وتباسىنداعى ءتورت بالانىڭ تۇڭعىشى ايبەك تولەگەن ۇلى اقسۋات اۋدانىنداعى ويشىلىك اۋىلىندا دۇنيە ەسىگىن اشقان. جاستايىنان دومبىرا شەرتۋ, ءان ايتۋ سياقتى ونەرگە اۋەستەنىپ, زامانداستارىنىڭ الدى بولىپ ءوستى. مەكتەپتە ءار نارسەنى بىلۋگە قۇلشىنىپ, جانىنا جاقىن ءپاننىڭ بارلىعىندا ۇزدىك ناتيجە كورسەتتى. ءسويتىپ ءجۇرىپ 11 جىل زىمىراپ وتە شىقتى. بىلىكتى مامان بولۋدى ارمانداپ, شاكارىم اتىنداعى سەمەي مەملەكەتتىك ۋنيۆەرسيتەتىنە وقۋعا ءتۇستى. ويلانا كەلە اتا-اناسىنىڭ اقىلىن قۇپ الىپ, مەملەكەتتىك جانە جەرگىلىكتى باسقارۋ ماماندىعىن تاڭدادى. ايبەكتىڭ سوزىنشە, بالا كۇنگى ارمانى اسكەري قىزمەتكەر بولۋ ەكەن. بىراق ارمانىما جەتپەي قالدىم دەپ ەش وكىنبەيدى. سەبەبى ارتىنان ەرگەن ەكى باۋىرى بۇگىندە قۇقىق قورعاۋ مەن اسكەري سالادا ەڭبەكتەنىپ كەلەدى.
2009 جىلى قولىنا ديپلومىن الىپ, «جاستار پراكتيكاسى» باعدارلاماسىمەن سەمەي قالاسىنىڭ ىشكى ساياسات بولىمىندە ماماننىڭ كومەكشىسى بولىپ ەڭبەك جولىن باستادى. اينالاسىنداعى دوس-جاراندارى «جاستايىنان ءومىرىن اكىمدىككە ارناعان» دەپ ازىلدەسە دە, 2015 جىلعا دەيىن قالالىق اكىمدىكتە كومپيۋتەر تەحنيكاسىنىڭ وپەراتورى, باس ماماننىڭ مىندەتىن اتقارۋشى, باس مامان, سەمەي قالاسى اكىمىنىڭ كومەكشىسى قىزمەتتەرىن اتقاردى.
سودان كەيىن دە ىشكى ساياسات بولىمىندەگى اقپاراتتىق ناسيحات جۇمىسى سەكتورىنىڭ مەڭگەرۋشىسى, ءبولىم باسشىسىنىڭ ورىنباسارى, ىشكى ساياسات ءبولىمىنىڭ باسشىسى لاۋازىمىن ويداعىداي اتقارىپ, ارىپتەستەرى اراسىندا دا, ەل ىشىندە دە ابىروي-بەدەلى بيىكتەدى. جاقسى ادامنىڭ جەردە قالمايتىنى سياقتى ىسكەر ماماننىڭ قاي كەزدە دە سۇرانىسقا يە ەكەنى بەسەنەدەن بەلگىلى. تاپسىرمانى تاپ-تۇيناقتاي ورىندايتىن قىزمەتكەر – قاي كەزدە دە تاپتىرمايتىنى باسى اشىق ماسەلە.
2022 جىلى باعىن سىناپ شىعىس قازاقستان وبلىسى ىشكى ساياسات باسقارماسىنا قاراستى شىعىس قازاقستان وبلىسى قازاقستان حالقى اسسامبلەياسىنىڭ حاتشىلىعى جانە ەتنوسارالىق قارىم-قاتىناس مونيتورينگى ءبولىمى باسشىسى لاۋازىمىنا تاعايىندالدى. تارتىنىپ قالعان جوق. تالماي ەڭبەك ەتتى. ايبەك تولەگەن ۇلى ول كۇندەر ەسىندە ەرەكشە قالعانىن جاسىرمايدى. قىزمەت بابىمەن باسقا قالاعا اۋىسقاندىقتان, ءۇش قىزى مەن سۇيگەن جارى سەمەيدە قالدى. تۇراتىن ءۇيدىڭ ماسەلەسى بىرجاقتى شەشىلگەنشە وتباسىنان جىراقتا ءجۇردى. اراعا اپتا سالىپ وسكەمەن مەن سەمەي اراسىن جول قىلاتىن. قاتتى ساعىناتىنى ءۇش ق ۇلىنشاعى مەن تۋعان قالاسى سەمەي ەدى. سوندىقتان دا بولار 2022 جىلى مەملەكەت باسشىسىنىڭ جارلىعىمەن وبلىس بولىپ قايتا قۇرىلىپ, جەكە وتاۋىن تىككەن اباي وڭىرىنە اپپاراتتىڭ ۇيىمداستىرۋ-ينسپەكتورلىق ءبولىمىنىڭ باس ينسپەكتورى لاۋازىمىنا اۋىسىپ كەلۋگە بىردەن كەلىسىمىن بەردى.
