وتاندىق بيزنەستى قولداۋ
ستراتەگيا جانە اكتيۆتەردى باسقارۋ جونىندەگى باسقارۋشى ديرەكتور نيكولاي كازۋتيننىڭ ايتۋىنشا, قور ۇكىمەتپەن بىرلەسىپ ازىرلەنگەن ساتىپ الۋلارداعى وتاندىق قامتۋ ۇلەسىن ارتتىرۋعا مۇمكىندىك بەرەتىن شارالاردى ىسكە اسىردى.
«قويىلعان مىندەتتەردى ىسكە اسىرۋ شەڭبەرىندە قور بىرنەشە باعىتتا جوسپارلى جۇمىس جۇرگىزىپ جاتىر. بۇگىنگى تاڭدا ساتىپ الۋعا قاتىسۋدىڭ بارلىق تىزبەگى بويىنشا وتاندىق تاۋار وندىرۋشىلەردى قولداۋدىڭ 14-تەن استام تەتىگى قاراستىرىلعان. ساتىپ الۋلار جۇيەسىنىڭ اشىقتىعىن ارتتىرۋ ماقساتىندا قارجى مينيسترلىگىمەن, قارجى مونيتورينگى اگەنتتىگىمەن, سىبايلاس جەمقورلىققا قارسى ءىس-قيمىل اگەنتتىگىمەن, سونداي-اق «ساتىپ الۋدىڭ بىرىڭعاي تەرەزەسى» اقپاراتتىق جۇيەسىمەن بىرلەسىپ ازىرلەنگەن», دەدى نيكولاي كازۋتين.
ەنگىزىلگەن وزگەرىستىڭ نەگىزگىسى – وفتەيك-كەلىسىمشارتتاردىڭ ۇلەسىن ارتتىرۋ. مىسالى, بيىل پورتفەلدىك كومپانيالاردىڭ باسشىلارى ءۇشىن وفتەيك-كەلىسىمشارتتاردىڭ ۇلەسىن ساتىپ الۋ قىزمەتتەرىنىڭ جالپى كولەمىنەن 10% كەم تۇسپەيتىن دەڭگەيدە ۇلعايتۋ بويىنشا پايدالى اسەر كوەففيتسيەنتى (پاك) بەلگىلەندى. جاڭا وندىرىستەردى قۇرۋعا باعىتتالعان باعدارلاما ناتيجەلەرى بويىنشا 74 جوبا ماقۇلدانىپ, 145 ملرد تەڭگە سوماسىندا 595 وفتەيك شارت جاسالدى.
«باعدارلاما ىشكى نارىقتا ءونىم تاپشىلىعى بولعان كەزدە 20 جىلعا دەيىنگى مەرزىمگە وفتەيك-شارتتار جاساسۋ مۇمكىندىگىن كوزدەيدى. كەلىسىمشارت جاساسۋ كەزىندە وندىرۋشىلەرگە, ونىڭ ىشىندە ءىرى كاسىپورىندارعا ءوز ءوندىرىسىنىڭ اينالاسىندا شاعىن بيزنەس بەلدەۋىن قۇرۋ جونىندەگى مىندەتتەمەلەر بەلگىلەۋ مۇمكىندىگى كوزدەلگەن. سونداي-اق وتاندىق تاۋار وندىرۋشىلەر ءۇشىن جەڭىلدىكتەر قاراستىرىلعان. مىسالى, ولار تەندەرلىك ءوتىنىمدى قامتاماسىز ەتۋدى ەنگىزۋدەن بوساتىلىپ, قور كەمىندە 30% مولشەرىندە مىندەتتى اۆانس بەلگىلەدى», دەدى «سامۇرىق-قازىنا كونتراكت» جشس باس ديرەكتورىنىڭ ورىنباسارى ەلدار دوسكەنوۆ.
