ءىس-شارادا ماۋلەن اشىمباەۆ مەملەكەت باسشىسىنىڭ باستاماسىمەن ەلىمىزدە ادىلەتتى قازاقستان قۇرۋ, مەملەكەتتىلىكتى نىعايتۋ, ازاماتتاردىڭ ءال-اۋقاتىن ارتتىرۋ تاعى باسقا كەشەندى رەفورمالار جۇزەگە اسىرىلىپ جاتقانىن اتاپ ءوتتى. بۇل باعىتتاعى بەلگىلەنگەن مىندەتتەردى ورىنداۋ بارلىق مۇددەلى تاراپتىڭ بەلسەندى ءارى جۇيەلى ءوزارا ءىس-قيمىلىن تالاپ ەتەدى. سونداي-اق اتالعان سالادا جۇمىستىڭ جاڭا فورماتى قاجەت.
«پرەزيدەنت قاسىم-جومارت توقاەۆتىڭ باستاماسىمەن قولعا الىنعان رەفورمالاردىڭ ناتيجەسىندە الەۋمەتتىك-ەكونوميكالىق جانە ساياسي سالادا ۇلكەن وزگەرىستەر بولدى. بيلىك تارماقتارىنىڭ اراسىنداعى تەڭگەرىمدىلىك كۇشەيىپ, ساياسي باسەكەلەستىك ارتتى. سونداي-اق مەملەكەتتىك ينستيتۋتتار كەشەندى تۇردە جاڭعىرتىلدى. ناتيجەسىندە, قازىرگى تاڭدا ەل ەكونوميكاسىنىڭ جاڭا ۇلگىسىن قالىپتاستىرۋ ءۇشىن دايەكتى جۇمىستار جۇرگىزىلىپ كەلەدى. مۇنداي ناقتى قادامدار ازاماتتاردىڭ ءال-اۋقاتىن ارتتىرىپ, وڭىرلەردىڭ دامۋىنا تىڭ سەرپىن بەرەدى دەپ سەنەمىز», دەدى سەنات سپيكەرى.
ماۋلەن اشىمباەۆ پارلامەنتتىڭ VIII شاقىرىلىمىنىڭ ەكىنشى سەسسياسىنىڭ جۇمىسى تۋرالى ايتا كەلە, سەنات پەن ءماسليحات بىرلىگىنىڭ ماڭىزدى باسىمدىقتارىنا توقتالدى. سونىمەن قاتار پالاتا سپيكەرى زاڭ شىعارۋ قىزمەتىنە ءماسليحات دەپۋتاتتارى, ساراپشىلار مەن ازاماتتىق قوعام وكىلدەرى بەلسەندى جۇمىلدىرىلعانىن اتاپ ءوتتى. سەنات توراعاسىنىڭ ايتۋىنشا, جەرگىلىكتى وكىلدى ورگانداردىڭ ۇسىنىستارى مەن باستامالارى وڭىرلەردى دامىتۋعا قاتىستى ماسەلەلەردى شەشۋ كەزىندە ماڭىزدى ءرول اتقارۋعا ءتيىس.
«پارلامەنت بۇل سەسسيادا 102 زاڭ قابىلدادى. ونىڭ ىشىندە قوعامدىق باقىلاۋدى كۇشەيتۋ, ايەلدەر مەن بالالاردىڭ قۇقىقتارىن قورعاۋ, ادام ساۋداسىنا قارسى ءىس-قيمىل سياقتى اسا ماڭىزدى ماسەلەلەردى قامتيتىن زاڭدار بار. سەناتورلار ۇنەمى وڭىرلەرگە بارىپ, جەرگىلىكتى جەرلەردەگى ارىپتەستەرىمەن بىرگە تۇرعىندارمەن كەزدەسىپ, وزەكتى پروبلەمالاردى شەشۋ جولدارىن تالقىلادى. ناتيجەسىندە, ۇكىمەتكە جانە ءتيىستى مەملەكەتتىك ورگاندارعا 200 دەپۋتاتتىق ساۋال جولداندى. الداعى سەسسيا كەزىندە دە بىرلەسكەن جۇمىسىمىزدى وسى قارقىنمەن جالعاستىرامىز دەپ سەنەمىن», دەدى م.اشىمباەۆ.