25 جىلعى ۇزىلىستەن كەيىن تىنىسى قايتا اشىلىپ, تۇلەپ كەلە جاتقان وبلىس ورتالىعىنىڭ ءار مەزەتى كوز الدىندا ءوتىپ جاتقاندىقتان, ايبەك سامات ابايداي الىپ, شاكارىمدەي كەمەڭگەر, مۇحتارداي عۇلامانىڭ كىندىك قانى تامعان مەكەننىڭ بولاشاعى جارقىن بولارىنا سەنەدى. بالا كۇنىنەن جاقسى كورەتىنى دە, اراسىندا ءوزى دە اۋەسقوي فۋتبولشىلار اراسىنداعى تۋرنيردە توپ جاراتىندىقتان, وبلىس بولعالى قايتا قۇرىلعان «ەلىماي» فۋتبول كلۋبى مەن «سەمەي» فۋتزال كلۋبىنىڭ كەزدەسۋلەرىن تاماشالاۋعا اسىعادى. ءبىر ءوزى عانا ەمەس قاسىنا كەلىنشەگى مەن ءۇش كىشكەنتايىن ەرتىپ بارادى. «بالالارىمدى ەرتىپ بارۋىمنىڭ دا ءمانى تەرەڭدە. ولار بۇگىننەن باستاپ ەلىنە ەمىرەنىپ, جەرىنە جانكۇيەر بولعانى دۇرىس. اكەم دە ءدال وسىلاي بىلگەنىمەن ءبولىسىپ, تالابىمنىڭ تاسقا سوعىلماۋىنا سەپتىگىن تيگىزگەن ەدى», دەيدى ايبەك.
بىلتىر اباي وبلىسىنىڭ جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باسشىسىنىڭ ورىنباسارى قىزمەتىن اتقارعان ايبەك تولەگەن ۇلى مەملەكەتتىك قىزمەتكەر بولۋ اكىمدىك عيماراتىندا نەمەسە كابينەتتە وتىرعان ساتپەن شەكتەلمەيتىنىن, جۇمىستان تىس ۋاقىتتا دا كوڭىلدە تۇراتىنىن ايتادى. «بالاڭمەن بىرگە قالانىڭ كورىكتى جەرلەرىن ارالاپ جۇرگەن ساتتە ءار كۇن سايىن دامىپ, كوركەيىپ كەلە جاتقان سەمەيدى كورگەندە كوڭىلىڭ مارقايادى. تۋعان ولكەڭە قاتىستى جىلت ەتكەن جاقسى جاڭالىقتى دا قۋانا قابىلدايتىنىمىز راس», دەيدى ول. شىنىندا دا, اتقاراتىن جۇمىسىڭنىڭ ناتيجەسىن كوزبەن كورۋ, كوڭىلمەن سەزىنۋ – سوزبەن جەتكىزىپ بولمايتىن جاقسى دۇنيە.
ءۇش بالانى بىرگە تاربيەلەپ وتىرعان اياۋلى جارى ۇلجان مەكتەپتە مۇعالىم بولىپ جۇمىس ىستەيدى. ول دا ەل ەرتەڭى ءۇشىن ەش ايانباي, بالالاردىڭ بەتىن بىلىمگە بۇرىپ ءجۇر. قارا شاڭىراقتا قالقايىپ وتىرعان اكە-شەشەسى – ەڭبەك دەمالىسىندا اسىعا جەتەتىن ۇلدارىنىڭ تىلەكشىسى. كوزىنىڭ اعى مەن قاراسىنداي بولعان جالعىز قارىنداسى جادىرا – ارمانىنا جەتكەن قالامى جۇردەك جۋرناليست.
2023 جىلدىڭ قىركۇيەگىنەن باستاپ اباي وبلىسى اكىمىنىڭ اپپاراتى ۇيىمداستىرۋ-ينسپەكتورلىق ءبولىمىنىڭ ءبولىم باسشىسى قىزمەتىنە تاعايىندالعان ايبەكتىڭ مەملەكەتتىك قىزمەت سالاسىنداعى ەڭبەك ءوتىلى 12 جىلدان اسقان. كوزدى اشىپ-جۇمعانشا وتە شىققان ۋاقىت بولعانىمەن, ونىڭ پىكىرىنشە ماقسات-مۇراتى بەلگىلى, باعدارى ايقىن – وتباسى تىرەگى بولا ءجۇرىپ, بالالارىنىڭ ارمانىنا جەتۋىن كورۋ, ەلگە ادال قىزمەت ەتۋ.
راس, مەملەكەتتىك قىزمەت – كوپ تالقىلاناتىن تاقىرىپتىڭ ءبىرى. ابىرويىن العا ۇمسىنا كورسەتىپ, مۇمكىندىگىن شەكتەن تىس اسىرا پايدالاناتىندار بۇل قىزمەتتىڭ بەدەلىنە نۇقسان كەلتىرىپ جۇرگەنىن دە بىلەمىز. ارامىزدا جۇرگەن بىلىكتى ماماندار, ءبىلىمدى جاندار كەۋدە سوقپايدى. ولار ەلەۋسىز جۇرسە دە, ۇشان-تەڭىز ەڭبەك ءسىڭىرىپ, ءوز سالاسىنىڭ تاسىن ورگە سۇيرەپ, حالىقتىڭ قامىن جەپ, ەلگە قالتقىسىز قىزمەت ەتىپ كەلەدى. ەل ەرتەڭى بولارلىق كوپكە ۇلگى وسىنداي جانداردىڭ كوبەيگەنى – كوكەيدەگى ۇلكەن ارمان.
اباي وبلىسى
