ۇلتتىق دومبىرا كۇنى قارساڭىندا يندەر اۋدانىنىڭ ورتالىعى يندەربور كەنتىندە ەرەكشە ءىس-شارا ءوتتى. وسىنداعى ورتالىق ساياباققا دومبىرا مونۋمەنتى قويىلدى. اۋدان اكىمى دارىن شامۇراتوۆتىڭ ايتۋىنشا, التىن تۇستەس مەتالدان قۇيىلعان مونۋمەنتتىڭ جالپى بيىكتىگى – 7,5 مەتر. ءبىر ەرەكشەلىگى, دومبىرا مونۋمەنتى تۇنگى مەزگىلدە دە جارقىراپ تۇرادى.
«دومبىرا – سان عاسىردان بەرى ۇلتتىڭ رۋحىن بيىكتەتكەن, تالاي ۇرپاقتىڭ بەسىگىن تەربەپ, ەرلىك پەن ەلدىكتىڭ, ادالدىق پەن ادامدىقتىڭ كۇيىن شەرتكەن ۇلتتىق اسپابىمىز. قازاقتىڭ دومبىراسى ارقىلى ۇلتتىق مادەنيەتىمىزدى قالىپتاستىرعان اقىن-جىراۋلار, كۇيشى-دومبىراشىلار از ەمەس. دومبىرا مونۋمەنتىن اتىراۋ توپىراعىنان ءنار الىپ, كۇيشىلىك, سازگەرلىك ءداستۇردى جالعاستىرعان قازاق كسر-ىنە ەڭبەك سىڭىرگەن مادەنيەت قىزمەتكەرى ابدوللا مۇساعاليەۆتىڭ ەسىمىمەن اتاۋدى ءجون كوردىك», دەيدى دارىن شامۇراتوۆ.
اكىمنىڭ ايتۋىنشا, دومبىرا مونۋمەنتىن اشۋ يدەياسىنىڭ استارىندا ەكى ماقسات بار. ءبىرىنشىسى – جاس ۇرپاققا ۇلتتىق قۇندىلىقتى ناسيحاتتاۋ. ال ەكىنشىسى – كۇيشىلىك ونەردى كەيىنگى بۋىنعا جەتكىزگەن ابدوللا مۇساعاليەۆ سەكىلدى ونەر ساڭلاقتارىنىڭ ەل جادىندا ساقتالۋىنا ىقپال ەتۋ.
«ابدوللا دومبىراسى» مونۋمەنتىنە جەرگىلىكتى ونەرپازدار ءادىل ەسقاليەۆ, ماجان ەسقازيەۆ, ماۋلەت قاراساەۆ, تۇرعانالى ۇسەنعاليەۆ, قۋانىشقالي قاراقۇلوۆ, ءۇنزيرا ومىرباەۆا, قاناپيا ماحمەتوۆانىڭ ەسىمى دە قاشالىپ جازىلعان. ويتكەنى ولاردىڭ ءبارى 1958 جىلى قازاقستان ادەبيەتى مەن ونەرىنىڭ ماسكەۋدەگى ونكۇندىگىنە يندەر اۋدانىنان قاتىسقان.
دومبىرا مونۋمەنتى «ARSM» جشس-نىڭ نەگىزىن قالاعان جەرگىلىكتى كاسىپكەر ج.ءشارىپوۆتىڭ دەمەۋشىلىگىمەن ورناتىلعان. كاسىپكەر يگىلىكتى ىسكە 6 ميلليون تەڭگە قاراجات ءبولىپتى.
اتىراۋ وبلىسى
