سول كەزدەگى زامان تالابىنا ساي ورىس مەكتەبىندە ءبىلىم الدى. اكەلەرى سۋحان ومىردەن ەرتە ءوتىپ, جەتى بالانى انالارى راۋشان جەتكىزدى. جالپى, قاي سالادا دا قىزمەتتىڭ بارلىق ساتىسىنان وتكەن ماماننىڭ تاجىريبەسى تولىسادى.
ء«بىزدىڭ كەزىمىزدە جاس كادرلارعا قولداۋ كوپ ەدى. جۇمىسىن جاڭا باستاعانداردى تاجىريبەلى ماماندارعا بەكىتىپ بەرەتىن. العاش جول كورسەتكەن تالىمگەرىم سوعىس ارداگەرى كۇنتۋعان كوشىموۆ دەگەن اعامىز بولدى. قازىر الماتى قالاسىندا تۇراتىن كەمال سماعۇلوۆ اعايدان دا ۇيرەنگەنىم كوپ. جۇمىستا جاڭا باستاعان ساتتەگى زەينەپ تاسماعامبەتوۆا, ۇلتۋعان ابدىباەۆا, بازاركۇل نىسانعاليەۆا, جاقسىبيكە جۇماحمەتوۆا, انار ءانيازوۆاداي اپايلاردىڭ جاناشىرلىعى ەستەن كەتپەيدى. اسىرەسە مارقۇم زەينەپ اپاي 20 جىلداي ءبىر كابينەتتە قاتار وتىرىپ, ماعان جۇمىستان بولەك ادامدارمەن قارىم-قاتىناستىڭ قىر-سىرىن ۇيرەتتى. الدىڭعى بۋىننىڭ وسىنداي قامقورلىعى ارقاسىندا مامان رەتىندە قالىپتاستىق», دەيدى قازىناگۇل سۋحانقىزى.
ءار جىلدارى اۋداندىق ەكونوميكا جانە بيۋدجەتتىك جوسپارلاۋ ءبولىمىنىڭ بولىمشە جەتەكشىسى, سەكتور مەڭگەرۋشىسى, ءبولىم باسشىسىنىڭ ورىنباسارى قىزمەتتەرىن اتقارعاندا الدىڭعى بۋىننان ۇيرەنگەنىنىڭ كومەگى كوپ ءتيدى. بىلتىردان بەرى اۋداندىق ەكونوميكا جانە قارجى ءبولىمى باسشىسىنىڭ ورىنباسارى قىزمەتىن اتقارىپ كەلەدى.
كەيدە ەكى داۋىردەگى مەملەكەتتىك قىزمەت سالاسىن سالىستىراتىنى بار. كەڭەس كەزىندە بولىمدە رەۆيزيالىق فۋنكتسيا دا بار ەدى. سول ارقىلى مەكەمەلەرگە تەكسەرۋ جۇرگىزىلەتىن. قازىر بۇل سالانىڭ جاۋاپكەرشىلىگى وتە جوعارى. تاۋەلسىزدىكتىڭ العاشقى جىلدارىنداعى قيىندىق مەملەكەتتىك قىزمەتتەگىلەرگە دە جەڭىل تيگەن جوق. تالاي بىلىكتى ماماندار جاۋاپكەرشىلىگى كوپ, جالاقىسى از جۇمىسىن تاستاپ, باسقا سالالارعا كەتىپ جاتتى. بىراق وسى قيىندىقتا تا قازىناگۇل قىزمەت اۋىستىرۋدى ويلاماپتى.
2000-جىلدار باسىندا قىزىلوردا وبلىسى ءىس قاعازدارىن العاش بولىپ مەملەكەتتىك تىلگە كوشىرگەنى ەستە. سول كەزدە ورىس مەكتەبىن بىتىرگەندىكتەن ازداپ قينالدى. وسى تۇستا ءبولىم باسشىسى, جاس تا بولسا بىلىكتىلىگىمەن تانىلعان مىقتى مامان گۇلباقىت نارماعامبەتوۆانىڭ كومەگى كوپ ءتيدى.
قىزمەتتە ءجۇرىپ تالاي تالاپتى جاسقا جول كورسەتتى. سولاردىڭ ءبىرى – نۇرداۋلەت ايماعامبەتوۆ بيۋدجەتتىك جوسپارلاۋ سەكتورىنىڭ مەڭگەرۋشىسى. بيۋدجەتتىڭ قىر-سىرىن يگەرتۋگە جاساعان جاردەمى زايا كەتپەدى. قازىر شاكىرتى بولاشاعىنان ءۇمىت كۇتتىرەتىن ماماننىڭ بىرىنە اينالدى.
«كوپ جىلدان بەرى باعامداعانىم – بۇرىنعى قىزمەتكەر مەن بۇگىنگى ماماننىڭ ايىرماشىلىعى جەر مەن كوكتەي. كەيدە باسشىلىقتىڭ ەسكەرتپەسىن كوتەرە الماي, قاباعى تۇسكەن جاس ارىپتەستەرىم كەلەدى. وندايدا باياعىدا وزىمە قامقورلىق تانىتىپ, قاناتىنىڭ استىنا العان قىزمەتتەس اپالارىمنىڭ ۇلگىسىمەن ءجون-جوباسىن ايتىپ, ارقاسىنان قاعىپ قويامىن. ويتكەنى كوپ ادامنىڭ قولىنان شىعاتىن جۇمىستىڭ ناتيجەسى دە, ساپاسى دا ۇجىمنىڭ بىرلىگىنە بايلانىستى. شىنىن دا, سىرىن دا جاسىرمايتىن جاستارمەن سويلەسە وتىرىپ, كەزىندەگى ارىپتەستەرىم ەسكە تۇسەدى. ءومىر جولىمدا وسىنداي جاقسى جاندارمەن قىزمەتتەس بولعانىما شۇكىرلىك ايتامىن», دەيدى ق.باكەنوۆا.
ارقا سۇيەر ازاماتى بەرەكە راحمەتاليەۆ دۇنيەدەن وزعاندا جاقىن-جۋىقتارىمەن قاتار قىزمەتتەستەرىنىڭ قولداۋىمەن ەڭسە تىكتەدى. كەيىپكەرىمىز قىزمەتتە ءجۇرىپ بالا تاربيەسىن دە تىس قالدىرمادى. بالالاردىڭ ۇلكەنى قىمبات بەرەكەقىزى قازىر گەرمانياداعى روزەنحايم قالاسىندا دەنساۋلىق ساقتاۋ سالاسىنداعى ساراپشى قىزمەتىن اتقارادى. ودان كەيىنگى گۇلجايناسى قىزىلورداداعى ە.اۋەلبەكوۆ اتىنداعى دارىندى بالالارعا ارنالعان №4 وبلىستىق مەكتەپ-ينتەرناتىندا اعىلشىن ءتىلىنىڭ مۇعالىمى. ۇلى ايان اۋداندىق قوعامدىق دامۋ ءبولىمىنىڭ باس مامانى. كەنجەسى اقبوتا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وقيدى.
مەملەكەتتىك قىزمەتتەگى 40 جىلى ءىزسىز ەمەس. اۋدانداعى بار سالانىڭ تابىسىندا مامان رەتىندە كەيىپكەرىمىزدىڭ دە ۇلەسى بار.
قىزىلوردا وبلىسى,
قازالى اۋدانى
