا, الماتى, شىمكەنت قالالارىنىڭ جانە وبلىستاردىڭ اكىمدىكتەرى جوبانى قولداپ وتىر», دەيدى نۇريا نيازوۆا.
الماتى قالاسى ازاماتتىق اليانسىنىڭ توراعاسى قايىرجان ابدىحالىقوۆ جوبا اۋديتورياسى ەرەسەك ادامدارمەن قاتار بالالاردى دا قامتيتىنىن اتاپ ءوتتى. ول كەلەر جىلعى قحا-نىڭ 30 جىلدىعىنا دەيىن كوپتەگەن مادەني, تاريحي فەستيۆالدار ۇيىمداستىرا وتىرىپ, جاس جەتكىنشەكتەردى شابىتتاندىرۋ, ورتالىق قالالاردى عانا ەمەس, ايماقتار مەن تۇكپىردەگى اۋىلداردىڭ تۇرعىندارىن دا جوباعا تارتۋ كوزدەلەتىنىن جەتكىزدى.
«رەسپۋبليكا كۇنى قارساڭىندا الماتى قالاسىنداعى بارلىق وزگە ەلدەر كونسۋلدىقتارىنىڭ وكىلدەرىن وتباسىمەن بىرگە ءبىر الاڭدا جيناۋدى جوسپارلاپ وتىرمىز. ولار جانە ولاردىڭ بالالارى مەملەكەتتىڭ ىنتىماق پەن بىرلىككە نەگىزدەلگەن تىڭ باستامالارىمەن تانىسىپ, وڭ اسەر الادى دەگەن ويدامىز. جوبا نەگىزىنەن مادەني باعىتتاردى قامتيتىندىقتان, تەاترلار مەن ونەر وشاقتارىن قولداۋ, ۇيعىر, كورەي تەاترلارىنداعى بىرلىك تاقىرىبىن ارقاۋ ەتكەن قويىلىمداردى جەتىلدىرۋ, بالالار مەن جاستاردى بىرلىك ۇعىمىنا تاربيەلەيتىن باستامالاردى ىلگەرىلەتۋ ماڭىزدى», دەيدى قايىرجان ابدىحالىقوۆ.
جوبا جەتەكشىلەرىنىڭ ايتۋىنشا, مادەني ساباقتاستىققا ماڭىز بەرۋمەن قاتار باستاماشى توپ قوعامنىڭ سان سالاسىندا بولىپ جاتقان كۇرمەۋى كوپ كۇردەلى ماسەلەلەردىڭ ءتۇيىنىن تارقاتۋعا اتسالىسپاق.
الماتى
