فوتو: inbusiness.kz
يۋنەسكو وڭىرلىك كەڭسەسى مەن ءال-فارابي اتىنداعى قازاق ۇلتتىق ۋنيۆەرسيتەتى يۋنەسكو-نىڭ جۋرناليستيكا جانە كوممۋنيكاتسيا كافەدراسىنىڭ شىعارماشىلىق جانە تەحنيكالىق بىرلەسكەن جوباسى جۋرناليستيكا جانە كوممۋنيكاتسيا سالاسىنداعى جاپپاي اشىق ونلاين كۋرستاردى ازىرلەۋگە مۇمكىندىك بەردى. جەتى ەلدىڭ, ياعني قىرعىزستان, وزبەكستان, تاجىكستان, تۇرىكمەنستان, ارمەنيا, گرۋزيا, ازەربايجان ەلدەرى ساراپشىلارىنىڭ, ورتالىق ازيانىڭ 19 ۋنيۆەرسيتەتى وكىلدەرىنىڭ قاتىسۋىمەن ونلاين كۋرستار ساراپتامادان وتكىزىلدى. كافەدرا وقىتۋشىلارى ورتالىق ازيا ەلدەرى تاجىريبەسىنىڭ نەگىزىندە حالىقارالىق وقۋلىقتاردى ينتەراكتيۆتى كۋرستارعا بەيىمدەپ, وقۋ ۇدەرىسىنە ەنگىزدى. بۇرىنعى فورماتتان, ءداستۇرلى وقۋلىقتاردان مۇلدەم وزگەشە اۋقىمدى جۇمىستار اتقارىلدى. بۇل كۋرستار يننوۆاتسيالىق, ينتەراكتيۆتى, ينكليۋزيۆتى, قىزىقتى ءارى جەڭىل, قۇرىلىمىندا ويىن ەلەمەنتتەرى بار, باعالاۋ ءۇشىن تەست پەن ەسسە قولدانىلدى. ونلاين كۋرستار يۋنەسكو مەن جۋرناليستەردىڭ حالىقارالىق فەدەراتسياسىنىڭ وقۋ ماتەريالدارىنا نەگىزدەلدى جانە قازاق ۇلتتىق ۋنيۆەرسيتەتىنىڭ پلاتفورماسىنا ورنالاستىرىلىپ, كەڭ اۋديتورياعا ارنالدى. وسىلايشا, ەلىمىزدە تۇڭعىش رەت جۋرناليست قاۋىپسىزدىگى, كوممۋنيكاتسياداعى قاقتىعىستى تومەندەتۋ, كليمات وزگەرىسى مەن گەندەرلىك ماسەلەلەردى باق-تا جازۋ ءادىس-تاسىلدەرىن ۇيرەتەتىن كۋرستار ازىرلەندى. الگوريتمى ۇقساس وزگە وقۋ كۋرستارىنان ايىرماشىلىعى, جوبا ناتيجەسىندە ازىرلەنگەن كەشەن ەگەر تىڭداۋشى ءساتتى اياقتاسا, تەگىن سەرتيفيكات بەرۋ قاراستىرىلعان. يۋنەسكو سەرياسىنا ەنەتىن كۋرستار تاۋلىك بويى, جىل بويى قولجەتىمدى ءارى اقىسىز. پلاتفورمانىڭ فۋنكتسيونالدارى ءار الۋان, قازىرگى تسيفرلىق قۇرالداردىڭ جيىنتىعى ءبىلىم قۇزىرەتتىلىگىن دامىتادى.
گەندەرلى باعىتتالعان جانە ينكليۋزيۆتى پلاتفورمانىڭ ءتورت باعىتى كاسىبي قارىم-قاتىناستى قولداۋعا ماشىقتاندىرادى, تەوريالىق جانە پراكتيكالىق ماتەريالداردى ىقپالداستىرىپ, ءجۋرناليستىڭ كۇندەلىكتى قىزمەتىن, باق رەداكتسياسىنىڭ جۇمىسىن جاقسارتۋعا ارنالعان قۇرالداردى ۇيرەتەدى.
ءار كۋرستىڭ قىسقاشا مازمۇنى سەگىز تىلگە اۋدارىلىپ, مۋلتيلينگۆيستيكالىق ەلەكتروندى وقۋلىق ازىرلەندى. قازىرگى تاڭدا ونلاين-كۋرستاردىڭ شەتەلدىك تىڭداۋشىلارى دا بار. اقش, نورۆەگيا, رەسەي, وزبەكستان, قىرعىزستان ەلدەرىنەن جاس ماماندار, ستۋدەنتتەر كۋرستى وقىپ, سەرتيفيكات الدى.
كەيىنگى كەزدەرى تۇرمىستىق زورلىق-زومبىلىققا قارسى زاڭعا وزگەرىستەر ەنگىزىلۋىنە بايلانىستى «ايەلدەر مەن قىزدارعا قاتىستى زورلىق-زومبىلىق ماسەلەلەرىنىڭ باق-تا جازىلۋى» كۋرسىنا قىزىعۋشىلىق ارتتى. بۇل كۋرس بويىنشا ماۋسىم ايىندا 4 تىڭداۋشى جازىلىپ, كۋرستى تىڭداپ سەرتيفيكات العان.
باق ماماندارىنا اقپارات جيناۋ مەن ونى باق-قا بەرۋدىڭ ەتيكالىق ءادىس-تاسىلدەرىن ۇيرەتۋدى ماقسات ەتكەن كۋرستارداعى ۇزدىك حالىقارالىق ستاندارتتارعا نەگىزدەلگەن تاجىريبەلىك نۇسقاۋلار جۋرناليست, PR ماماندارىنا, ءباسپاسوز قىزمەتى وكىلدەرىنە ارنالعان.
يۋنەسكو ماقۇلداعان كونتەنت نەگىزىندە ازىرلەنگەن كۋرستارعا يۋنەسكو وڭىرلىك كەڭسەسى تاراپىنان جۋرناليست كادرلارىنىڭ ساپاسىن, اقپاراتتىق سالا قاتىسۋشىلارىنىڭ بىلىكتىلىگىن كوتەرەدى, جۋرناليستيكا سالاسىنداعى ۇلتتىق پلاتفورمانى بايىتادى دەگەن باعا بەرىلدى. ورتالىق ازيا مەن كاۆكاز ايماقتارىنداعى ارىپتەستەر بۇل كۋرستاردىڭ ادىستەمەلىك ورتالىق, بازا بولىپ قالاتىندىعىن جەتكىزدى. بۇگىندە يۋنەسكو-نىڭ جۋرناليستيكا جانە كوممۋنيكاتسيا كافەدراسى «SC Training» پلاتفورماسىندا بەس تىلدە ءموبيلدى قوسىمشاعا ارنالعان ونلاين كۋرس ازىرلەنىپ جاتىر. كافەدرادا بىرنەشە يننوۆاتسيالىق حالىقارالىق جانە ۇلتتىق جوبا, اتاپ ايتقاندا كەيىنگى بەس جىلدا يۋنەسكو-نىڭ كوممۋنيكاتسيانى دامىتۋ حالىقارالىق باعدارلاماسىنىڭ, بۇۇ-ايەلدەر وكىلدىگىنىڭ, اقش ەلشىلىگىنىڭ جوبالارى جۇزەگە اسىرىلدى.
نازگۇل شىڭعىسوۆا,
ءال-فارابي اتىنداعى
قازۇۋ يۋنەسكو-نىڭ جۋرناليستيكا جانە كوممۋنيكاتسيا كافەدراسىنىڭ مەڭگەرۋشىسى
