وtyrar.kz جازعانداي, بۇل ءىستى القابيلەر بىرنەشە اي بويى قارادى. سوتتالۋشى جازاسىن ورتا رەجيمدەگى كولونيادا 15 جىل وتكىزەتىن بولادى.
سوتتالۋشىنىڭ ادۆوكاتى ايناگۇل رۇستەموۆانىڭ ايتۋىنشا, ايەل قىلمىستى پسيحيكالىق اۋىتقۋلارعا بايلانىستى جاساعان. ايەلدە گالليۋتسيناتسيا بولىپ, باسىنداعى داۋىستار بالالاردى ولتىرۋگە شاقىرعان. ادۆوكاتتىڭ ايتۋىنشا, وقيعادان كەيىن تۇركىستاننان شىمكەنتكە قاشۋ ءۇشىن ەمەس, ءوز-وزىنە قول سالۋ ءۇشىن كەتكەن.
- مەن مامان ەمەسپىن, بىراق ءبىز ونىڭ پسيحولوگيالىق اۋىتقۋلارى بار دەپ سانايمىز. سەبەبى ول داۋىستاردى ەستيتىنىن ايتادى. ءبىز مۇنى القا بيلەرگە دە دالەلدەۋگە تىرىستىق. سەبەبى اتا-اناسىنىڭ ايتۋىنشا 2008 جىلى 17 قىركۇيەكتە ول قىزىلوردادا كوللەدجدە وقىپ جۇرگەنىندە ەسىنەن تانىپ قالىپ, كەيىن ەسىن جيعاندا ساندىراقتاي باستاعان. جەدەل جاردەم قىزمەتكەرلەرى وندا دەپرەسسيا بەلگىلەرى بار ەكەنىن ايتىپ, پسيحياتريالىق اۋرۋحاناعا اپارعانىن ايتتى. بىراق ءبىر كۇننەن كەيىن مەنىڭ قورعاۋشىمنىڭ اتا-اناسى ونى وزدەرى ەمدەپ, الىپ كەتەتىندىگى تۋرالى قولحات جازدى. مۇنىڭ بارلىڭىن ءىس ماتەريالدارىنا قوستىم. بىراق بۇل فاكت ەسكەرىلمەدى. سونىمەن قاتار, مەنىڭ قورعاۋشىم بىرنەشە جىلدار بويى ءوزىن-ءوزى ولتىرۋگە تىرىسقان. ونىڭ باسىنداعى داۋىستار ۇنەمى ءوزىن-ءوزى ءولتىرۋدى نەمەسە بىرەۋدى ولتىرۋگە بۇيىرعان. ءتىپتى جانۋار دا ءوز بالاسىن ولتىرمەيدى, ەسى دۇرىس ايەل بالالارىن قالاي ءولتىرسىن؟, – دەدى ايناگۇل رۇستەموۆا.
سوت پروتسەسىندە بالالاردىڭ اكەسى جابىرلەنۋشى تاراپ رەتىندە تانىلدى. مەملەكەتتىك ايىپتاۋشى سوتتالۋشىنىڭ ەكى بالاسىن ءولتىرۋ سەبەبىن تۇسىندىرمەگەنىن العا تارتتى. الايدا ول تالقىلاۋ كەزىندە وزىنە جەڭىل ۇكىم سۇراعان.
- سوتقا دەيىنگى تەرگەۋ بارىسىندا ول ايعاقتار بەردى. ءىس "كامەلەتكە تولماعان ادامدى ءولتىرۋ" بابى بويىنشا سوتقا بەرىلدى. وسى باپتا قاراستىرىلعان سانكتسيا وعان 15 جىلعا باس بوستاندىعىنان ايىرۋدى سۇرادى. سونىمەن قاتار, ءىس بويىنشا جەڭىلدەتەتىن جاعداي بۇرىن سوتتالماعانى ەسكەرىلدى. ال قىلمىستى اۋىرلاتاتىن فاكتورلار انىقتالعان جوق, - دەدى مەملەكەتتىك ايىپتاۋشى ايگۇل بەمۋرزاەۆا.
قىلمىس وسى جىلدىڭ 7 اقپانىندا تۇركىستانداعى جالدامالى پاتەردە سوتتالۋشىنىڭ تۋعان كۇنىندە جاسالدى. ءىس ماتەريالدارىنا ايەلدىڭ كۇيەۋىنە جازعان حابارلامالارى دا بولدى. قىلمىسقا بىرنەشە كۇن بۇرىن ولاردىڭ اراسىندا جانجال تۋىنداعانى بەلگىلى بولدى. سوتتا ايەلدىڭ بالالارىن ولتىرۋىنە جۇبايىمەن جانجال سەبەپ بولۋى مۇمكىن ەكەنى ايتىلدى.سوتقا دەيىنگى تەرگەۋ بارىسىندا وعان بارلىق قاجەتتى ساراپتامالار, سونىڭ ىشىندە پسيحياتريالىق ساراپتاما جۇرگىزىلگەن. ناتيجەسىندە 32 جاستاعى ايەلدىڭ ەسى دۇرىس دەپ تانىلدى.
- سوتقا دەيىنگى تەرگەۋ بارىسىندا ول كىناسىن مويىنداعان ەدى, بىراق سوتتا ول قىلمىستى قالاي جاساعانىن ەسىندە جوق ەكەنىن ايتتى. سوتتا ول “پسيحيكالىق اۋرۋىم بار” دەگەن ۇستانىمدى ۇستاندى. بۇل فاكتىلەر سوت پروتسەسىندە تەكسەرىلدى, بىراق ەشقانداي راستاۋ تابىلعان جوق. سوت-پسيحياتريالىق ساراپتامانىڭ قورىتىندىسى بويىنشا ونىڭ ەشقانداي اۋرۋمەن اۋىرمايتىندىعىن انىقتالدى, - دەدى تۇركىستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى داۋرەن ماداليەۆ.
ايەل قىلمىس جاساعان سوڭ قاشىپ كەتكەن. ونى ىزدەۋگە قالانىڭ بارلىق قىزمەتكەرلەرى جۇمىلدىرىلىپ, ناتيجەسىندە شىمكەنتتەن تابىلدى. ول بۇرىن مەكتەپكە دەيىنگى مەكەمەدە تاربيەشى بولىپ جۇمىس ىستەگەن. ءوڭىردىڭ ءبىلىم باسقارماسى ديسپانسەرلىك ەسەپتە تۇرماعانىن, اتا-انالارمەن جانە بالالارمەن جاقسى قارىم-قاتىناستا بولعانىن جەتكىزدى. ءتىپتى ەڭبەگى ءۇشىن ءتۇرلى العىس حاتتار مەن ماداقتامالار دا الىپ كەلگەن.
