قازىر ەلىمىزدە مەملەكەتتىك قىزمەتكە ىرىكتەۋدىڭ جاڭا جۇيەسىن كەزەڭ-كەزەڭىمەن ەنگىزۋ قولعا الىنىپ كەلەدى. مۇنداعى باستى ماقسات – مەملەكەتتىك قىزمەتتىڭ ءيميدجىن ارتتىرۋ, كادرلىق الەۋەتتى دامىتۋ جانە جاس كادرلاردى تارتۋ. بۇل ماسەلەگە جان-جاقتى توقتالعان مەملەكەتتىك قىزمەت ىستەرى اگەنتتىگىنىڭ سولتۇستىك قازاقستان وبلىستىق دەپارتامەنتىنىڭ باسشىسى دۋلات تايشىباي: «جاستار – ەلىمىزدىڭ باستى ستراتەگيالىق رەسۋرسى. مەملەكەتتىك قىزمەتشىلەر قاتارىندا ءبىلىمدى, ءوزىن-ءوزى دامىتۋعا دايىن جاستار كوپ. وبلىستىڭ مەملەكەتتىك ورگاندارىندا 4 مىڭعا جۋىق مەملەكەتتىك قىزمەتشى جۇمىس ىستەيدى, سونىڭ 30%-ى 35 جاسقا دەيىنگى جاستار», دەدى.
ونىڭ ايتۋىنا قاراعاندا, پرەزيدەنتتىڭ مەملەكەتتىك قىزمەتكە تۇرۋ پروتسەدۋراسىن وڭايلاتۋ بويىنشا بەرگەن تاپسىرمالارىنا سايكەس «ب» كورپۋسىنىڭ E-R-1, E-R-2, E-R-3 ساناتتارىنداعى لاۋازىمدارىنا قويىلاتىن بىلىكتىلىك تالاپتارى وزگەرگەن. قازىر بۇل لاۋازىمدارعا ورتا بىلىمنەن كەيىنگى نەمەسە تەحنيكالىق جانە كاسىپتىك ءبىلىمى بار ازاماتتار جىبەرىلەدى. E-R-4 ساناتىنداعى اۋداندىق نەمەسە قالالىق جەرگىلىكتى اتقارۋشى ورگانداردىڭ باس ماماندارىنىڭ لاۋازىمدارىنا ورنالاسۋعا قويىلاتىن تالاپتار دا جەڭىلدەتىلگەن. ەندى بۇرىنعىداي جوعارى ءبىلىم تالاپ ەتىلمەيدى, ورتا بىلىمنەن كەيىنگى نەمەسە تەحنيكالىق جانە كاسىپتىك ءبىلىمنىڭ بولۋى جەتكىلىكتى.
قازىر جاستار ءۇشىن بوس مەملەكەتتىك اكىمشىلىك لاۋازىمدارعا كونكۋرستان تىس ورنالاسۋدىڭ بىرەگەي مۇمكىندىكتەرى جاسالىپ وتىر. اتاپ ايتقاندا, GPA 3,33 كورسەتكىشىمەن مەملەكەتتىك گرانت ەسەبىنەن وقۋىن اياقتاعان جوعارى وقۋ ورىندارىنىڭ تۇلەكتەرى كونكۋرستىق ىرىكتەۋسىز جانە تەستىلەۋسىز بەلگىلى ءبىر مەملەكەتتىك لاۋازىمدارعا ورنالاسا الادى. وندايلاردىڭ قاتارىنا اۋداننىڭ نەمەسە وبلىستىق ماڭىزى بار قالانىڭ اكىمى مەن ءماسليحات اپپاراتتارىنىڭ تومەنگى لاۋازىمى, وسىلاردىڭ اتقارۋشى ورگاندارىنىڭ باسشى ەمەس لاۋازىمى, ت.ب سول سياقتى قىزمەتتەر جاتادى.
قازىر وبلىستا ماناش قوزىباەۆ اتىنداعى ۋنيۆەرسيتەتتىڭ 7 تۇلەگى وسى جولمەن لاۋازىم كونكۋرستان تىس تاعايىندالعان. تاعى 2 تۇلەكتىڭ كانديداتۋراسى كەلىسىلىپ جاتىر. «بىلتىر «ديپلوممەن – اۋىلعا!» باعدارلاماسىمەن جاس ماماندارعا تۇرعىن ءۇي ساتىپ الۋعا نەمەسە جاڭادان سالۋعا جەڭىلدەتىلگەن كرەديت بەرىلىپ, كوتەرمە جاردەماقى تولەندى. كەيىنگى 4 جىلدا اۋىلدىق جەرلەردە جۇمىسپەن قامتىلعان بارلىق 60 جاس قىزمەتشىگە بيۋدجەتتىك كرەديت پەن كوتەرمە جاردەماقى بەرىلدى», دەدى د.تايشىباي.
