ونەركاسىپ جانە قۇرىلىس مينيسترلىگى ونەركاسىپ كوميتەتىنىڭ توراعاسى ازامات پانباەۆتىڭ پىكىرىنە سۇيەنسەك, ەلىمىزدە يندۋستريالىق ساياساتتى ىسكە اسىرۋ جالعاسىن تاۋىپ كەلەدى. كەيىنگى 5 جىلدا وڭدەۋ ونەركاسىبىنىڭ ورتاشا ءوسۋ قارقىنى 4,5%-دى قۇراپ وتىر. ونىڭ ىشىندە ماشينا جاساۋ سالاسىنداعى ءوسىم – 17,6%.
ۇلتتىق ەكونوميكاعا, ونىڭ ىشىندە وتاندىق ءوندىرىستىڭ ءورىسىن كەڭەيتۋگە قۇيىلعان ينۆەستيتسيانىڭ يگىلىگىمەن جەرگىلىكتى تۇرعىندار ءۇشىن جۇمىس ورنى كوبەيەدى.
سونىڭ ءبىر دالەلىندەي, اتىراۋ وبلىسىندا جۇك ۆاگونىن قۇراستىراتىن جاڭا زاۋىت اشىلدى. وبلىس اكىمىنىڭ ورىنباسارى مارات مۋرزيەۆتىڭ ايتۋىنشا, مۇنايلى وڭىردە شەتەلدىكتەرمەن بىرلەسكەن مىڭ-نان استام كاسىپورىن جۇمىس ىستەيدى. ال ماشينا جاساۋ سالاسىندا 150 ءىرى, ورتا جانە شاعىن بيزنەس نىسانى بار.
«ايماقتا مۇناي-حيميا ونىمدەرىن وڭدەۋ باعىتىندا ىسكە اسىرىلىپ جاتقان ءىرى جوبالار بار. ەندى ماشينا جاساۋ وندىرىسىنە نازار اۋدارىلىپ وتىر. بۇل ينۆەستيتسيالىق جوبانىڭ ءوڭىر ءۇشىن ماڭىزى زور. بىرىنشىدەن, «تەڭىز» كەن ورنىنداعى كەلەشەك كەڭەيۋ جوباسىنىڭ اياقتالۋىنا بايلانىستى بوساعان جۇمىسشىلاردى جۇمىسپەن قامتۋ ماسەلەسىن وڭىنان شەشۋگە سەپتىگىن تيگىزەدى. ەكىنشىدەن, ەكسپورتقا باعىتتالعان ونىمدەردىڭ وسىمىنە ىقپال ەتەدى. ۇشىنشىدەن, ءوڭىردىڭ الەۋمەتتىك-ەكونوميكالىق دامۋىنا سەرپىن بەرەدى. سول سەبەپتى, وبلىس باسشىلىعى تاراپىنان وسىنداي ءوندىرىستى اشۋعا نيەت ەتكەن ينۆەستورلارعا جان-جاقتى قولداۋ كورسەتىلەدى», دەيدى م.مۋرزيەۆ.
ايتۋىنشا, جاڭا زاۋىتتا جوباعا سايكەس 6 مىڭ ۆاگون قۇراستىرۋ جوسپارلانىپ وتىر. ينۆەستيتسيالىق جوبانىڭ قۋاتى بىرتىندەپ ارتقان كەزدە 2 700 جۇمىس ورنى قۇرىلادى. سوعان وراي زاۋىتتا ۇستا, دانەكەرلەۋشى, بۇرعىلاۋشى, تويتارۋشى سەكىلدى سان ءتۇرلى بەيىندەگى ماماندارعا سۇرانىس ارتادى. زاۋىتتا ۆاگون مەن تسيستەرنا شىعارۋ, جوندەۋ, تەحنيكالىق قىزمەت كورسەتۋگە ارنالعان بارلىق ينفراقۇرىلىمدى قامتيتىن ۆاگون جاساۋ كلاستەرى قۇرىلادى. ۆاگون قۇراستىرۋعا نەمىس ستانوكتارى مەن ەلىمىزدە وندىرىلگەن ماتەريالدار قولدانىلادى. ال وندىرىستىك ونىمدەر ەۋروپا جانە بالتىق ەلدەرىنە ەكسپورتتالادى.
