فوتو: kaztag.kz
پرەمەر-ءمينيستردىڭ ورىنباسارى سەرىك جۇمانعاريننىڭ توراعالىعىمەن وتكەن رەسپۋبليكالىق جەدەل شتابتىڭ كەزەكتى وتىرىسىندا شەگىرتكەگە قارسى كۇرەس بويىنشا قازىرگى جاعداي قارالدى.
بۇگىنگى تاڭدا حيميالىق وڭدەۋ 2 ملن گەكتار القاپتا جۇرگىزىلدى, بۇل بولجاعان وڭدەۋ كولەمىنىڭ 77,4%-ىن قۇرايدى.
اباي, اتىراۋ, شىعىس قازاقستان, باتىس قازاقستان جانە قىزىلوردا وبلىستارىندا يتاليالىق پرۋسقا قارسى وڭدەۋ اياقتالدى. اقمولا جانە سولتۇستىك قازاقستان وڭىرلەرىندە جۇمىس باستالادى.
وتكەن اپتادا نوسەر جاۋىن مەن قاتتى جەلگە بايلانىستى اقتوبە جانە قوستاناي وبلىستارىندا مونيتورينگ پەن حيميالىق وڭدەۋ توقتاتىلعان بولاتىن. جۇمىس سارسەنبى-بەيسەنبى كۇندەرى باستالادى. وڭىرلەر پەستيتسيدتەرمەن قامتاماسىز ەتىلگەن, قاجەت بولعان جاعدايدا قوسىمشا تەحنيكا جىبەرىلەدى.
اقتوبە وبلىسىنداعى رف-مەن بۇكىل شەكارا ماڭى اۋماعى وڭدەلدى. تەكسەرۋ باسقا وڭىرلەردىڭ شەكاراسىندا جۇرگىزىلەدى. 1 شىلدەدە سەرىك جۇمانعاريننىڭ رف ۇكىمەتى توراعاسىنىڭ ورىنباسارى دميتري پاترۋشەۆپەن تەلەفون ارقىلى سويلەسۋى كەزىندە رەسەي تاراپىنان قازاقستانمەن شەكارالاس اۋماقتاردى وڭدەۋ اياقتالعانى بەلگىلى بولدى.
سونىمەن قاتار سەرىك جۇمانعارين وڭىرلەردىڭ اكىمدىكتەرىنە جاعداي تولىق تۇراقتالعانعا دەيىن جۇمىس قارقىنىن تومەندەتپەۋدى تاپسىردى.
وتىرىستا اگرارشىلاردى مينەرالدى تىڭايتقىشتارمەن قامتاماسىز ەتۋ بارىسى دا قارالدى.
ەستەرىڭىزگە سالا كەتەيىك, بيىل مەملەكەت باسشىسىنىڭ تاپسىرماسى اياسىندا تىڭايتقىش ەنگىزۋ كولەمىن 1,5 ملن تونناعا دەيىن ۇلعايتۋ بويىنشا شارالار قابىلداندى. بۇل وتكەن جىلمەن سالىستىرعاندا 2,2 ەسە كوپ. ناۋرىز ايىنان باستاپ وتاندىق تىڭايتقىشتاردى اۆانستىق سۋبسيديالاۋ تەتىگى ىسكە اسىرىلۋدا, بۇل رەتتە بيۋدجەتتىك سۋبسيديالار شارۋالارعا ارزانداتىلعان تىڭايتقىشتاردى ساتۋ ءۇشىن وندىرۋشىلەردىڭ ارنايى شوتتارىنا الدىن الا اۋدارىلادى.
وبلىس اكىمدىكتەرىنىڭ دەرەگى بويىنشا, 963 مىڭ توننا تىڭايتقىش جەتكىزۋگە شارتتار جاسالدى, ونىڭ 855 مىڭ تونناسى جونەلتىلگەن.
