سۋرەتتى تۇسىرگەن – ەرلان ومار, «EQ»
بۇل تسيفرلى كورمە – قورشاعان ورتانى قورعاۋعا جانە كورىكتى جەرلەردى ساقتاۋعا ارنالعان. اتالعان ءىس-شارا مانحەتتەندەگى (نيۋ-يورك) «The Canvas 3.0» گالەرەياسى مەن «Qazaq National Parks» جوباسىنىڭ (سەرىكتەس) قولداۋىمەن ۇيىمداستىرىلدى.
ء«بىز – قورشاعان ورتاعا قۇرمەتپەن قارايتىن ەلمىز. «Winds of Change» كورمەسى – ءبىزدىڭ ۇلتتىق ساياباقتارىمىزدىڭ كەرەمەتىن كورسەتىپ قانا قويماي, الەمدىك ساياحاتشىلارعا ناسيحاتتاپ وتىر. ەكىنشىدەن, ءبىز مۇنداي دامىعان ەلدەرمەن كۇش بىرىكتىرۋ ارقىلى قورشاعان ورتانى قورعاۋعا, تابيعاتتى ساقتاۋعا مول تاجىريبە الماسامىز. سونىمەن قاتار جاھاندىق ەكولوگيانىڭ جاقسارۋىنا ۇلەس قوسا الامىز», دەيدى تۋريزم جانە سپورت ۆيتسە-ءمينيسترى ەرجان ەركىنباەۆ.
«Winds of Change» كورمەسى امەريكالىق ناتۋراليستەرگە ەلىمىزدىڭ ۇلتتىق تابيعي اسەم ساياباقتارىن جانە بىرەگەي كرەاتيۆتى جوبالارىن تانىستىرادى.
«كورمەگە قويىلعان «ىلە-الاتاۋ تاريحى» كىتابى كەلۋشىلەردىڭ قىزىعۋشىلىعىن وياتتى. وندا ۇلتتىق ساياباققا قاتىستى ءوز ءومىرىن تابيعاتپەن بايلانىستىرعان ادامدار: عالىمدار, زوولوگتەر, بوتانيكتەر, ارحەولوگتەر, گلياتسيولوگتەر, استرونومدار, ورمانشىلار, الپينيستەر, تۋريستەر, ەرىكتىلەردىڭ قىزىقتى وقيعالارى بەرىلگەن. ال «ادام جانە تابيعات» لەند-ارت جوباسى قازىرگى ادامدار تابيعاتتىڭ ءبىر بولىگى بولىپ قالا ما, جوق پا دەگەن ماسەلەنى زەرتتەيتىن جوبا. ايۋساي شاتقالىندا تۋريستەر قالدىرعان قوقىستار كورسەتىلەدى», دەيدى «Qazaq National Parks» سەرىكتەستىگىنىڭ ديرەكتورى دينارا گۋجاۆينا.
كورمەگە كەلۋشىلەر «شارىن», «التىنەمەل», «ىلە-الاتاۋ» قاتارلى ۇلتتىق ساياباقتاردىڭ سيمۆولدىق ونىمدەرىن ساتىپ الىپتى. جالپى, ۇلتتىق ساياباقتارىمىزدىڭ ناسيحاتىن جاسايتىن جانە تۋريستىك ينفراقۇرىلىمدى دامىتۋمەن اينالىساتىن بىردەن-ءبىر ورىن – ول «Qazaq National Parks» سەرىكتەستىگى ەكەنىن ايتا كەتكەن ءجون.
«ەلىمىزدەگى ۇلتتىق ساياباقتار دەسە, جۋساننىڭ ءيسى, ورمان سىبدىرى جانە تاۋ بوكتەرىندەگى قۇلپىرعان گۇلدەر ەسىمىزگە تۇسەدى. «Winds of Change» كورمەسىندە كەلۋشىلەرگە وسىنى سەزدىردىك. ءبىزدىڭ ساياباقتار سونىسىمەن تالايلاردى قىزىقتىرىپ تۇر», دەيدى كورمە جەتەكشىسى نارگيز ماگاەۆا.
ايتپاقشى, شىعىستاعى كاتونقاراعاي ۇلتتىق ساياباعى – يۋنەسكو-نىڭ بۇكىلالەمدىك مۇرالار تىزىمىنە ەنگىزىلگەن جانە دۇنيەجۇزىلىك جابايى تابيعات قورىنىڭ باسىم ەكووڭىرلەرىنىڭ ءبىرى دەپ تانىلعانى بەلگىلى. تالايدى تامساندىرعان اسەم باق بيىل ناۋرىزدا «Green destinations Story Awards» بايقاۋىندا جەڭىمپازدار قاتارىنان كورىنگەنى ەل ەسىندە بولسا كەرەك. بايقاۋ «ITB Berlin» ءىرى الەمدىك تۋريستىك كورمەسىندە وتكەن ەدى.
تۋريزم – تابىسى تاسقىنداپ تۇرعان سالا. قازىر الەمدە كىرىسىنىڭ 90 پايىزىن وسى سالادان تۇسكەن قاراجات قالىپتاستىراتىن ەلدەر جەتەرلىك. ءبىزدىڭ كۇنىمىز بۇعان قاراپ تۇرماسا دا, ارتىق داۋلەت باس جارماسى انىق. ەلىمىزدە ونداي قوسىمشا تابىس كوزى بولارلىق تۋريستىك الەۋەت مول. ونى مىنە, نيۋ-يورك تورىندە تاعى ءبىر دالەلدەپ بەردىك.
