2003 جىلدان بەرى تۇراقتى وتكىزىلىپ, الىس-جاقىن شەتەلدەردەگى قاراكوزدەردىڭ ەلىمىزدىڭ ءار وڭىرىندە بولىپ, اتاكۇلدىكپەن تانىسۋىنا, جاڭا دوستار تابۋىنا, ەڭ باستىسى – انا تىلىنەن, اتا تاريحتان ءبىلىم سىنىنا ءتۇسىپ, بولاشاعىنا باعدار الۋىنا مۇمكىندىك بەرەتىن سايىس.
بۇدان ون جىل بۇرىن اقتاۋ قالاسىندا وتكەن حالىقارالىق وليمپيادا بيىل «قازاقستان – اتا جۇرتىم, قاسيەتتىم – انا ءتىلىم» اتاۋىمەن ءححى وتكىزىلىمىن تاعى دا ءابىش كەكىلبايدىڭ تۋعان جەرى – ماڭعىستاۋدا ۇيىمداستىردى. قازاق ءتىلى مەن ادەبيەتى ءپانى بويىنشا حالىقارالىق وليمپياداعا يران يسلام رەسپۋبليكاسىنان, قىتاي حالىق رەسپۋبليكاسىنىڭ سينتسزيان قالاسىنان, وزبەكستان رەسپۋبليكاسىنىڭ زاراۆشان قالاسى مەن بوستاندىق اۋدانىنان, رەسەي فەدەراتسياسىنىڭ سامارا, ومبى وبلىسى مەن تۇرىكمەنستان ەلىنەن 40-قا جۋىق قازاق بالالارى قاتىستى. الىستان كەلگەن ورەندەردى ماڭعىستاۋدىڭ بەلگىلى ونەرپازدارى ءان مەن جىردان شاشۋ شاشىپ قارسى الدى, ءتورىن ۇسىندى. شەتتە جۇرگەن قازاق بالالارىنىڭ تۋعان جەرگە قورجىنى بوس كەلمەگەن ەكەن, ولار – قىتايدان كەلگەن ءمولدىر نۇرلان, وزبەكستاننان كەلگەن ديانا وردابەكوۆا, وليمپياداعا رەسەي فەدەراتسياسىنان قاتىسۋشى الينا قاباەۆا مەن البينا كايروۆا, سونداي-اق تۇرىكمەنستاندىق وقۋشى باقتىگۇل امانگلىجوۆا جىراقتا جۇرسە دە ءابىش كەكىلباي ۇلىنىڭ «تۋعان جەر» اتتى تۋىندىسىن جاتقا وقىدى. ولار جەتەكشىلەرىمەن بىرگە ماڭعىستاۋدا وبلىستىق مۋزەيدى, قورىقتى, كورىكتى اقتاۋ قالاسىن ارالاپ, قارت كاسپي جاعاسىندا دەمالدى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى دانداي ىسقاق ۇلى, فيلولوگيا عىلىمدارىنىڭ كانديداتى گۇلزاميرا ايتباەۆا, جازۋشىلار وداعىنىڭ مۇشەسى سۇلەيمەن مامەت, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى قارلىعاش سارەكەنوۆا, سونداي-اق اقتاۋ قالاسىنداعى ش.ەسەنوۆ اتىنداعى كمتيۋ وقىتۋشىلارى مەن وزگە دە جوعارى وقۋ ورىندارىنىڭ بىلىكتى ۇستازدارى قازىلىق ەتكەن سايىستا جەڭىمپازدار انىقتالىپ, وليمپيادانى وتكىزۋ ەرەجەلەرىنە سايكەس, جەڭىمپازدار وقۋ-اعارتۋ مينيسترلىگىنىڭ I, II جانە III دارەجەلى ديپلومدارىمەن, سونداي-اق التىن, كۇمىس جانە قولا مەدالدارىمەن ماراپاتتالدى. ەرەكشە جەتىستىككە قول جەتكىزگەن قاتىسۋشىلارعا «دارىن» رەسپۋبليكالىق عىلىمي-پراكتيكالىق ورتالىعىنىڭ گراموتالارى مەن ارنايى سىيلىقتارى بەرىلىپ, ال ەڭ ۇزدىكتەرگە ەلىمىزدەگى بەدەلدى جوعارى وقۋ ورىندارىنىڭ رەكتورلىق ءبىلىم گرانتتارى تابىستالدى. سايىس قورىتىندىسىندا قىتاي حالىق