كەش ۇيىمداستىرۋشىلارىنىڭ مالىمەتىنشە, ايتۋلى باعدارلامانىڭ ەرەكشەلىگى – وندا زاماناۋي كومپوزيتورلاردىڭ سيرەك ورىندالاتىن تۋىندىلارى, سونداي-اق ءتۇرلى مۋزىكالىق جانرلار مەن ايتۋلى پرەمەرالىق نومىرلەردىڭ ۇسىنىلۋىندا ەكەن.
كونتراست-كونتسەرتتە اقش كومپوزيتورلارى تۋىندىلارىنىڭ بلوگى قىزىقتى ەتىپ تانىستىرىلماق. مۋزىكا تاريحىنا از-كەم شەگىنىس جاساساق, سكريپكا مەن فورتەپيانوعا ارنالعان «پۋلچينەللا» بالەتىنەن سيۋيتانى ستراۆينسكي 1925 جىلى جاساعان. بۇل تاڭعالارلىقتاي ۇيلەسىمدى شىعارما مۋزىكاداعى نەوكلاسسيتسيزمنىڭ جارقىن ۇلگىسى بولىپ تابىلادى. كومپوزيتور دجوۆانني باتتيستا پەرگولەزيدىڭ جانە XVIII عاسىرداعى باسقا دا يتاليالىق كلاسسيكتەردىڭ تۋىندىلارى تاقىرىبىن نەگىزگە الىپ, ولارعا زاماناۋي ءۇن قوسقان. دەل ارتە كومەدياسى داستۇرلەرىنەن شابىت العان شىعارما ءوزىنىڭ جەڭىل ءارى نازىك بولۋىمەن ءتانتى ەتەدى.
ەگەر ەلوردالىق كورەرمەن «پۋلچينەللا» بالەتىنەن سيۋيتامەن الدەقاشان تانىس بولسا, ا.كوپلەندتىڭ كلارنەت, ىشەكتى اسپاپتار وركەسترى, ارفا مەن فورتەپيانوعا ارنالعان كونتسەرتىن العاش رەت تىڭدايدى. اارون كوپلەند – امەريكالىق ۇلتتىق كومپوزيتورلىق مەكتەبىنىڭ اعا بۋىن وكىلى. بۇل بۋىن كومپوزيتورلىق مەكتەپتىڭ قۇرىلۋىندا ماڭىزدى, ءتىپتى شەشۋشى ءرول اتقارعان دەسەك تە بولادى. ال اتالعان كونتسەرت 1947 جىلى ايگىلى كلارنەتشى بەنني گۋدمانعا ارنالىپ جازىلعان. XX عاسىرداعى ۇلى امەريكالىق كومپوزيتورلاردىڭ ءبىرى كوپلەند ايتۋلى تۋىندىعا ايرىقشا قۋات پەن كولوريت ۇستەيتىن دجاز بەن فولكلوردىڭ ەلەمەنتتەرىن قوستى. كونتسەرت وزىنە ەكپىندى ىرعاقتار مەن ليريكالىق اسەمدىكتى بىرىكتىرەدى. ال بۇل ءتاسىل كلارنەتكە ءوزىنىڭ بارلىق داۋلەسكەرلىگىمەن جارقىراۋعا تاماشا مۇمكىندىك بەرەدى.
كونتسەرت اياسىندا ا.پيارتتىڭ سكريپكا مەن كامەرالىق وركەسترگە ارنالعان «Fratres» («اعايىندى») شىعارماسىن تىڭداۋعا بولادى. بۇل – ەستونيالىق كومپوزيتوردىڭ ەڭ تانىمال تۋىندىلارىنىڭ ءبىرى. پيارت بىرەگەي ستيل ويلاپ تاۋىپ, ونى «تينتيننابۋلي» (لاتىن تىلىنەن اۋدارعاندا «قوڭىراۋ») دەپ اتادى. اتالعان تۋىندى جەڭىل دە جايماشۋاقتىلىعىمەن ەرەكشەلەنەدى. سكريپكا مەن كامەرالىق وركەسترگە ارنالعان «Fratres» – وپۋس, ياعني مۇندا ءاربىر نوتا تەرەڭ ماعىنامەن بەرىلىپ, رۋحاني تۇڭعيىققا ەنۋ ءارى پايىمداۋ اتموسفەراسىنا بولەيدى.
الەمدە وركەسترمەن بىرگە العاش رەت ورىندالاتىن س.فرانك–ە.ماگاليفتىڭ فلەيتا مەن ىشەكتى اسپاپتار وركەسترىنە ارنالعان كونتسەرتتىك ترانسكريپتسياسى, پرەليۋديا, فۋگا جانە ۆارياتسيالارى كەشتىڭ شارىقتاۋ شەگى بولماق. فرانتسۋز مۋزىكالىق ءرومانتيزمىنىڭ ءىرى وكىلدەرىنىڭ ءبىرى فرانك ءوزىنىڭ ەموتسيالىق تۇرعىدا مازمۇندى ءار اۋەن جاعىنان باي تۋىندىلارىمەن تانىمال. ماگاليف جاساعان شىعارمانى فلەيتا مەن وركەسترگە ىڭعايلاۋ – تۋىندىنىڭ جاڭا قىرلارىن اشىپ, ونىڭ سىرشىلدىعى مەن نازىكتىگىن ايشىقتاي تۇسەرى ءسوزسىز.
ديريجەر ءارى كونتسەرت اۆتورى رۋسلان ءبايمۋرزيننىڭ جەتەكشىلىگىندەگى كامەرالىق وركەستر ايتۋلى تۋىندىلاردى باسقا قىرىنان ۇسىنىپ, مۋزىكالىق ستيلدەردىڭ بارلىق نيۋانسى مەن كونتراسىن پاش ەتەدى. كوپتەن كۇتكەن كلاسسيكالىق مۋزىكا كەشىندە سوليست-اسپاپشىلار – سكريپكاشى ساعيقوجا ەرەجەپوۆ, فلەيتاشى ءاليما ابەۋوۆا, كلارنەتشى الماز توقپانوۆ ونەر كورسەتەدى.
