مۇنىڭ ءبارى الەمدە ۇيىمنىڭ ءرولى ۇلعايىپ كەلە جاتقانىن بىلدىرەدى. مۇنى جيىننىڭ كۇن تارتىبىندە ءتۇرلى كەلەلى ماسەلەنىڭ كوتەرىلۋىنەن دە كورۋگە بولادى. قازاقستان تاراپى شىۇ ۇيىمىنىڭ 2035 جىلعا دەيىنگى دامۋ ستراتەگياسىن ۇسىنىپ جاتىر. ودان بولەك «شىۇ-نىڭ ەنەرگەتيكالىق ستراتەگياسى» قابىلدانادى. سونىمەن قاتار ەلىمىز 2024 جىلدى شىۇ اياسىندا «ەكولوگيا جىلى» دەپ جاريالاۋدى ۇسىندى. قورشاعان ورتانى قورعاۋ بويىنشا مۇشە مەملەكەتتەر باسشىلارى مامىلەگە قول قويماق.
شانحاي ىنتىماقتاستىق ۇيىمىن ودان ءارى دامىتۋدىڭ باسىم باعىتىنىڭ ءبىرى – ەكونوميكالىق وركەندەۋ, ساۋدا بايلانىستارىن نىعايتۋ. ءبىزدىڭ تاراپتان شىۇ ينۆەستيتسيالىق قورىن قۇرۋ يدەياسى جاسالدى. ونىڭ اياسىندا كەڭ كولەمدى ەكونوميكالىق جوبالارعا ينۆەستيتسيا سالىنباق.
سونىمەن بىرگە ەلىمىز ۇيىم اياسىندا ەكونوميكانى دامىتۋعا سەپتىگىن تيگىزەتىن فاكتوردىڭ نەگىزگىسى – كولىك-لوگيستيكا سالاسىن جەتىلدىرۋگە ەكپىن بەرىپ وتىر. شىۇ-عا كىرەتىن ەلدەردىڭ جالپى ەكونوميكاسى الەمدە جەتەكشى ورىن الادى, ناقتى ايتقاندا, الەمدىك ىشكى جالپى ءونىمنىڭ 25 پايىزىن قۇرايدى. دۇنيەجۇزى حالقىنىڭ جارتىسى وسى ايماقتا تۇرادى. بۇل – ۇلكەن الەۋەت. سوندىقتان ەلدەرىمىز اراسىندا جانە الەمنىڭ باسقا دا بولىكتەرىمەن كولىك بايلانىسىن نىعايتۋدىڭ ماڭىزى وراسان.
بۇل قاتىناس جەلىلەرىن جەتىلدىرۋدە قازاق ەلىنىڭ الاتىن ورنى ەرەكشە. ويتكەنى باتىس پەن شىعىستىڭ اراسىنداعى كەڭ اۋماقتى الىپ جاتىرمىز. جاڭعىرعان جىبەك جولىنىڭ كۇرەتامىرى اۋماعىمىزدان وتەدى. سونىڭ قاتارىندا ترانسكاسپي كولىك ءدالىزىن ەرەكشە اتاۋعا بولادى. كۇنى كەشە پرەزيدەنت قاسىم-جومارت توقاەۆ پەن قحر توراعاسى سي تسزينپين ترانسكاسپي حالىقارالىق كولىك باعىتى بويىنشا جۇك كولىكتەرى مەن تەمىرجول كونتەينەرلەرىن جونەلتۋ راسىمىنە تەلەكوپىر رەجىمىندە قاتىسقانى بەلگىلى.
ايماق قاۋىپسىزدىگى, سونىڭ ىشىندە تەرروريزم مەن ەكسترەميزمگە, سەپاراتيزمگە قارسى كۇرەس باعدارلاماسىن جاڭارتۋ – شىۇ اياسىندا قولعا الىناتىن ماڭىزدى شارا. قازىر مۇنى جاڭعىرتۋ قولعا الىنىپ جاتىر. تەرروريزمگە, ەسىرتكى تاسىمالىنا, كيبەرقىلمىسقا قارسى كۇرەسۋ – سونىڭ باستى باعىتتارى.
جانار تولەندينوۆا,
پارلامەنتاريزم ينستيتۋتىنىڭ قامتاماسىز ەتۋ ماسەلەلەرى جونىندەگى اتقارۋشى ديرەكتورى
