فوتو:Instagram/police.atyrau
ەسكە سالا كەتەيىك, 2024 جىلدىڭ 26 ماۋسىمىنا قاراعان ءتۇنى اتىراۋ قالاسىنداعى جەڭىس ساياباعىنداعى الاڭدا 2017 جىلى تۋعان قىزدىڭ ۇستىنە ەسكەرتكىش قۇلاعان ەدى. ءبۇلدىرشىن العان جاراقاتىنىڭ سالدارىنان وبلىستىق بالالار اۋرۋحاناسىندا كوز جۇمدى.
رەسمي مالىمەتتەر بويىنشا اتىراۋ وبلىسى پوليتسيا دەپارتامەنتىنىڭ تەرگەۋ باسقارماسى بالانىڭ قايتىس بولۋ فاكتىسى بويىنشا سوتقا دەيىنگى تەرگەۋ امالدارىن جۇرگىزىپ جاتىر.
«وسىعان بايلانىستى وقيعانىڭ ناقتى ءمان-جايىن انىقتاۋ, ءىستىڭ تولىق زەرتتەلۋىن قامتاماسىز ەتۋ ءۇشىن 2024 جىلدىڭ 25 ماۋسىمىندا كەشكى ۋاقىتتا بولعان قىلمىستىق قۇقىقبۇزۋشىلىقتى كورگەن جانە ەسكەرتكىشتى كوتەرۋگە كومەكتەسكەن تۇلعالار تەرگەۋ ورگاندارىنا حابارلاسۋىڭىزدى سۇرايمىز. اتىراۋ قالاسى, ابىلقايىرحان داڭعىلى, № 55 (№ 329 كابينەت) مەكەنجايى بويىنشا بولىمشەگە نەمەسە 98-22-72, +7702-741-53-95, +7747-750-95-95 تەلەفوندارى بويىنشا حابارلاسىڭىز», دەلىنگەن اتىراۋ وبلىسى پد ءباسپاسوز قىزمەتى تاراتقان حابارلامادا.
وسىعان دەيىن اتىراۋ قالاسىنىڭ اكىمى شاكىر كەيكين قايعىلى وقيعا تۋرالى ايتقان بولاتىن. ول توتەنشە جاعدايعا اۋا رايى سەبەپ بولۋى مۇمكىن دەگەندى جوققا شىعاردى. توتەنشە جاعداي بولعان كۇنى اتىراۋدا قاتتى جاڭبىر جاۋىپ, جەل سوققانى بۇدان بۇرىن دا حابارلانعان بولاتىن.
«مەن ءوزىم تاجىريبەلى قۇرىلىسشىمىن, سوندىقتان مۇنداي اۋىر ءبيۋستتىڭ قالاي قۇلاعانى مەن ءۇشىن جۇمباق بولدى. قازىر مەن ونى ورنىنان جىلجىتۋعا تىرىستىم. قۇرىلىم جەلدىڭ سالدارىنان قۇلاماۋى مۇمكىن دەپ ويلايمىن, ءبىز جەڭىس ساياباعىندا ورناتىلعان بارلىق ەسكەرتكىشتەر مەن بيۋستتەردى تەكسەرەمىز», دەپ ءتۇسىندىردى شاكىر كەيكين.
رەسمي مالىمەت بويىنشا, اتىراۋداعى جەڭىس ساياباعىنداعى «ەستەلىك اللەياسى» 2020 جىلى اشىلعان. مۇندا ۇلى وتان سوعىسى باتىرلارىنىڭ, كەڭەس وداعىنىڭ باتىرلارىنىڭ, حالىق قاھارماندارىنىڭ جانە «داڭق» وردەنىنىڭ تولىق يەگەرلەرىنىڭ 14 ءبيۋستى قويىلعان. تاقتالاردىڭ ءبىرى قىزدىڭ ۇستىنە قۇلاعان.