رەسپۋبليكاسى سينتسزيان قالاسىنان كەلگەن 12-سىنىپ وقۋشىسى ءمولدىر نۇرلان قورقىت اتا اتىنداعى قىزىلوردا ۋنيۆەرسيتەتىنە, وزبەكستان رەسپۋبليكاسى بوستاندىق اۋدانىنداعى مەكتەپتىڭ 11-سىنىپ وقۋشىسى ديانا وردابەكوۆا قورقىت اتا اتىنداعى قىزىلوردا ۋنيۆەرسيتەتىنە, وزبەكستان رەسپۋبليكاسى بوستاندىق اۋدانىنان كەلگەن 11-سىنىپ وقۋشىسى سابينا اسقاروۆا ءو.جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنە, قىتاي حالىق رەسپۋبليكاسى سانجى وبلىسى قۇتىبي اۋدانىنداعى مەكتەپتىڭ 12-سىنىپ وقۋشىسى ءورازالى اقجول قورقىت اتا اتىنداعى قىزىلوردا ۋنيۆەرسيتەتىنە گرانت پەن جوعارى وقۋ ورنىنا تۇسۋگە جولداما السا, وزبەكستان رەسپۋبليكاسى بوستاندىق اۋدانىنان قاتىسقان 11-سىنىپ وقۋشىسى ارۋجان اقىلبەكوۆا ءو.جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنە, وزبەكستان رەسپۋبليكاسى بوستاندىق اۋدانىنىڭ 11-سىنىپ وقۋشىسى ەرسۇلتان جورابەكوۆ قورقىت اتا اتىنداعى قىزىلوردا ۋنيۆەرسيتەتىنىڭ گرانتىن ۇتىپ الدى.
– قازاق دياسپوراسى بالالارىنىڭ قازاق ءتىلى مەن ادەبيەتىنەن حالىقارالىق وليمپياداعا ىنتاسى وتە زور. ءبىز اقتاۋ قالاسىندا وتكەن ءححى وتكىزىلىمىندە دە وسى سەزىمدى بايقاپ قۋاندىق. شەتەلدەردەگى قازاق بالالارىنىڭ قازاق ءتىلىن ۇمىتپاۋى, انا تىلىندە ءبىلىمىن جان-جاقتى شىڭداۋ, اتاجۇرتقا كەلىپ ءبىلىم الۋى – اسا ماڭىزدى قادام. سوندىقتان ءبىز جۇمىس كوكجيەگىمىزدى كەڭەيتىپ, الداعى ۋاقىتتا وزگە پاندەرمەن بىرگە بيولوگيا پانىنەن دە وليمپيادا وتكىزۋدى جوسپارلاپ وتىرمىز. وليمپيادانى وتكىزۋگە قولداۋ كورسەتكەن ماڭعىستاۋ وبلىسىنىڭ باسشىلىعىنا, الىستان كەلگەن وقۋشىلار مەن جەتەكشىلەرىنە العىس ايتامىن, – دەدى «دارىن» رەسپۋبليكالىق عىلىمي پراكتيكالىق ورتالىعىنىڭ ديرەكتورى عاجدەمبەك تۇرسىنوۆ.
ءىس-شارا سوڭىندا ماراپات پەن جوعارى وقۋ ورىندارىنىڭ وقۋ گرانتىن ۇتىپ العاندار قۋانىپ, جۇلدەگە ىلىكپەگەندەر جىلاعان اسەرلى ساتكە كۋا بولدىق. شىندىعىندا, تەرەزەدەن سىرتقا قاراپ ءۇنسىز جىلاپ تۇرعان تالدىرماش قىزدىڭ كوز جاسىنان جۇلدەدەن قۇر قالىپ ەمەس, تۋعان ەلگە ورالسام, ەلىمىزدەگى ىرگەلى وقۋ ورنىنىڭ ستۋدەنتى اتانىپ, بولاشاعىمدى باباكۇلدىكپەن بايلانىستىرسام دەگەن ەڭ اسىل ارمانى الىستاپ كەتكەندەي وكىنىشتى باستان كەشىپ تۇرعانداي سەزىندىم. قازاق دياسپوراسى بالالارى ءۇشىن قازاق ءتىلى مەن ادەبيەتى پانىنەن حالىقارالىق وليمپيادانىڭ ءوتۋى – جاقسى جوبا, بىراق قاتىسۋشى بالالار سانىنىڭ ازايۋى كوڭىل الاڭداتادى, ال قاراكوزدەردىڭ جىلاپ كەتۋى جان اۋىرتادى ەكەن.
ماڭعىستاۋ وبلىسى