قابىلدانعان شارالاردىڭ ىشىندە وتاندىق تاۋارلاردى ساتىپ الۋ بويىنشا مىندەتتەمەلەردى ورىنداماعان جاعدايدا قۇرىلىس-مونتاج جۇمىستارىنىڭ مەردىگەرلەرى ءۇشىن جاۋاپكەرشىلىك كۇشەيتىلدى, سونداي-اق قور كومپانيالار توبى ساتىپ الاتىن جۇمىستار مەن قىزمەتتەردى جەتكىزۋشىلەرگە جەرگىلىكتى وندىرۋشىلەردەن تاۋارلاردى ساتىپ الۋ مىندەتتەلدى.
ەلەكتروندىق ساتىپ الۋ جۇيەسىنىڭ ارتىقشىلىقتارى
ساتىپ الۋ جۇيەسىن جەتىلدىرۋ دە – ماڭىزدى فاكتور. بۇگىنگى كۇنى جۇيەدە 160 ۇيىمنىڭ تاۋارى, جۇمىسى مەن قىزمەتتەرى ساتىلادى. بىرقاتار ۇدەرىستى اۆتوماتتاندىرۋدىڭ ارقاسىندا جەتكىزۋشىلەردىڭ قوردى ساتىپ الۋ قىزمەتىنە قاتىسۋ ءراسىمى جەڭىلدەتىلدى. ياعني تەحنيكالىق سيپاتتامالار, ەلەكتروندىق شوت-فاكتۋرالار, تەندەرلىك ءوتىنىمدى قامتاماسىز ەتۋ جانە باسقا دا ۇدەرىستەر كىرەدى.
ەلەكتروندىق ساتىپ الۋدىڭ اقپاراتتىق جۇيەسىن سۇيەمەلدەۋ دەپارتامەنتىنىڭ ديرەكتورى ايدوس ءمۇستافيننىڭ سوزىنشە, جۇيە ارقىلى جىلىنا 3,7 ترلن تەڭگەدەن استام سوماعا ساتىپ الۋ جۇرگىزىلىپ, 85 مىڭنان استام شارت جاسالادى. كۇن سايىن zakup.sk.kz پلاتفورماسىندا 250-دەن استام كونكۋرس وتكىزىلەدى جانە ولاردىڭ ارقايسىسىنا ورتا ەسەپپەن 5 الەۋەتتى ءونىم جەتكىزۋشى قاتىسادى.
«قازىرگى ۋاقىتتا جۇيەدە 104 مىڭعا جۋىق الەۋەتتى ءونىم جەتكىزۋشى تىركەلگەن. جۇيە قور كومپانيالارىنىڭ قاجەتتىلىكتەرىن, ساتىپ الۋ مەرزىمدەرىن, شارتتارىن جانە باسەكەلەستىك ورتا تۋرالى اقپاراتتى كورۋگە مۇمكىندىك بەرەدى», دەپ اتاپ ءوتتى ايدوس مۇستافين.
«سامۇرىق-قازىنا» ساتىپ الۋدىڭ اشىقتىعىن قالاي باقىلايدى؟
«اشىقتىق دەڭگەيىن ارتتىرۋ جانە زاڭ بۇزۋشىلىقتاردى بولدىرماۋ ءۇشىن قوردا ساتىپ الۋدى باقىلاۋ جونىندەگى ورتالىقتاندىرىلعان قىزمەت جۇمىس ىستەيدى. وسى جىلدىڭ العاشقى 6 ايىندا وسىنداي 3 000-نان استام ءوتىنىش قارالسا, وتكەن جىلى 6 000-نان استام ءوتىنىش وڭدەلگەن. ساتىپ الۋ جوسپارلارى, تەندەر جانە قور مەن ەنشىلەس كومپانيالاردىڭ شارتتارى تۋرالى اقپارات قولجەتىمدى», دەپ اتاپ ءوتتى «سامۇرىق-قازىنا كونتراكت».
سونداي-اق وتكەن جىلدان باستاپ پلاتفورمادا جاڭا فۋنكتسيونال ىسكە قوسىلدى. ول جەردە الەۋەتتى ءونىم بەرۋشىلەر ساتىپ الۋ ءتارتىبىنىڭ جەكەلەگەن نورمالارىنىڭ رەسمي تۇسىندىرمەسىمەن تانىسا الادى.
نۇراي ساپاربەكوۆا
