Almaty.tv جازعانداي, قاراعاندى وبلىسىنىڭ شەت اۋدانىنا قاراستى تالدى تاريحي-ارحەولوگيالىق پاركىندە جاز باستالعالى جۇمىس قىزۋ. قازىر مۇنداعى قولا داۋىرىنە جاتاتىن تالدى مەن اقكەزەڭ قورىمى مۇقيات زەرتتەلىپ جاتىر. باعزى زامان ادامدارىنىڭ تۇراقتارىن قازۋ كەزىندە سولاردىڭ بىرىنەن ساق داۋىرىنە جاتاتىن تەمىر قانجار تابىلدى. ارحەولوگتار «شىرىمەي, ءپىشىنى دە سول كۇيى ساقتالعان قارۋدىڭ يەسى دە وسى جەردە جەرلەنۋى مۇمكىن» دەيدى.
– ساق داۋىرىندەگى «اكيناك» دەيدى. تەمىر سول كۇيى ساقتالعان. ادام جەرلەنگەن جەرىنە ءالى تۇسكەن جوق. قازبا جۇمىستارى جاسالىپ جاتىر. تابىلعان قانجار ولكەتانۋ مۋزەيىنە تابىستالادى. ول تۋريستەرگە, قالا تۇرعىندارىنا كورسەتىلەدى, – دەدى ەسكەرتكىشتەردى قورعاۋ ورتالىعى ديرەكتورىنىڭ ورىنباسارى جانبولات ءماجيتوۆ
ساقتاردىڭ قارۋى سانالعان اقيناقتان بولەك, قازبا جۇمىسى كەزىندە قىش قۇمىرا مەن وزگە دە اشەكەيلەر تابىلعان. ال قىپشاق داۋىرىنە جاتاتىن قورىمنان ءتورت ت ۇلىكتىڭ سۇيەگى كوپ شىعىپتى.
– قىپشاق داۋىرىنە جاتاتىن تاسپەن قورشالعان اۋماقتى قازىپ جاتىرمىز. قورىمداردىڭ سالىنۋ ەرەكشەلىگى قىپشاق كەزەڭىنىڭ ءداستۇر-تانىمىنا ساي كەلەدى. مال شارۋاشىلىعىمەن اينالىسقان. ۇساق مال, جىلقى سۇيەگى كوپ تابىلىپ جاتىر, – دەدى «سارىارقا» ارحەولوگيالىق ينستيتۋتىنىڭ ديرەكتورى الەكسەي كۋكۋشكين.
تالدى كەشەنىنەن تاريحي جادىگەردىڭ تابىلۋى ءبىرىنشى رەت ەمەس. 2016 جىلى ارحەولوگتار انىقتاعان ساتىلى «سارىارقا پيراميداسى» تالاي جاڭالىقتىڭ اشىلۋىنا سەپ بولعان. كەيىننەن زەرتتەۋ ناتيجەسىندە ەكسپەديتسيا مۇشەلەرى بۇل اۋماقتان بەعازى-ءداندىباي مادەنيەتىنە جاتاتىن قالا ورنىن, قوس ات پەن قىش ىدىستار قوسا كومىلگەن كونە قورىمدى انىقتاعان. اتالعان تاريحي قورىمدار بۇگىندە قالىپقا كەلتىرىلىپ, تۋريستەر كەلەتىن ورىنعا اينالعان.
