فوتو: e-mba.ru
قازىر ەلىمىزدەگى مەملەكەتتىك قىزمەتتەگى HR ينستيتۋتتارى جاساندى ينتەللەكت قولدانا باستادى. پرەزيدەنت جانىنداعى مەملەكەتتىك باسقارۋ اكادەمياسى HR ينستيتۋتىنىڭ باسشىسى رۋستام ءمۋسيننىڭ ايتۋىنشا, جاساندى ينتەللەكت ادامنىڭ قۇزىرەتتىلىكتەرىن باعالاپ, ساراپتاۋعا كومەكتەسەدى. سونداي-اق ءىس-قيمىلىنا, داۋىس ىرعاعىنا دا باعا بەرەدى. اسىرەسە بۇل ءادىس ۋاقىتتى ۇنەمدەيدى, ويتكەنى جۇزدەگەن ۇمىتكەردى ءبىر ۋاقىتتا باعامداي الادى.
ء«بىز بۇگىنگى كۇنى ە-kyzmet اقپاراتتىق جۇيەسىندە جىلدار بويى جيناقتالعان ۇلكەن دەرەكتەرمەن (big data) جۇمىس ىستەپ, قۇزىرەتتىلىكتەردى انىقتاۋدىڭ ءتيىمدى جولدارىن زەرتتەپ جاتىرمىز. ناقتى ايتساق, 150-دەن استام ادامنىڭ دەرەكتەرى بار. جاساندى ينتەللەكت تاۋەكەل ايماقتارىن انىقتاۋعا دا كومەكتەسەدى. ماسەلەن, كىمدى العا قاراي ۇمتىلدىرۋ قاجەت, كىمدە قانداي داعدىلار بار, قانداي قۇزىرەتتەردى دامىتۋ كەرەك سەكىلدى ادام مۇمكىندىكتەرىن تانۋعا ۇلەس قوسادى», دەدى ر.مۋسين.
مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي ءاربىر مەملەكەتتە تالانتتى قىزمەتكەرلەر ءۇشىن كۇرەس, جاساندى ينتەللەكت جانە HR كەڭىستىگىن ترانسفورماتسيالاۋ داۋىرىندە ادام كاپيتالىن دامىتۋدىڭ ماڭىزى زور ەكەنىن ايتادى.
«مەملەكەتتىك قىزمەتتى ترانسفورماتسيالاۋدا باستى نازار مەملەكەتتىك قىزمەتتىڭ كادرلىق الەۋەتىن نىعايتۋعا, ناقتى سەكتوردان جاڭا باسقارۋشىلاردى تارتۋعا اۋدارىلادى. وسىعان سايكەس ءبىز قازىر ءتۇرلى سالادا جۇرگەن كاسىبي مامانداردى تارتۋ ماقساتىندا مەملەكەتتىك قىزمەتتىڭ گيبريدتى مودەلىن قالىپتاستىرۋعا تىرىسىپ جاتىرمىز», دەدى اگەنتتىك توراعاسى.
HR سالاسىندا ۇلكەن جەتىستىككە جەتكەن وڭتۇستىك كورەيانىڭ KIPA پرەزيدەنتى سانحان چوي ساياسي شەشىم قابىلدايتىن تۇلعالاردىڭ قوعامدىق كوشباسشىلىعى تۋرالى باياندادى.
«كورەيانىڭ مەملەكەتتىك باسقارۋ ينستيتۋتى پرەمەر-مينيستر جانىندا قۇرىلعان, ۇلتتىق زەرتتەۋ ينستيتۋتى دەپ اتالادى. ال KIPA عىلىمي زەرتتەۋ ينستيتۋتى يننوۆاتسيانى, ۇيىمداستىرۋشىلىق ديزايندى, ۇكىمەتتىڭ تيىمدىلىگىن باعالاۋدى, رەتتەۋدى, اپاتتار قاۋىپسىزدىگىن, جانجالداردى باسقارۋدى جانە قوعامدىق كوشباسشىلىقتى زەرتتەيدى. قازىرگى ۋاقىتتا 50-گە جۋىق PhD مەن 100-گە جۋىق PhD دارەجەسىنە ۇمىتكەر بار. مەنىڭ قازاقستانعا كەلۋ سەبەبىم ورتالىق ازياداعى مەملەكەتتىك قىزمەتكەرلەردىڭ مۇمكىندىكتەرىن باعامداۋ بولاتىن. الداعى ۋاقىتتا مەملەكەتتىك باسقارۋ اكادەمياسىمەن ورتالىق ازياداعى باسشىلىق قىزمەتتەگى ادامداردىڭ الەۋەتىن ارتتىرۋدىڭ ءتۇرلى باعدارلاماسىن ازىرلەۋ جوسپاردا بار, سول ءۇشىن زەرتتەۋ كەزەڭىندە بىرلەسىپ جۇمىس ىستەۋگە شاقىرامىن», دەدى سانحان چوي.
اكادەميا رەكتورى ەرلان ءابىل بيىل مەملەكەتتىك باسقارۋ اكادەمياسىنىڭ پەرسونالدى ادام رەسۋرستارىن باسقارۋ سالاسىنداعى ۇلتتىق ستاندارتتاردىڭ تالاپتارىنا سايكەستىكتى سەرتيفيكاتتاۋ جونىندەگى ۇلتتىق اككرەديتتەۋ ورتالىعى تاراپىنان اككرەديتتەلگەنىن مالىمدەدى. سونداي-اق ول مەملەكەت باسشىسىنىڭ مەملەكەتتىك قىزمەتتى دامىتۋ جونىندەگى تاپسىرمالارىن ىسكە اسىرۋ ماقساتىندا مەملەكەتتىك قىزمەت ىستەرى اگەنتتىگىمەن بىرلەسىپ «قازاقستان رەسپۋبليكاسى مەملەكەتتىك قىزمەتىنىڭ قازىرگى زامانعى مودەلىندەگى ستراتەگيالىق HR» ۇجىمدىق مونوگرافياسىن ازىرلەگەنىن جەتكىزدى. مونوگرافيادا مەملەكەتتىك قىزمەتتەگى ادام رەسۋرستارىن ۇزاقمەرزىمدى باسقارۋ ماسەلەلەرى, سونداي-اق قازاقستاننىڭ مەملەكەتتىك باسقارۋ جۇيەسىن جاڭعىرتۋ كونتەكسىندە وسى سالانى دامىتۋ كەلەشەگى قامتىلعان.
«مونوگرافيا مەملەكەتتىك قىزمەتتەگى ادام رەسۋرستارىن باسقارۋ سالاسىن دايەكتى تۇردە اشاتىن ءتورت تاراۋدان تۇرادى. اۆتورلار تۇتاستاي العاندا ستراتەگيالىق HR-عا تالداۋ جاساپ, وزىق حالىقارالىق تاجىريبە تۋرالى دەرەكتەردى ۇسىندى, سونداي-اق HR-عا ىرىكتەۋدىڭ, وتكەرۋدىڭ جانە كاسىبيلەندىرۋدىڭ بارلىق ەلەمەنتتەرىن كورسەتتى. كىتاپتا بيۋروكراتيادان ارىلتۋ جانە كليەنتكە باعدارلانعان سەرۆيستىك مەملەكەتتىك قىزمەتتى دامىتۋ, جاڭا ۇيىمدىق مادەنيەتتى قالىپتاستىرۋ كونتەكستىندە ەتيكانى ساقتاۋ ماسەلەلەرىنە ايرىقشا نازار اۋدارىلعان», دەدى اكامەديا رەكتورى.