زاۋىتتى ىسكە قوسقان «Texol» كومپانيالار توبىنىڭ باسشىسى شوتا اۆحازوۆانىڭ دەرەگىنە قاراعاندا, جاڭا وندىرىسكە سالىنعان ينۆەستيتسيا كولەمى از ەمەس. ماسەلەن, باستاپقى ينۆەستيتسيانىڭ كولەمى شامامەن 170 ملن دوللاردى قۇرايدى. ال جوبانى تولىق جۇزەگە اسىرۋ كەزىندەگى ينۆەستيتسيا 160 ملرد تەڭگەگە جەتۋى مۇمكىن.
«تەمىرجول ۆاگونى دا ەسكىرەدى. الداعى 10 جىلدىڭ ىشىندە ەلدەگى جۇك ۆاگونى پاركى جىل سايىن 54 مىڭعا قىسقارادى. وسىعان بايلانىستى ورتالىق ازياداعى جۇك بازاسىنىڭ ءوسۋ الەۋەتىن ەسكەردىك. توزعان ۆاگونداردى جاڭاسىنا الماستىرىپ, پاركتى جاڭارتۋدى كوزدەدىك. ويتكەنى ۆاگون پاركىنە سۇرانىس ارتاتىنى داۋسىز», دەيدى ش.اۆحازوۆا.
ماشينا جاساۋ, ونىڭ ىشىندە ۆاگون قۇراستىرۋ سالاسى ماماندارىنىڭ توپشىلاۋىنشا, جاڭا ءوندىرىس ورنىندا وستىك جۇكتەمەسى 23,5 مىڭ توننانى كوتەرەتىن جارتىلاي ۆاگوندار مەن پلاتفورمالاردى قۇراستىرۋ كوزدەلىپتى. سونداي-اق جۇك ۆاگونىن, مۇناي ءونىمىن, سۇيىتىلعان گازدى جانە ونەركاسىپتىك جۇكتەردى تاسىمالداۋعا ارنالعان تسيستەرنا قۇراستىرۋ ماقساتى بار. زاۋىت تولىق قۋاتىنا 2027 جىلى كوشەدى.
قازىر 17 مىڭ شارشى مەتر اۋماقتى الىپ جاتقان وندىرىستىك الاڭ الداعى 4 جىلدا 62 مىڭ شارشى مەترگە دەيىن كەڭەيەدى. بىرنەشە تسەحتا ۆاگون قۇراستىرۋعا قاجەتتى سان الۋان كومپونەنت جيناقتالادى. سونداي-اق مۇندا ورتاشا جانە كىشى سىيىمدىلىق پەن سالماقتاعى ۆاگونداردى قۇيۋ جەلىسى ىسكە قوسىلعان.
زاۋىتتا جاڭا ۇلگىلەردى وندىرىسكە ەنگىزۋ قولعا الىنىپ, قازىر 25 مىڭ اربا مەن 13-6741 ۇلگىسىندەگى ارتيكۋلياتسيالانعان فيتينگ پلاتفورماسىنىڭ مودەلىن ەنگىزۋدىڭ قامى جاسالىپ جاتىر. الدا سۇيىتىلعان كومىرسۋتەكتى گازدى تاسىمالداۋعا ارنالعان تسيستەرنالار شىعارىلا باستايدى. ۆاگون قۇراستىرۋعا قاجەتتى مەتالل كونسترۋكتسيالارى – قاراعاندىدان, مويىنتىرەكتەر – ستەپنوگوردان, دوڭعالاقتى جۇپتارعا ارنالعان ديسكىلەر مەن وستەر ەكىباستۇزدان اكەلىنەدى. قازىر زاۋىتتا 70-تەن اسا مامان جۇمىس ىستەپ ءجۇر. جىل سوڭىنا دەيىن جۇمىسشىلار سانى 180-گە جەتەدى. ال 2027 جىلعا قاراي 2 700 ادامدى تۇراقتى جۇمىسپەن قامتۋ كوزدەلىپ وتىر.
اتىراۋ وبلىسى
