فوتو: www.trt.net.tr
پرەزيدەنت بيىل «تازا قازاقستان» اۋقىمدى ەكولوگيالىق اكتسياسىنا جۇزدەگەن مىڭ ادام قاتىسىپ, ونداعان مىڭ توننا قوقىس جينالعانىن تىلگە تيەك ەتتى.
«بۇل اكتسيا تۇراقتى تۇردە جالعاسادى. اۋلالارىمىز بەن كوشەلەرىمىزدەگى, ساياباقتار مەن قورىقتارداعى, وزەن-كولدەردەگى تازالىق پەن ءتارتىپتىڭ ساقتالۋى بارشا ازاماتقا تىكەلەي بايلانىستى. ءبىز قوعام رەتىندە اينالامىزداعى تازالىقتىڭ قادىرىن ءبىلىپ, باسقا ادامداردىڭ ەڭبەگىن قۇرمەتتەۋدى ۇيرەنۋىمىز كەرەك», دەدى قاسىم-جومارت كەمەل ۇلى.
مەملەكەت باسشىسىنىڭ ايتۋىنشا, وتاندىق مەديا قوعامدا جوعارى ەكولوگيالىق سانا مەن تابيعاتتى ايالاۋ مادەنيەتىن قالىپتاستىرۋعا زور كومەگىن تيگىزە الادى.
«وسى ورايدا ازاماتتارىمىزدىڭ ەل ىشىندەگى, سونداي-اق شەتەلدەگى قوعامدىق ورىنداردا ۆانداليزممەن كوزگە ءتۇسىپ, تۇرپايى مىنەز-ق ۇلىق كورسەتۋى – نازار اۋداراتىن ماسەلە. تاريحي-مادەني مۇرالارعا زيان كەلتىرۋ, ەسكەرتكىشتەردى قورلاۋ سياقتى كەلەڭسىز ارەكەتتەر تەك زاڭمەن عانا جازالانىپ قويماي, قوعام تاراپىنان دا ايىپتالۋعا ءتيىس. بۇل ورايدا بۇقارالىق اقپارات قۇرالدارىنىڭ ءرولى اسا ماڭىزدى», دەپ قوستى پرەزيدەنت.
جيىن بارىسىندا مەملەكەت باسشىسى تاعى ءبىر ماسەلە - ۇلتتىق دومبىرا كۇنىن دارىپتەۋ تۋرالى ءسوز قوزعادى.
«الدىمىزدا «ۇلتتىق دومبىرا كۇنى» كەلە جاتىر. دومبىرا – قازاقتىڭ جانى, ۇلت بولمىسىنىڭ ايناسى. «ناعىز قازاق قازاق ەمەس, ناعىز قازاق – دومبىرا». ءبىز ۇلتتىق بىرەگەيلىگىمىزدى ساقتاعىمىز كەلسە, قاستەرلى اسپاپتى قادىر تۇتۋىمىز قاجەت. ول – ءبىزدىڭ تەرەڭنەن تامىر تارتاتىن ءتول تاريحىمىزدىڭ كۋاگەرى. مەرەيلى مەرەكە ونەرىمىزدى ورگە شىعارىپ, تۇتاستىعىمىزدى نىعايتا ءتۇسۋ ءۇشىن كەرەك. مەن ۇلتتىق قۇندىلىقتى ۇلىقتايتىن باستامالاردى بارىنشا دارىپتەۋ قاجەت دەپ سانايمىن. دومبىرا كۇنى سونىڭ ايقىن كورىنىسى بولۋعا ءتيىس», دەپ تۇيىندەدى قاسىم-جومارت كەمەل ۇلى.