دارىندى جاستاردى تارتۋ ءۇشىن مەملەكەتتىك قىزمەت ىستەرى دەپارتامەنتىنىڭ قاسىنان 2018 جىلدان بەرى بىلىكتىلىك مەكتەبى جۇمىس ىستەيدى. وعان جوعارى جانە كاسىپتىك-تەحنيكالىق وقۋ ورىندارىنىڭ بەلسەندى ستۋدەنتتەرى تارتىلعان. اشىلعان ۋاقىتتان بەرگى 9 ماۋسىمدا مەكتەپتىڭ 37 ستۋدەنتى اكادەميا فيليالدارىندا دايىندىق باعدارلاماسىمەن مەملەكەتتىك ورگانداردا وندىرىستىك تاجىريبەدەن وتكەن. ەندى زاڭنامانى بىلۋگە جانە جەكە قاسيەتتەرىن باعالاۋعا تەستىلەۋدەن وتۋلەرى ءتيىس, سودان كەيىن مەملەكەتتىك سەكتورداعى تالانتتار پۋلىنا قابىلداۋ تۋرالى سەرتيفيكات الادى.
بيىل 1 شىلدەدەن باستاپ وبلىستا مەملەكەتتىك قىزمەتكە كىرۋ بويىنشا جاڭا قاناتقاقتى جوبا سىناقتان وتەدى. بۇل جوبا بىرقاتار وبلىس پەن مەملەكەتتىك ورگاندا ءساتتى جۇزەگە اسىرىلعان. جاڭا فورمات ۇمىتكەرلەرگە كونكۋرستىڭ بارلىق كەزەڭىنە, جوسپارلانعان ۋاقىتتا جانە ەلدىڭ كەز كەلگەن جەرىنەن قاتىسۋعا مۇمكىندىك بەرەدى.
مەملەكەتتىك قىزمەتكە العاش كىرگەندەر ءۇشىن تالىمگەرلىك ينستيتۋت قۇرىلادى. بۇل بۇرىننان بار تاجىريبە بولسا دا ەلىمىز نارىقتىق قاتىناسقا وتكەن كەزەڭنەن بەرى ۇمىتىلعان. ەندى ءومىر ونىڭ وڭ تاجىريبە ەكەنىن كورسەتىپ وتىر. مەملەكەتتىك قىزمەتتەگى ەڭبەك جاعدايلارىنا بەيىمدەلۋى ءۇشىن جاڭا قىزمەتشىگە سىناق مەرزىمى بەرىلەتىندىگى دە وتە ماڭىزدى.
پرەزيدەنتتىڭ 2015 جىلعى 29 جەلتوقسانداعى جارلىعىنا تۇزەتۋلەر ەنگىزىلىپ, سونىڭ ارقاسىندا ءتورت توقسان ىشىندە قاتارىنان جوعارى باعا العان قىزمەتشىلەردى جوعارى تۇرعان لاۋازىمعا تىكەلەي تاعايىنداۋعا بولادى. بۇرىن جوعارى لاۋازىمعا ءوتۋ ءۇشىن قايتادان تەستىلەۋدەن وتكىزىلەتىن. ءوز كەزەگىندە, ەكى توقسان قاتارىنان قاناعاتتانارلىقسىز باعا العان قىزمەتشىلەردىڭ لاۋازىمى تومەندەتىلەدى, بوس لاۋازىم بولماعان جاعدايدا جۇمىستان شىعارىلادى.
«قازىرگى تاڭدا مەملەكەتتىك قىزمەتتىڭ وڭىرلىك كادر رەزەرۆىنە ىرىكتەۋ جۇرگىزىلىپ جاتىر. ونىڭ قاتىسۋشىلارى – ىرىكتەۋ كەزەڭدەرىنەن وتكەن وبلىستىڭ 35 جاسقا دەيىنگى جاستارى. قورىتىندى قىركۇيەك ايىندا شىعارىلادى», دەدى ءسوزىنىڭ سوڭىندا د.تايشىباي.
سولتۇستىك قازاقستان وبلىسى