سونداي-اق كەزدەسۋدە مەگاپوليستەگى وزەكتى تۇيتكىلدەر, ناقتى ايتقاندا, ينفراقۇرىلىم جانە لوگيستيكا ماسەلەلەرىن شەشۋ بارىسى تالقىلاندى. اتالعان پروبلەمالاردىڭ وڭ شەشىمىن تابۋ ءۇشىن رەسپۋبليكالىق بيۋدجەتتەن قاراجات ءبولۋ ماسەلەسى دە ءسوز بولدى.
«شىمكەنتتە جەدەل شەشۋدى قاجەت ەتەتىن ماڭىزدى ماسەلەلەر بار. بۇل, ەڭ الدىمەن, مەملەكەت باسشىسىنىڭ تاپسىرماسىمەن حالىقارالىق ساۋدا-لوگيستيكالىق ورتالىعىن سالۋعا قاتىستى ەكەنىن اتاپ وتكەن ءجون. باتىس اينالما جولىن جانە باسقا دا باعىتتارداعى جولداردى سالۋ دا – نەگىزگى مىندەت. شىمكەنت ءۇشىن مۇمكىندىگى شەكتەۋلى جانداردى وڭالتۋ ورتالىعىنىڭ قۇرىلىسى دا وزەكتى. سوندىقتان الداعى سەسسيادا رەسپۋبليكا بيۋدجەتىن قاراعان كەزدە سەناتورلار اتالعان باسىمدىقتاردى, ءماسليحات دەپۋتاتتارىنىڭ ۇسىنىستارىن نازارعا الادى», دەدى م.اشىمباەۆ.
ساپار بارىسىندا سەنات توراعاسى شاھاردىڭ بەلسەندى جاستارىمەن كەزدەسىپ, رەفورمالاردى ىسكە اسىرۋدا جانە شىمكەنتتىڭ دامۋىندا جاس بۋىنعا جۇكتەلەتىن مىندەتتەر جونىندە ايتتى. ول ءوز سوزىندە جاس ازاماتتاردى قولداۋعا ارنالعان شارالارعا, وسى سالاداعى مەملەكەتتىك باعدارلامالارعا جانە ناقتى باعىتتار بويىنشا اتقارىلىپ جاتقان جوبالارعا دا توقتالدى. سونداي-اق جاس تالانتتارعا جاڭا مۇمكىندىكتەر بەرەتىن سەنات جانىنداعى ساراپشىلار كلۋبى مەن تالداۋ مەكتەبىنىڭ قىزمەتى دە اڭگىمەگە ارقاۋ بولدى.
«پرەزيدەنتتىڭ باستاماسىمەن قازاقستاندا جاستاردىڭ ءبىلىم سالاسىنداعى الەۋەتىن ىسكە اسىرۋعا جانە قىزمەتتە وسۋىنە قاجەتتى جاعداي جاسالىپ وتىر. جاس بۋىندى باسپانامەن قامتۋ ماسەلەسى دە باستى نازاردا. وزدەرىڭىزگە بەلگىلى, بيىلعى ناۋرىزدا اتىراۋدا وتكەن ۇلتتىق قۇرىلتايدا مەملەكەت باسشىسى ادىلەتتى قازاقستان يدەياسىمەن تىعىز بايلانىستى جانە دۇرىس قۇندىلىقتار جۇيەسىن قالىپتاستىرۋعا ىقپال ەتەتىن «ادال ادام – ادال ەڭبەك – ادال تابىس» تۇجىرىمىن جاريالادى. بۇل قاعيداتتار, ەڭ الدىمەن, جاستاردىڭ بويىنان تابىلۋى كەرەك», دەدى سەنات سپيكەرى.
سونىمەن قاتار سەناتورلار قالاداعى بەلسەندى ۇزاق ءومىر ءسۇرۋ ورتالىعىنا باردى. سونداي-اق ولار بۇعان دەيىن پالاتانىڭ تۇراقتى كوميتەتتەرىنە شىمكەنتتەگى «Azala Textile» توقىما فابريكاسىنىڭ جۇمىسشىلارىنان وتىنىشتەر كەلىپ تۇسكەنىن ەسكەرىپ, كاسىپورىننىڭ قىزمەتىمەن تانىسۋ ءۇشىن اتالعان نىسانعا ارنايى باردى.
شىمكەنت
