اكادەميانىڭ حابارلاۋىنشا, عىلىم جانە جوعارى ءبىلىم ءمينيسترىنىڭ 2022 جىلعى 30 جەلتوقسانداعى №223 بۇيرىعىمەن بەكىتىلگەن ۇلتتىق عىلىم اكادەمياسىنىڭ اكادەميكتەرىن سايلاۋ قاعيدالارىنا سايكەس اكادەميانىڭ جالپى جينالىسىنىڭ شەشىمى شىعارىلدى.
اتالعان شەشىمگە ساي: ء«ومىر جانە دەنساۋلىق تۋرالى» عىلىمدار بولىمشەسى («مەديتسينا جانە دەنساۋلىق ساقتاۋ» باعىتى) بويىنشا: اقشولاقوۆ سەرىك قۋاندىق ۇلى مەن لوكشين ۆياچەسلاۆ نوتانوۆيچ اكادەميك اتاندى. وسى ورايدا وقىرماندارعا تۇسىنىكتى بولۋ ءۇشىن سۋ جاڭا اكادەميكتەردى قىسقاشا تانىستىرا كەتەيىك. سەرىك اقشولاقوۆ – بەلگىلى نەيروحيرۋرگ, پروفەسسور, «ۇلتتىق نەيروحيرۋرگيا ورتالىعى» اكتسيونەرلىك قوعامىنىڭ باسقارما توراعاسى, عىلىم مەن تەحنيكا سالاسىنداعى مەملەكەتتىك سىيلىقتىڭ يەگەرى, بارىنەن بۇرىن تالاي جانعا ەكىنشى ءومىر سىيلاعان دارىگەر. ۆياچەسلاۆ لوكشين – اكۋشەر-گينەكولوگ, رەپرودۋكتولوگ, پروفەسسور, ەلىمىزدىڭ رەپرودۋكتيۆتى مەديتسينا سالاسىنداعى نورماتيۆتىك جانە زاڭنامالىق اكتىلەرىن ازىرلەۋگە ەلەۋلى ۇلەس قوسقانىمەن تانىمال.
ال «جەر, عارىش جانە كوممۋنيكاتسيالار تۋرالى» عىلىمدار بولىمشەسى («جاراتىلىستانۋ عىلىمدارى», «ينجينيرينگ جانە تەحنولوگيالار» باعىتتارى) بويىنشا: زدوروۆەتس ماكسيم ۆلاديميروۆيچ; رامازانوۆ تىلەكقابىل ءسابيت ۇلى; سۇراعان دوربەتحان; تۇرىسبەكوۆ ەرلان كەڭەسبەك ۇلى ۇلتتىق عىلىم اكادەمياسىنىڭ اكادەميكتەرى بولىپ سايلاندى. ماكسيم زدوروۆەتس – يادرولىق فيزيكا ينستيتۋتى استانا فيليالىنىڭ ديرەكتورى, فيزيكا-ماتەماتيكا عىلىمدارىنىڭ كانديداتى, پروفەسسور. تىلەكقابىل ءسابيت ۇلى – 80-نەن اسا عىلىمي جاريالانىمنىڭ اۆتورى, فيزيكا-ماتەماتيكا عىلىمىنىڭ دوكتورى, پروفەسسور, قازاقستانداعى يدەال ەمەس پلازما فيزيكاسى بويىنشا عىلىمي مەكتەپتىڭ نەگىزىن قالاۋشى. سۇراعان دوربەتحان – مەملەكەتتىك سىيلىق العان ەڭ جاس عالىم-ماتەماتيك, PhD دوكتور. ەرلان كەڭەسبەك ۇلى – بيولوگ, پروفەسسور, «ۇزدىك عىلىمي قىزمەتكەر – 2022» يەگەرى.
